Hahediba Tauna Badana ese Ḡau Momo E Hadibamai

TAMAGU BONA SINAGU EDIA HAHEITALAI

Laḡani 1950 dokodiai, tamagu bona sinagu na Italy amo ela Kindersley, una na Saskatchewan, Canada ai. Gabeai, idia na hereva momokani e dibaia, bona emai mauri ai una na mai anina bada ḡauna ai ela. Lau ese na laloa taomu, maraḡigu ai lau bona egu ruma taudia ida na a haroro momova dainai, nega haida ai launa na hevasehavamu na gwaumu lau na laḡanigu 8 ai “heduru painia” na karaia!

Tamagu bona sinagu na ogoḡami taudia, to idia na haheitalai namodia, badina Iehova dainai edia ura ḡaudia e dadarai. Heḡereḡere, 1963 ai idia ese edia kohu e hoihoilai, unu amo moni e habou, intanesinol hebouna Pasadena, California, U.S.A. ai baela totona. Laḡani 1972 ai, ai na kilomita 1,000 a heau ala Trail, British Columbia, Canada ai, unu amo Italy gado taudia baia durudia. Tamagu na stoa badana ta ai gabu haḡoeva bona meintenens ḡaukaradia e karava. Ia ese promotion o dagi haida e dadarai, badina ia na Iehova ihesiai henina karana e atoa gunava.

Launa na moalemu badina tamagu sinagu edia haheitalai namodia lau bona vara bougu tatoiosi e durumai. Idia edia amo na dibaia ḡauna badana be ina: Bema lau ese Dirava ena Gavamani baina atoa guna, Iehova ese be narigumu.—Met. 6:33.

FULTAIM HESIAI ḠAUKARA E MATAMAIA

Laḡani 1980 ai, lau na Debbie ida a headava, bona ia na taihu namona badina ia danu Iehova ena hesiai ḡaukara e lalo badava. Aina a ura ful-taim hesiai ḡaukara baia hamatamaia dainai, ai a headava bena hua toi muridiai Debbie na painia ḡaukara e hamatamaia. Ai a headava bena laḡani ta murinai, ai na kongrigeisin maraḡina ta ala, baia durua totona, bena lau danu painia ḡaukara na hamatamaia.

Gabeai, ai na a lalomanoka bona a urava una gabu baia rakatania. To, ai ese sekit tauna a hereva henia guna. Ia ese ai e sisiba henimai, eto: “Umui na sibomui emui metau o habadaiamu. Umui na emui metau mo o lalomu. To bema umui na ḡau namodia mo bo tahumu, umui ese bo davarimu.” Una sisiba maorona na nega korikori ai a abia. (Sal. 141:5) Una sisiba a badinaia bona a laloparara ḡau namodia na momo. Kongrigeisin ai adavadia dia Witnes pablisa taudia bona memero kekeni haida danu e urava edia hesiai ḡaukara bae habadaia. Una ese ai na mai anina bada ḡauna ta e hadibamai. Ai na a diba ḡau namodia mo baia lalo bona Iehova enai baia tabekau, unu amo ia ese ai baine durumai emai metau baia haheaukalai. (Maik. 7:7) Ai na a moale bona emai noho dalana na e namo lou.

Emai painia skul ginigunana ai, emai instrakta na guna tano haida ai hesiai ḡaukara e karava. Idia ese edia laulau e haheitalaimai, bona idia ese metau e haheaukalai bona e abi hahenamodia e herevalai, una ese lalomai e hagoada bona a ura misinari ḡaukarana baia karaia. Bena lalomai a hadai, baia hekwarahi ela bona una ḡaukara baia karaia momokani.

