Mauri Bona Hesiai Ḡaukara Hebou Pepana Ena Referens
September 6-12
DIRAVA ENA HEREVA ENA NAMO | DEUTERONOMI 33-34
“Iehova Ena ‘Mia Hanaihanai Imadia’ Henudiai Ba Noho”
it-2 rau 51
Iesurunu
Israel imatauraina ladana ta. Greek Septuagint ai “Iesurunu” e hahanaia anina na “egu lalokau.” Ina lada “Iesurunu” ese Israel taudia e hahelalodia taova idia na Iehova ena gwauhamata besena, una dainai idia ese kara maoromaoro bae badinaia na namo. (De 33:5, 26; Isa 44:2) To, Deuteronomi 32:15 ai, ina lada Iesurunu na Israel taudia ese asie laloa bada. Idia na e gwau-edeede, ikaradia Diravana e rakatania, bona ihamauridia Tauna e dadaraia.
w11 10/15 rau 26 par. 18
Iehova Na Hanaihanai Ita be Durudamu
18 Mose ese e torea ane namona ta ese Israel taudia e hagoadadia, ini e gwau toma: “Noho-hanaihanai Diravana na emu noho gabuna; mia-hanaihanai imadia na henumu ai.” (Deu. 33:27) Gabeai peroveta tauna Samuel ese Israel taudia e hamaorodia, eto: “Iehova iḡavana dalana amo basio raka siri. Iehova isiaina ba lao heni, mai lalomui idoidiai. . . . Badina be Iehova ese ena orea taudia basine negedia daure, ia ladana herea-daena bagunai.” (1 Sam. 12:20-22) Bema Iehova baita badinaia hanaihanaimu, ia ese basine rakatanidamu bona nega iboudiai be durudamu.
w11 9/15 rau 19 par. 16
Ba Heau mai Haheaukamu Ida
16 Abraham heḡereḡerena, Mose danu Dirava ese e gwauhamatalai ḡaudia e ḡuḡuru na se ita. Israel taudia na Gwauhamata Tanona ai do asie vareai neganai, Dirava ese Mose e hamaoroa: “Tano ba itaia vairamu ai; a Israel taudia na henidiamu tanona na basio lao henia bona lalonai basio raka vareai.” Iehova na unu e hereva toma badina matamanai Mose bona Aaron na Meribata ranu gabunai Israel taudia e gwau-edeede dainai, e badu bona edia hereva amo Dirava asie hanamoa. (Deu. 32:51, 52) To Mose be Iehova ena hereva dainai e badu, a? Lasi. Ia na Israel taudia ese bae abia hahenamona e gwauraia neganai, eto: “Israel e, oi na namo. Daika na oi sisivamu? Iehova ese vada e hamauria besena; emu hekaha kesina, bona emu kwalimu darena.”—Deu. 33:29.
Dirava Ena Hereva Ba Tahua Namonamo
it-2 rau 439 par. 3
Mose
Mose na laḡanina 120 ai e mase. Baibul ese ia na ini e herevalaia toma: “Matana se valahu-valahu, bona tauna se manoka.” Ia na Iehova ese e guria bona e guria gabuna na ta asi dibana ema bona hari. (De 34:5-7) Unu amo Israel taudia ese dirava koikoidia e tomadiho henidiava taudia basie tohotohodia bona Mose garana na edia tomadiho ḡauna ai basie halaoa. Diabolo na e urava Mose tauanina na una dala ai baine ḡaukaralaia. Iuda, Kristen hahediba tauna bona Iesu Keriso ena half brother, na eto: “Mikael, aneru ikwaradia, diabolo ida e hepapahuahu, Mose tau-anina e hepapahuahulaia, negana ai na se ere dika henia, a e hereva henia eto, ‘Lohiabada ese baine gwau henimu.’ ” (Iud 9) Iosua ese Israel taudia na Kanaan tanona ai do se hakaudia vareai neganai, Israel taudia na dina 30 lalodiai Mose taina e tai.—De 34:8.
September 13-19
DIRAVA ENA HEREVA ENA NAMO | IOSUA 1-2
“O Karamu Ḡaudia ai Ba Kwalimu Dalana”
w13 1/15 rau 8 par. 7
Ba Goada—Iehova Na Oi Ida!
