O Laloamu Dirava Ena Basileia be Dahaka?

BAIBUL NA E TOMAMU

“Guba Diravana ese basileia ta baine haginia, nega ta ai basie habuaia tari diba ḡauna.”​—Daniel 2:44, Buka Helaḡa.

“Mero ta vada e henida. Taunimanima ireḡudia [“Gavamani,” New World Translation, futnout] na ia paḡana ai baine heato.”​—Isaia 9:6.

UNA GWAUHAMATA ENA NAMO

• Una gavamani na kara maoromaoro e badinaiamu dainai, oi baine durumu diba.​—Isaia 48:17, 18.

• Tanobada matamatana lalonai mauri na bo moalelaiamu.​—Apokalupo 21:3, 4.

BAIBUL BAITA ABIDADAMA HENIA DIBA, EIAVA?

Oibe, ini badi rua daidiai:

• Iesu na Dirava ena Basileia ese baine haḡuḡuru ḡaudia e hahedinarai. Iesu ese ena hahediba e hamaorodia bae ḡuriḡuri, Dirava ena Basileia bainema bona ena ura tanobada ai baine vara totona. (Mataio 6:9, 10) Una ḡuriḡuri baine ḡuḡuru dalana na Iesu ese e hahedinaraia.

  Iesu tanobada ai e nohova neganai, ia ese hitolo taudia e ubudia, gorere taudia e hanamodia, bona mase taudia e hatoredia isi lou! (Mataio 15:29-38; Ioane 11:38-44) Unu amo Iesu ese vaira neganai, Dirava ena Basileia amo be Lohiadiamu taudia daidiai, baine kara ḡaudia e hahedinarai ḡoevaḡoeva.​—Apokalupo 11:15.

• Tanobadai e varamu ḡaudia ese e hamomokanimu Dirava ena Basileia na kahirakahira be maimu. Iesu e peroveta Basileia ese tanobada ai maino do se havaraia lalonai, tuari, hitolo, bona tano mareremarere do bae vara.​—Mataio 24:3, 7.

  Hari, unu na e varamu. Una dainai, ta dibamu kahirakahira Dirava ena Basileia ese unu dika iboudiai baine haoredia.