Una dainai, laḡani 1984 ai British Columbia amo ai na kilomita 4,000 a heau ala Quebec, French gado e herevalaiamu taudia edia gabu. Unuseniai kastom bona gado matamata baia diba na namo. Ai ese a davaria metau ta na, emai moni na dia heḡereḡere. Nega ta ai, ai na biru tauna ta ena potato oredia a gogova. Debbie ese unu potato na e nadudia namo herea dainai a moalelaidia! Ena be hekwakwanai momo a davari, to a haheaukava bona moaleva. Ai ese a abia daeva, Iehova ese ai na e narimaiva.—Sal. 64:10.

Dina ta ai, telefon amo ta ese e rini henimai. Una na e boirimai Canada Betele ai baia ḡaukara. Ena be ai na a moale, to Gilead Skul ena aplikeisen a siaia guna dainai, lalomai na e rua. To herevana, una invateisen na a abia dae. Betele ai a kau neganai Brens Komiti ta, Tadikaka Kenneth Little, a nanadaia, “Emai Gilead aplikeisen na be ede bamona?” Ia eto, “Gabeai una baita herevalaia, bema bae boirimui neganai.”

Wiki ta murinai, lau bona Debbie ida e boirimai Gilead Skul baiala. To, ai ese abi hidi ta baia karaia na namo. Tadikaka Little ese ai e hamaoromai: “Herevana dahaka abi hidi bo karamu, to dina ta ai oi bo laloamu, bo gwaumu, launa una hari nama abia hidi. To Iehova ese unu abi hidi ruaosi na be hanamodiamu.” Ai na ala Gilead Skul, bona laḡani haida lalodiai a itaia, Tadikaka Little ena sisiba na maoro. Nega momo ai ese tadikaka ena hereva amo ma haida a hagoadadiamu bema idia na e uramu bae diba edena hesiai ḡaukara bae abia hidi na namo.

MISINARI ḠAUKARANA

Ai na a moale dikadika badina stiuden iboumai 24 na Gilead klas 83 ai a vareai. Una na April 1987, Brooklyn, New York ai e heabi. Tadikaka Ulysses Glass bona Jack Redford na emai instraktas. Hua faiv muridiai, September 6, 1987 ai a gradueit. Ai raruosi bona John bona Marie Goode na e siaimai Haiti ala.

Haiti amo Gilead misinari oredia e luludia bona laḡani 1962 murinai misinari ta unu se lou laova. Ai na a gradueit bena wiki toi muridiai ai na Haiti ala, unuseniai ororo gabudia ai kongrigeisin maraḡina ta ena pablisa 735 a durudia. Ai na matamata bona ḡau momo do asi dibamai, bona misinari rumana ai na ai mo sibomai a nohova. Unuseniai taunimanima na ogoḡami ai nohova bona asi duahiduahi dibadia. Emai misinari ḡaukara a hamatamaia neganai, politikol heiriheiri daidiai taunimanima na e daḡedaḡeva bona e urava gavamani bae kokia, protest e karava, bona lai badana cyclone e kau.

Ai na Haiti tadikaka taihu edia goada bona moale karadia amo ḡau momo a diba. Idia momo edia mauri na auka, to idia ese Iehova e lalokau heniava bona haroro ḡaukara na e laloa badava. Taihu burukana ta na asi duahiduahi dibana, to ia ese siri 150 e lalodia taomu. Ena be dina ta ta ai hekwakwanai idauidau e varamu, to unu ese e hagoadamaiva dainai Dirava ena Gavamani sivaraina a harorolaiava, badina una Gavamani sibona ese hekwakwanai iboudiai be haoremu. Ai na a moalemu badina ai ese a stadi henidiava taudia haida na hari vada regula painia, spesol painia, bona elda ḡaukaradia e karamu.

Haiti ai, lau na mero ta ladana Trevor ida a hedavari, ia na Mormon dubuna ena misinari ta, bona ia ida nega ta ta ai Baibul a herevalaiava. Laḡani haida muridiai, ia ese leta ta e siai henigu. Ia eto: “Lau na hebouhebou ai ba bapatisomu! Launa na uramu baina lou Haiti bona spesol painia ḡaukara baina karaia, badina guna una gabu ai Mormon edia misinari ḡaukara na karaiava.” Bona laḡani momo lalodiai, ia na unu e kara tomava bona adavana ese e bamoa.