7 Mai lalogoadada ida Iehova ena ura baita karaia totona, namona na iena Hereva baita stadilaia bona baita badinaia. Iosua na Mose gabuna e abia neganai, Iehova ese e hamaoroa, eto: “Ba goada bona ba haheauka. Egu hesiai tauna Mose e henimu taravatuna idoinai ba badinaia bona karana ba karaia. . . . Ina taravatu bukana herevadia na udumu ai bae mia; ia anina ba laloa boi, ba laloa rani. Unu amo ia lalonai e tore herevadia iboudiai ba badinadia bona karadia ba kara; bena emu raka baine namo bona emu kara anidia bae namo.” (Ios. 1:7, 8) Iosua na una sisiba e badinaia dainai, e karava ḡaudia iboudiai anidia na e varava. Ita danu unu baita kara tomamu neganai, Dirava ena hesiai ḡaukara na mai goadada ida baita karaiamu bona baita kwalimumu.
w13 1/15 rau 11 par. 20
Ba Goada—Iehova Na Oi Ida!
20 Ina hekwakwanai tanobadana lalonai, Dirava ena ura baita karaiamu na mai hekwarahina. To ita na dia siboda, badina Dirava na ita ida. Bona ia Natuna, kongrigeisin Kwarana, ese ita e durudamu danu. Dia una mo, tanobada heḡeḡemadai eda tadikaka taihu 7,000,000 mai kahana e nohomu. Iboudai ese eda abidadama baita hagoadaia bona sivarai namona baita harorolaia, bona laḡani 2013 ena siri badana baita laloatao, etomu: “Ba goada bona ba haheauka. . . . Iehova emu Dirava ese e bamomumu.”—Iosua 1:9.
Dirava Ena Hereva Ba Tahua Namonamo
w04 12/1 rau 9 par. 1
Iosua Bukana Ena Hereva Badadia
2:4, 5—King ena tatau ese spai taudia e tahudiava neganai, dahaka dainai Rahaba ese e koidia? Rahaba ese Iehova e abidadama henia dainai spai taudia e gimadia, ena be ena mauri bema haboioa diba. Una dainai, Dirava ena taunimanima e urava bae hadikadia tataudia ediai unu spai taudia ela gabuna na se gwauraia hedinarai. (Mataio 7:6; 21:23-27; Ioane 7:3-10) Rahaba na “ena kara daidiai maorona e gwaurai,” badina ia ese Dirava ena taunimanima na King ena tatau amo e gimadia.—Iakobo 2:24-26.
September 20-26
DIRAVA ENA HEREVA ENA NAMO IOSUA 3-5
“Iehova ese Eda Abidadama Karana E Hanamoamu”
it-2 rau 105
Ioridane
Galilea Gohuna henunai Ioridane sinavaina ena dobu na 1 mita ela 3 mita heḡereḡerena, bona ena lababa be 27 mita ela 30 mita heḡereḡerena. To medu e dihomu negadiai abata e hekaramu, bona Ioridane ranuna na e badamu bona dobu. (Ios 3:15) Abata e hekaramu negadiai, Israel tatau, ha’hine, bona natu ese Ioridane sinavai bae hanaia na auka badina edia mauri na bae haboioa diba. Aru goadana na bada bona unuseniai e diguva taudia na e arudiava. To, Iehova ese hoa dalanai Ioridane ranuna e hakaukaua, bena Israel taudia na tano kaukauna amo e raka hanai. (Ios 3:14-17) Laḡani momo muridiai, Elia na Elisaia ida Ioridane sinavaina isena ai gigini neganai, unu e vara toma, bona gabeai Elisaia sibona enai danu e vara.—2Ha 2:7, 8, 13, 14.
w13 9/15 rau 16 par. 17
Iehova Ena Hahekau Herevadia Ba Moalelai
17 Edena dalai Iehova ibadinana karana ese baine duruda, ia baita abidadama henia totona? Israel taudia na kahirakahira Gwauhamata Tanonai bae vareai neganai, e vara ḡaudia mani aita lalo. Iehova ese taravatu mauana e huaia hahelaḡa taudia e hamaorodia Ioridane Sinavaina lalonai bae gini. Israel taudia na una sinavai badinai e kau neganai, e itaia medu bada herea e diho dainai sinavai na e abata. Israel taudia be dahaka e kara? Idia be sinavai badinai e taruha, e nari ela bona ranu e maraḡi bena e hanai, a? Lasi, idia ese Iehova ena hahekau herevadia e badina. Bena dahaka e vara? E vara ḡauna na Baibul ese ini e herevalaia toma: “Taravatu mauana e huaia hahelaḡa taudia aedia na sinavai ranuna ai e turu dobi. . . . Bena sinavai ranuna na se aru, bona unu hahelaḡa taudia na tano kaukauna ai e gini Ioridane badinai ela bona taunimanima iboudiai e raka hanai.” (Ios. 3:12-17, Contemporary English Version) Israel taudia na matadiai e itaia sinavai ranuna na e stopu. Oibe, Israel taudia na Iehova ena hahekau herevadia e badina dainai, una ese edia abidadama na e hagoadaia.
