1925​​—Laḡani 100 Gunadiai

DIRAVA ENA TAUNIMANIMA NA DOUNU E NARI

Baibul stiuden momo na e laloava laḡani 1925 ai tanobada na Paradaiso ai be laomu. Dahaka dainai? Tadikaka Albert Schroeder, ia na gabeai Gavanin Bodi ai ela, ia eto: “Ai na a abia daeva laḡani 1925 ai horoa taudia na guba baela bona abidadama taudia, heḡereḡere, Abraham bona David na bae toreisi lou bena tanobada bae gunalaia.” To una se vara neganai, tadikaka bona taihu haida na e lalohisihisi.—Prov. 13:12.

Herevana haida e lalohisihisi, to Baibul stiuden momo na dounu haroro ḡaukara e goadalaiava. Idia na e laloparara bae karaia ḡaukara badana na ma haida ediai Iehova sivaraina bae harorolaia. Mani aita itaia idia ese reidio be ede e ḡaukaralaia tomava unu amo taunimanima momo bae haroro henidia.

WITNES TAUDIA ESE REIDIO STEISEN MOMO E HAGINI

Laḡani 1924 ai, taunimanima momo na WBBR reidio steisen e hakala heniava. Una dainai, laḡani 1925 ai Baibul Stiuden ese Chicago badina hanuana Illinois ai reidio steisen ma ta e haginia. Una steisen matamatana ladana na WORD. Una steisen e haginia engineer ta ladana Ralph Leffler na e gwa: “Paraka hanuaboidia ai, una reidio na gabu daudaudia ai danu e hakalaiava.” Heḡereḡere, femli ta na Pilot Station, Alaska ai e nohova, una siti ena daudau na 5,000 kilomita (3,000 mi), bona idia na edia nega ginigunana una reidio steisen e hakalaia. Una e hakala henia murinai, dia ese edia tenkiu revarevana ta e siaia, una steisen ai e ḡaukarava taudia ediai. Badina una program ese idia na e hagoadadia bona e durudia Dirava bona Baibul amo diba ma haida bae abi.

December 1, 1925, The Watch Tower ai momo ese ina program e hakalaia badina na ini e herevalaia toma, eto: “United States ai, ina na reidio steisen goada hereana ta. Badina taunimanima ese una steisen na United States ena west gabudia, Cuba ena gabu daudaudia, bona Alaska ai danu e hakalaiava. Guna hereva momokani se dibaia taudia momo na una steisen ai hereva momokani e kamonaia. Una dainai idia na e urava una steisen bae hakala henia.”

Unu nega ai, Bible Student na e urava reidio bae ḡaukaralaia, Canada ai sivarai namona bae harorolaia. Una dainai laḡani 1924 ai, idia ese Saskatchewan ena siti Saskatoon ai reidio steisen CHUC e haginia. Canada ai una na tomadiho ta ese e haginia reidio steisen ginigunana. Bena laḡani 1925 ai, idia na gabu ma ta e tahua una steisen bae haginia totona. Una dainai orea ese Saskatoon ai theater gunana ta e hoia bona e hanamoa murinai, broadcasting studio na unuseniai ma e haginia.

Una reidio steisen dainai, Saskatchewan ena taoni maraḡidia bona hanua ai e nohova taudia na nega ginigunana sivarai namona e kamonaia. Heḡereḡere, taoni ta ai, Mrs. Graham na una reidio broadcast e hakala henia murinai, ia na revareva e tore Baibul pablikeisin haida baine abi totona. Tadikaka George Naish eto: “Toana na Mrs. Graham na heduru e ura haraḡa, una dainai Studies in the Scriptures ibounai na ia a siai henia.” Se daudau, Mrs. Graham ese Dirava ena Gavamani sivaraina na gabu daudaudia ai e harorolaiava.

AI ESE HEREVA MOMOKANI A DIBAIA

March 1, 1925, The Watch Tower ese atikol badana ta ladana “Birth of the Nation” e halasia. Dahaka dainai una atikol na mai anina bada? Badina Bible Student na e diba Satana ese demoni e lohiadiamu, danu tanobada ai tomadiho koikoi, gavamani, bona bisnesi oreadia na ia ese e gunalaidiamu. To, ina atikol amo, “hesiai tauna mai ena kamonai bona mai ena aonega” ese tadikaka bona taihu e durudia e laloparara Iehova ena hesiai taudia tanobada ai bona guba ai na e ḡaukara heboumu. Idia na Satana ena tanobada amo e daudaumu bona Iehova ida e ḡaukara heboumu, unu amo Satana bona ia murinai e rakamu taudia e inai henidiamu. (Met. 24:​45, NWT) Danu, hesiai tauna oreana ese e hahedinaraia Dirava ena Gavamani na laḡani 1914 ai e gini bona una laḡani ai guba ai tuari e vara dainai, Iesu ese Satana bona ena demoni na guba amo e tahodia dobi bona hari idia na tanobada ai.—Rev. 12:​7-9.

Haida ediai na e auka una laloparara matamatana bae abia dae. Una dainai, laḡani 1925 Watch Tower na ma ini e gwa toma: “Ai na a laloamu bema ina Watch Tower e duahiamu taudia ese ina laloparara matamatana na se abia daemu, namona na bae haheauka, Iehova bae abidadama henia bona dounu Ia bae hesiai henia.”

To, Britain tadikakana ta Tom Eyre, ia na colporteur (hari e gwauraiamu painia), na Bible Student ese una atikol e duahia neganai e abia hemamina na ini e gwauraia toma: “Tadikaka na e moale badina Reveleisen karoa 12 anina e dibaia. Bona a laloparara Dirava ena Gavamani na guba ai e gini, una dainai mai moalemai ida ma haida ediai una sivarai namona a herevalaia. Danu una ese e hagoadamai haroro ḡaukara baia habadaia bona e durumai a laloparara Iehova na nega vaira ai ḡau namo hereadia momo be karamu.”