EUROPE AMO ALA AFRICA

Europe ai, emai haroro ḡaukara na e namo e laova, badina unuseniai taravatu momo na e kokidia. Laḡani 1992 ai, ai na Ljubljana, Slovenia ala, tamagu bona sinagu na una gabu ai e bada murinai Italy ela. Unu negai tuari na dounu bada, guna e gwauraiava Yugoslavia ai. Vienna ai, Austria ena brens ofesi, bona Zagreb, Croatia, bona Belgrade, Serbia edia ofesi ese una region ai haroro ḡaukara e nariava. Guna e gwauraiava Yugoslavia ena tano foa na hari edia Betele be haginimu.

Una dainai, ai na kastom matamata bona gado matamata baia dibaia na namo. Hanua taudia na be gwaumu, “Jezik je težek,” anina na “Gado na auka herea.” Una na momokani! Tadikaka bona taihu na orea ese e halasi lalohadai matamatadia e abi dae bona Iehova ese idia na e hanamodiamu, bona ai ese una a itaia neganai e hagoadamai. Danu, ai ese a itaia hanaihanai Iehova na nega korikori ai hekwakwanai e hamaoromaoromu. Laḡani momo lalodiai Slovenia ai ai na ḡau momo a dibadia, bona idaunegai a diba ḡaudia ese unuseniai e durumai hekwakwanai a haheaukalaidia.

To emai mauri ai ḡau ma haida na dounu baia haidau. Laḡani 2000 ai, ai na e siaimai Côte d’Ivoire, West Africa ala. Bena November 2002 ai, tuari daidiai ai na Sierra Leone e laohaimai. Laḡani 11 lalodiai e varava tuarina na vada e ore. Ai ese Côte d’Ivoire baia rakatania haraḡa na auka. To, ai ese a dibadia ḡaudia ese e durumai baia moale noho totona.

Ai na urava kamonai taudia momo baia durudia, bona laḡani momo lalodiai tuari e haheaukalaiava tadikakadia a lalodiava. Idia na ogoḡami, to idia na e urava idia dekediai miadia ḡaudia na bae hari. Taihu ta ese Debbie na dabua haida e henia. Matamanai Debbie na se ura harihari ḡauna baine abia, to taihu na eto: “Tuari lalonai, tano ma haida amo tadikaka ese ai e durumaiva. Hari na emai nega baia heduru.” Ai na lalomai a hadai idia edia haheitalai namona baia tohotohoa.

Ai na Côte d’Ivoire ma a lou lao, to unuseniai politikol taudia ese heiriheiri ma e vara lou. Una dainai, November 2004 ai, ai na helikopta amo e roholaimai neganai, lau baege ta bona adavagu baege ta mo abi kau. Hanuaboi ai, ai na French edia ami edia gabu ai floa ai a hekure, bona dabai e laohaimai Switzerland. Hanuaboi ai brens ai a kau neganai, Brens Komiti bona Ministerial Training School ena instrakta mai adavadia ida ese a welkam henimai, e harahumai, aniani siahudia amo e ubumai, bona Swiss chocolate momo herea e henimai. Ai ese edia lalokau na a mamia momokani.

Matamanai ai na e siaimai Ghana ai a noho sisina ela bona Côte d’Ivoire ai heiriheiri e ore neganai da ma unu ala. Tuari daidiai a heauva bona emai asainmen e haidaudiava dainai a lalohekwarahi, to tadikaka bona taihu edia kara namodia ese e hagoadamai. Lau bona Debbie na a gwauva, ‘Ena be Iehova ena orea lalonai lalokau na kara badana, to ai ese una na baia laloa bada.’ Oibe, nega aukadia iboudiai lalodiai ai ese mai anina bada ḡaudia a dibadia.