w13 9/15 rau 16 par. 18
Iehova Ena Hahekau Herevadia Ba Moalelai
18 Hari ina negai, Iehova na ena taunimanima daidiai hoa karadia se karamu, to ia e badinaiamu neganai e hanamodiamu. Idia na Dirava ena lauma helaḡa ena heduru dainai, tanobada heḡeḡemadai Basileia sivaraina e harorolaiamu. Danu, Iehova ena Witnes Tauna badana bona e toreisi lou tauna Keriso Iesu ese ena hahediba taudia e gwauhamata henidia una ḡaukara lalonai baine durudia, eto: “Taunabunai baola, bese iboudiai hahediba ai ba halaodia . . . lau na daba daba iboudiai umui ida ta nohomu eIa bona tanobada dokona.” (Mat. 28:19, 20) Iehova ena Witnes taudia momo na e gari asi dibadia taudia bae hereva henidia, to lauma helaḡa ese e durudiamu dainai taunimanima idauidau e haroro henidiamu.—Salamo 119:46; 2 Korinto 4:7 ba duahi.
Dirava Ena Hereva Ba Tahua Namonamo
w04 12/1 rau 9 par. 2
Iosua Bukana Ena Hereva Badadia
5:14, 15—“Iehova ena tuari oreana baine lohiaia” tauna be daika? Iosua na Gwauhamata Tanona iabina totona, lohia tauna ese e hagoadaia. Una lohia tauna na Hereva—Iesu Keriso, una negai ia na guba ai e nohova. (Ioane 1:1; Daniel 10:13) Hari ina negai, Dirava ena taunimanima na lauma tuarina lalonai e tuarimu, to Iesu Keriso ese e durudiamu, bona una ese idia na e hagoadadiamu
September 27–October 3
DIRAVA ENA HEREVA ENA NAMO | IOSUA 6-7
“Ḡau Asi Anidia Baita Dadarai”
w10 4/15 rau 20 par. 5
Ḡau Asi Anidia Basio Rarai!
5 Laḡani handred momo e ore bena Israel taudia ese Ieriko hanuana e hadarerea neganai, Akan na unuseni ai kohu miadia e ita bona e ura heni dainai e henao. Dirava ese idia na e haḡanidia una hanua ai kohu iboudiai bae gabu, to ia ese e gwaurai ḡaudia mo bae laohai Iehova ena habouhabou rumana ai bae haboudia. Israel taudia e hamaorodia eto: “Nahuamui ba toho, e gwaudia ahu ḡaudia ta bavabia, bena sibomui ba hahedika, bona Israel taruhana ba hadikaia bona ba hahekwarahia na garina.” To Akan ese una hahediba herevana na se badinaia dainai Israel taudia na Ai hanuana e tuari henia neganai, asie kwalimu bona momo na e mase. Akan ese e karaia karana na se gwauraia hedinarai ela bona Dirava ese e gwauraia hedinarai. Akan na e gwa: “Tuari amo ta abi kohudia . . . na ita neganai, na ura heni dikadika bona na abidia.” Akan na matana ese e ita ḡaudia e ura heni bada dainai dika e davari, ia na e hamasea bona “ena ḡau iboudiai danu lahi ai e doudia.” (Ios. 6:18, 19; 7:1-26 NWT) Akan na kudounai, Dirava ese e taravatu ḡaudia e ura heni bada.
w97 8/15 rau 28 par. 2
Dahaka Dainai Kerere Baita Gwaurai Hedinarai?