IEHOVA ENA HEREVA IHAMOMOKANINA TAUDIA

Hari ina negai, Iehova ena Witnes taudia ese Isaia 43:10 na e ḡaukaralaia momomu. Una siri ai na e gwaumu: “‘Iehova na e tomu: Umui na egu hereva ihamomokanidia taumui; umui na egu hesiai [taumui], vada na abimui hidi.’” To, laḡani 1925 gunadiai, pablikeisin momo ese una siri na se ḡaukaralaia momo. Gabeai, laḡani 1925 lalonai, The Watch Tower ese Isaia 43:10 bona 12 na magasin ena kaha iboudiai 11 lalodiai e halasia loulou!

Laḡani 1925 August dokonai, Bible Student na Indianapolis, ai hebouhebou badana ta e abia. Tadikaka Joseph F. Rutherford na una hebouhebou ela taudia daidiai welkam revarevana ta e torea, bona una revareva na hebouhebou ena program ai e torea, eto: “Ina hebouhebou tama neganai, . . . ita na Lohiabada ena amo goada bada herea tame abia. Una dainai baita lou neganai ita na mai goada badada ida haroro ḡaukara baita karaia unu amo Iena hereva baita hamomokania.” Unu dina 8 hebouhebouna ela taudia na e hagoadadia dala idauidau ai Iehova sivaraina bae harorolaia.

Saturday, August 29 ai, Tadikaka Rutherford na tok ta e heni, sinadona na “A Call to Action.” Una tok ai ia ese e hahedinaraia dahaka dainai haroro ḡaukara na mai anina bada: “Iehova na ena taunimanima e hamaorodia . . . : ‘Umui na egu hereva ihamomokanina taumui . . . Bona lau na Dirava.’ Bena Tadikaka Rutherford na mai goadana ida ini e gwa toma: ‘Taunimanima ihadibadia totona, saini auna ta ba haginia.’ Oibe, tanobada ai Iehova ena hereva e hamomokaniamu taudia na ena lauma helaḡa amo e hakaudiamu, badina idia na Iena taunimanima.”—Isa. 43:12; 62:​10, NWT.

Tadikaka Rutherford na tok e heni murinai, ia ese document ta ladana “Message of Hope” e duahia. Una document ese e hahedinaraia, Dirava ena Gavamani sibona ese gorere be haoremu. Danu, maino, noho namo, bona moale hanaihanai be havaraiamu. Una hebou ela taudia iboudiai ese una na e abia dae. Una document na gabeai gado momo ai e transleitia bona e printia, unu amo haroro ḡaukara ai bae ḡaukaralaia. Bona kope 40 milion mai kahana na vada e hariharilai.

Laḡani haida lalodiai Bible Student ese ina lada, Iehova ena Witnes, na do se ḡaukaralaiava. To, idia na e lalopararava idia ese Iehova sivaraina bae harorolaia na mai anina bada.

KAMONAI TAUDIA E LOU HENIDIAVA

Tanobada heḡeḡemadai ai Bible Student ena namba na e badava dainai, tadikaka ese idia na e hagoadadia dia printi pepadia mo bae hariharilai, to guna sivarai namona e abia dae taudia danu bae vadivadia. Message of Hope pepana ihariharilaina ḡaukarana e ore murinai, Bulletina ai ina hahediba herevana e halasia: “Pepapepa ladana Message of Hope e abia dae taudia ba vadivadidia.”

Texas ai, January 1925 ena Bulletin ese Bible Student ta ena ripoti na ini a torea toma, eto: “Ai na a hoa badina guna haroro ḡaukara a karaiava gabudia a lou lao neganai, kamonai taudia momo a davaridia. To gabu matamatadia ala neganai, dia unu bamona. Laḡani 10 gunadiai emai teritori ai taoni maraḡina ta na nega 5 haroro ḡaukara a karaiava. . . . Hari, Taihu Hendrix bona lau sinagu na una gabu ai ma e haroro loumu bona idia ese buka momo vada e hariharilai dia guna bamona.”

Panama tanona ai, colporteur o painia ta ena ripoti na ini e torea toma, eto: “Guna se urava sivarai namona bae abia dae taudia na lau ese na vadivadi henidia loulouva dainai gabeai idia na e ura sivarai namona bae kamonai. Lau ese egu nega bada na laḡani gunana ai haroro ḡaukara ai na davaridia taudia na vadivadidiava bona idia haida edia amo ekspiriens namodia na abiva.”

LAḠANI VAIRA AI BAE VARA ḠAUDIA E LALODIA

Laḡani 1925 dokonai, Tadikaka Rutherford ese colporteur o painia taudia e tore henidia bona una laḡani haroro ḡaukarana ena ripoti e hadibadia, danu e hadibadia vaira laḡanidia ai be ma dahaka bae kara. Ia na eto: “Laḡani gunadia ai umui ese lalohisihisi taudia o hagoadadia karana na hahenamo badana. Bona una ḡaukara ese umui na e hamoalemui. . . . . Danu laḡani 1926 ai, umui ese Dirava bona ena Gavamani na dounu ba harorolaia, bona ba hahedinaraia umui na Ia itomadiho henina taumui. . . . Oibe, namona na ita iboudai mai gadoda goadana ida eda Dirava bona King baita hanamoa.”

Laḡani 1925 dokona ai, tadikaka na plen e kara Brooklyn ai Betele na bae habadaia. Bena laḡani 1926 ai konstraksen projek badana vada e matama.