MIDDLE EAST AI

Laḡani 2006 ai, world headquarters ese revareva amo e hadibamai emai asainmen matamata na Middle East baiala. Anina na, unuseniai ai na gabu matamata, mauri matamata, gado matamata, bona kastom matamata baia dibadia. Unuseniai, politikol taudia bona tomadiho taudia edia heiriheiri na bada. Kongrigeisin ta ta edia gado idauidau na ai ese a moalelaiva, bona a itaiava tadikaka na e lalotamonava badina Iehova ena orea ena hahekau herevadia e badinava. Ai ese a itaiava tadikaka bona taihu na e haheaukava, ena be edia ruma taudia, skul turadia, ḡaukara turadia, bona dekedia taudia ese e daḡedaḡe henidiava.

Laḡani 2012 ai, ai na Tel Aviv, Israel ena spesol hebouhebouna ala. Una na nega ginigunana Iehova ena taunimanima na unuseniai e hebou tamona—gunaguna be Pentekost 33 C.E. ai e hebou. Una nega na ai ese basia laloa boio diba!

Unu laḡani lalodiai, ai na e siaimaiva eda ḡaukara e taravatu tanona ta a vadivadiava. Ai ese pablikeisin haida a abi kau, haroro ḡaukara a karaia, hebouhebou maraḡidia danu a lao heni. Soldia mai edia ipidi ida na dala iboudiai e koudia bona checkpoint gabudia na momo, to ai na mai aonegamai ida bona pablisa haida ida mo a loava.

A LOU AFRICA

Laḡani 2013 ai, ai na asainmen idauna ta a abia Congo, Kinshasa edia brens ai baia heduru. Una tano na mai hairaina, to laḡani momo gunadiai unuseniai tuari momo e varava dainai, ogoḡami na bada herea. Matamanai ai na ato, “Ai na Africa maurina na mai dibamai; ai na heḡaeḡae.” To unuseniai dala do se hanamo dainai, ai ese ḡau momo baia diba na namo. Ai ese tadikaka edia haheauka, moale, bona ḡau namodia momo a itaia, badina ena be edia mauri na auka, to idia ese haroro ḡaukara e ura heniava, bona hebou badadia bona maraḡidia e lao heniva. Ai ese a itaia, guba Gavamanina ena ḡaukara na e bada e laova bona Iehova ese e duruava bona e hanamoava. Congo ai emai fultaim hesiai ḡaukara lalonai ḡau momo a dibadia, bona turamai na emai ruma bese taudia ai ela bamona.

Laḡani 2017 dokonai, ai na asainmen ma ta ala, una na South Africa ai. Unuseniai Betele na bada herea bona baia kara ḡaukaradia na matamata. To, idaunegai a diba ḡaudia ese e durumai emai maduna matamatadia baia hua totona. Laḡani momo lalodiai Iehova e badinaiamu bona e haheaukamu tadikaka taihu na a lalokau henidiamu. Ena be Betele taudia na idauidau bona edia kastom na idauidau, to mai lalotamonadia ida e ḡaukara heboumu. Iehova ena taunimanima na Baibul ena taravatu e badinamu bona kara namodia e karamu dainai idia na maino ai e nohomu bona Iehova ese e hanamodiamu.

Laḡani momo lalodiai, lau bona Debbie na asainmen namodia momo a abi, kastom idauidau bona gado idauidau a dibadia. Una na mai hekwarahina, to nega iboudiai Iehova ena lalokau na iena orea bona tadikaka amo a mamia. (Sal. 144:2) Ai ese abia daemu emai fultaim hesiai ḡaukara amo a diba ḡaudia daidiai, ai na Iehova ena hesiai taudia namodia ai ala.

Tamagu bona sinagu ese e hadibagu herevadia, adavagu Debbie ena heduru, bona tadikaka bona taihu edia haheitalai namodia daidiai na moalemu. Lau bona adavagu na vaira negana a laloamu neganai, ai na a ura dikadikamu eda Hahediba Tauna Badana, Iehova, amo diba ma haida baia abi.