Kerere baita gwaurai hedinarai badina ta na, unu amo kongrigeisin na be ḡoevamu. Iehova na ḡoeva bona helaḡa Diravana. Ia na e uramu ia e tomadiho heniamu taudia iboudiai na mai edia momokani bona ḡoeva ida ia bae tomadiho henia. Ia na e gwa: “Kamonai memeromui ai baola. O dibura negadia ai o ḡahusiva ḡaudia na basio haḡoidia, a e boirimui Tauna vada e helaḡa heḡereḡerena, umui danu ba helaḡa, emui kara idoidiai lalodiai. Badina be vada e torea, ‘Umui na ba helaḡa, badina be lau name helaḡa.’ ” (1 Petro 1:14-16) Ta ena kara mirona eiava kererena ese kongrigeisin be hamiroamu bona Iehova ena lalonamo iabina dalana be koua dibamu. Una basine vara totona, iena kerere bae hamaoromaoroa eiava kongrigeisin amo bae atoa siri na namo.—Iosua, karoa 7 ida ba haheḡereḡerea.
w10 4/15 rau 21 par. 8
Ḡau Asi Anidia Basio Rarai!
8 Kristen taudia na e raraimu ḡaudia bona tauani ena ura dikadia ese lalodia bae veri diba. Una dainai Dirava ena Hereva ese e hagoadadamu, ta raraimu ḡaudia bona ta ura henimu ḡaudia ai siboda baita hebiagu. (1 Kor. 9:25, 27; 1 Ioane 2:15-17 ba duahi.) Kara maoromaoro tauna Iobu ese ḡau ta iraraina karana bona e ura henimu ḡaudia edia siahu na e lalopararalaia. Una dainai ia na e gwa: “Lau na matagu taravatudia vada na atu; benaini, hane-ulato rami-hebouna na ede baina haḡerea toma?” (Iob 31:1) Iobu na e gwauhamata heḡahusi dalanai hahine ma ta basine dogoatao, bona lalohadai unu bamona na basine abia. Iesu ese ita na e hadibada laloda baine ḡoeva bona matabodaḡa lalohadaina baita dadaraia, ia na e gwa: “Tau ta ese hahine ta baine raraia ela bona baine ḡahusia, ia lalona ai vada e heuda hanai vaitani.”—Mat. 5:28.
Dirava Ena Hereva Ba Tahua Namonamo
w15 11/15 rau 13 par. 2-3
Taunimanima Edia Henanadai
Baibul negadiai, tuari taudia ese hanua goadadia na e koudia heḡeḡeva. Ena be asi dibada dina hida lalodiai hanua ibounai bae koua heḡeḡe, to e kwalimuva tuari oreana ese e hadarereava hanuana ena kohu, moni, bona ḡau ma haida e abiva. Archaeology taudia edia hetahu lalonai, idia na aniani momo e davari Ieriko hanuana ai. Buka ta ladana, Biblical Archaeology Review na ini e gwau toma: “Ieriko hanuana e hadikaia neganai, dia hodu mo, to una hanua ai na witi momo herea e davari. . . . Palestine Archaeology taudia ediai una na ḡau idau hereana. Edia hetahu lalonai, reana hodu ta eiava rua mo e davariva. To witi be momo herea e davariva.”
Baibul ai e hahedinaraia, Iehova ese Israel taudia e haḡanidia, Ieriko ai witi na basie gogo. (Ios. 6:17, 18) Israel taudia ese Ieriko hanuana na tubutubu ḡaudia e vara matama (spring) neganai e tuari henia. Una na witi igogona negana dainai, witi na momo herea. (Ios. 3:15-17; 5:10) Ieriko ai witi momo e davari karana ese e hahedinaraia, Israel taudia ese Ieriko hanuana na nega kwadoḡi lalonai e koua heḡeḡe bona e habuaia tari, Baibul ena hereva heḡereḡerena.
October 4-10
DIRAVA ENA HEREVA ENA NAMO | IOSUA 8-9
“Gibeon Taudia Edia Sivarai amo Dahaka Baita Dibamu?”
it-1 rau 930-931
Gibeon
Iosua E Kara Karadia. Iosua ena negai, Hivi taudia na Gibeon ai e nohova, bona bae hadikadia besedia 7 amo, Hivi besena na ta. (De 7:1, 2; Ios 9:3-7) Gibeon taudia na e gwauraidiava Amoro taudia, bona nega haida Amoro taudia e herevalaidiava neganai, una na Kanaan taudia iboudiai e herevalaidiava. (2Sa 21:2; Ge 10:15-18; 15:16 ba haheḡereḡerea.) Gibeon taudia na dia Kannan taudia haida heḡereḡeredia, ena be edia tuari taudia na momo herea bona edia hanua na bada, to e laloparara tuari ai idia na basie kwalimumu badina Iehova na Israel taudia daidiai e tuariva. Una dainai, Iosua ese Ieriko bona Ai hanuana e hadikaia murinai, Gibeon tatau haida, idia na Hivi hanuadia toi Kefira, Beroto, bona Kiriat-iearimi amo (Ios 9:17), na ela Gilgal Iosua ida bae herohemaino. Unu Gibeon tataudia na dabua hedaredia bona tamaka gunadia e kara; idia ese puse gunadia bona vine-ranuna kopidia gunadia, vada e hedare ma e bani ḡaudia, bona parao aukadia bona mai valavaladia e abi kau. Unu amo Israel taudia ediai bae hahedinaraia idia na ḡabu daudaudia amo ema. Danu e gwa, idia na e kamonai Aigupto bona Amoro pavapavadia raruosi, Sihon bona Og, na Iehova ese e hadareredia. To, idia ese Ieriko bona Ai hanuadia ai e vara ḡaudia na asie herevalai, badina asie ura Israel taudia bae diba idia na dia ‘gabu daudau amo ema.’ Bena Israel tataudia ese idia e laohai anianidia e sekedia bona edia hereva e abi dae murinai, gwauhamata e kara basie hamasedia.—Ios 9:3-15.
w11 11/15 rau 8 par. 14
“Sibomu Emu Diba ai Basio Tabekau”
14 Ita iboudai—elda taudia danu—na dia ḡoevadae, una dainai ta uramu abi hidi baita kara neganai, Iehova ena heduru totona baita ḡuriḡuri na ḡau badana. Heḡereḡere, Gibeon taudia na Iosua e noia idia ida maino bae karaia neganai, Iosua bona Israel tatau badadia ese Iehova na asie ḡuriḡuri henia. Ena be Gibeon taudia edia gabu na kahikahi, to idia na e koikoi e gwa idia na gabu daudau amo ema taudia. Iosua bona Israel tatau badadia ese Iehova ena heduru na asie noia, bena Gibeon taudia ida maino gwauhamatana e karaia. Ena be gabeai Iehova ese una gwauhamata na e abia dae, to una sivarai na Baibul ai e atoa unu amo ita baine hadibada Iosua bona Israel tatau badadia ese iena heduru na asie tahua.—Ios. 9:3-6, 14, 15.
w04 10/15 rau 18 par. 14
“Ina Tano Ba Rakaia Hanai”
14 Unu tatau na e gwa: “Emu hesiai taudia na gabu daudau amo, Iehova, emui Dirava, ladana dainai vada ama.” (Iosua 9:3-9) Edia dabua bona aniani toadia ese e hahedinaraia idia na gabu daudauna ta amo ema, to Gibeon bona Gilgal padadia na kilomita 30 heḡereḡerena. Iosua bona hebou ikwarana taudia ese edia hereva e abia dae dainai idia na Gibeon taudia bona Gibeon badina hanuadia ida maino gwauhamatana e karaia. Gibeon taudia be asie ura bae hamasedia dainai e koikoi, a? Lasi, to idia na e ura Israel ena Dirava ese baine lalonamo henidia. Iehova ese Gibeon taudia na e lalonamo henidia badina idia na “au-siri taudia bona ranu-utu taudia ai e halaodia, Israel taudia edia, bona Iehova ena ihaboulaina patana ena.” (Iosua 9:11-27) Iehova ena hesiai ḡaukara lalonai, Gibeon taudia na mai edia ura ida ḡaukara maraḡidia e karava. Reana idia haida na Babulono amo e lou Netinim taudia ida dubu lalonai e ḡaukarava. (Esera 2:1, 2, 43-54; 8:20) Ita ese idia baita tohotohodia diba, Dirava ida maino ai baita noho bona ena hesiai ḡaukara lalonai mai eda ura bada ida ḡaukara maraḡidia baita kara.
Dirava Ena Hereva Ba Tahua Namonamo
it-1 rau 1030
Bae Taua Dae
Iehova ese Israel taudia e henidia taravatuna lalonai na e gwa, ‘Dirava ese e uduguiraia’ kara dika tauna na bae hamasea murinai au ai bae taua dae, unu amo taunimanima na bae diba una kara dika na basie karaia. E mase tauna na au ai basine hetau dae rani, to tauanina na au amo bae kokia bona bae guria, badina hanuaboi ibounai lalonai tauanina au ai be miamu neganai, Dirava ese Israel taudia e henidia tanona na be hamiroamu. (De 21:22, 23) Israel taudia ese una taravatu na e badinaiava ena be idia ese e taua daeva tauna na dia Israel tauna.—Ios 8:29; 10:26, 27.
October 11-17
DIRAVA ENA HEREVA ENA NAMO | IOSUA 10-11
“Iehova Na Israel Taudia Daidiai E Tuari”
it-1 rau 50
Adoni-sedek
Israel taudia Gwauhamata Tanona e abia neganai, Adoni-sedek na Ierusalem pavapavana. Ia bona Ioridane ena west kahana basileiadia pavapavadia na e hebou Iosua mai ena tuari oreana ida bae tuari henidia totona. (Ios 9:1-3) Una negai, Gibeon ai e nohova Hivi taudia na Iosua ida maino vada e karaia. To, Adoni-sedek na e ura Gibeon taudia baine tuari henidia, una dainai ia bona ia ida e hegogo Amoro pavapavadia 4 ese Gibeon hanuana e koua heḡeḡe bona e tuari henia. Iosua ese Gibeon taudia e hamauridia bona unu pavapava edia tuari taudia momo herea e aladia mase, to pavapava 5 na e heau Makeda kohuana ai e komu, bena unuseniai e tarapudia. Gabeai, Iosua ese Adoni-sedek bona pavapava 4 na Israel taudia iboudiai vairadiai, e hamasedia bona au ai e taudia dae. Dina e diho murinai, tatau haida ese unu pavapava tauanidia na au amo e koki, bena guna e komu kohuana ai ma e tahodia vareai lou, una na edia gara ai ela.—Ios 10:1-27.
it-1 rau 1020
Aisi Nadi
Iehova ese E Ḡaukaralaia. Aisi nadi na nega haida Iehova ese e ḡaukaralaiava ena hereva ihaḡuḡuruna totona bona ena siahu badana e hahedinaraiava. (Sa 148:1, 8; Isa 30:30 NWT) Iehova ese Aigupto taudia ediai hisihisi namba 7 e havaraia neganai, una na nega ginigunana ia ese aisi nadi e ḡaukaralaia, bena hadohado ḡaudia, tano, bona au e hadika, danu taunimanima bona animal e hamasedia, to Israel taudia Gosen ai, na dika ta asie davaria. (Es 9:18-26; Sa 78:47, 48; 105:32, 33) Gabeai, Gwauhamata Tanonai, Iosua ese Israel taudia e gunalaidiava lalonai, Gibeon taudia na inaidia Amoro pavapavadia ese e hagaridia. Iehova na aisi nadi e ḡaukaralaia Amoro taudia e hamasedia. Una negai, aisi nadi amo e mase taudia edia namba ese tuari ai e mase taudia edia namba e hereaia.—los 10:3-7, 11.
w04 12/1 rau 11 par. 1
Iosua Bukana Ena Hereva Badadia
10:13—Ina hoa karana be ede e vara toma? Guba bona tanobada e havaraia Tauna ese “hoa karana ta . . . basine karaia diba, a?” (Genese 18:14) Bema Iehova baine ura neganai, tanobada ena marere dalana baine haharaḡaia eiava baine hasloua diba, unu amo taunimanima ese dina bona hua be itamu neganai vaitani asie mareremu. Eiava tanobada bona hua na gabudiai baine hahegirodia diba, unu amo hua bona dina diaridia ese tanobada na dounu bae hadiaria. Idaunega amo ema bona hari, nega unuhetomana ta ma se vara lou.—Iosua 10:14, NWT.
Dirava Ena Hereva Ba Tahua Namonamo
w09 3/15 rau 32 par. 5
Taunimanima Edia Henanadai
Baibul ai buka haida ladadia e gwaurai bona edia hereva haida danu e hetore, to una ese se hamomokaniamu unu buka na Dirava ena lauma helaḡa ena siahu amo e tore. Iehova Dirava ese “ena hereva” lalonai e tore herevadia na e gimadia namonamomu bona ‘ena hereva na baine gini hanaihanai.’ (Isa. 40:8) Oibe, Iehova ese Baibul bukadia 66 ai e ato herevadia na vada heḡereḡere ita iduruda totona, unu amo ‘ḡau iboudiai ikaradia ai baita kwalimu.’—2 Tim. 3:16, 17.
October 18-24
DIRAVA ENA HEREVA ENA NAMO | IOSUA 12-14
“Mai Kudoumu Idoinai ida Iehova Ba Badinaia”
w04 12/1 rau 12 par. 2
Iosua Bukana Ena Hereva Badadia
14:10-13. Ena be Kaleb laḡanina na 85, to e noinoi Heberon taudia baine luludia lasi. Una na ḡaukara aukana badina Heberon hanuanai e nohova Anakim tataudia na taunimanima badadia. To, Kaleb na Iehova ese e durua dainai, e kwalimu bona Heberon na roho mauri hanuana ta ai e halaoa. (Iosua 15:13-19; 21:11-13) Kaleb ena haheitalai ese e hagoadadamu, tiokratik ḡaukara aukadia na mai eda ura ida baita kara.
w06 10/1 rau 18 par. 11
Abidadama Bona Dirava Igari Henina Karana Dainai E Lalo Goada
11 Eda mauri ai hereva momokani baita badinaiamu, ena namo baita ‘mamiamu,’ bona Dirava ese eda ḡuriḡuri e haerelaimu bona eda mauri ai ita e hakaudamu dalana baita ‘itaiamu’ neganai, eda abidadama na be hagoadaiamu. (Salamo 34:8; 1 Ioane 5:14, 15) Ta diba momokanimu, Iosua bona Kaleb ese Iehova ena kara namodia na e ita dainai, una ese edia abidadama na e hagoadaia. (Iosua 23:14) Mani ina a laloa: Idia na laḡani 40 tano ḡaḡaena ai e noho, to asie mase Dirava ena gwauhamata heḡereḡerena. (Numera 14:27-30; 32:11, 12) Bona laḡani 6 lalodiai, Iosua bona Kaleb ese Israel taudia e gunalaidia bena tuari ai Kanaan hanuadia e hadareredia. Danu, idia na e mauri daudau, bona ahudia ta ta e abi. Momokani, mai edia lalogoada bona abidadama ida Iehova e hesiai heniamu taudia na Iehova ese e hanamodiamu!—Iosua 14:6, 9-14; 19:49, 50; 24:29.
Baibul Ena Hereva Ba Tahua Namonamo
it-1 902-903
Gebala
Iosua ena negai, Iehova na e gwa Israel ese bae abia tanona ta na “Gebala taudia edia tano.” (Ios 13:1-5) Taunimanima haida na e gwaumu una na dia maoro badina Gebala ena siti na daudau Israel ena not kahana amo (c. 100km [60 mi] N of Dan) bona Israel ese idia na se lohiadia. To, diba bada taudia haida na e gwa una siri ai Heberu herevadia haida na asie hedinarai namonamo o e dika dainai reana una siri na ini e hetore toma “una tano na Lebanon badinai” eiava ‘ela bona Gebala taudia edia border.’ To Iosua 13:2-7 ai, Iehova ese e gwauraia gwauhamatana na bema vara diba, to Israel taudia na edia gwau-edeede dainai Gebala tanona na se abia.—Ios 23:12, 13 ba haheḡereḡerea.
October 25-31
DIRAVA ENA HEREVA ENA NAMO | IOSUA 15-17
“Ahumu Hereadaena Ba Gimaia”
it-1 rau 1083 par. 3
Heberon
Israel taudia na Kanaan ena saut kahana hanuadia e tuari henidia neganai, Heberon taudia bona edia king (Hoham murinai baine lohia tauna) na e gwauraidia bae habuaia tari hanuana ta. (Ios 19:36, 37) Ena be Iosua ena hegunalai henunai Israel taudia na tuari ai Kanaan taudia e hadareredia, to idia ese gima taudia haida asie haginidia haraḡa. Una dainai, Israel taudia na ma gabu haida e tuari henidiava neganai, Anakim taudia na Heberon hanuana e abia lou, to gabeai Kaleb (eiava Kaleb ese gunalaidia Iuda natuna memerodia) ese idia e tuari henidia bona una hanua e abia lou. (Ios 11:21-23; 14:12-15; 15:13, 14; Hah 1:10) Kaleb na Iuda iduhuna amo, matamanai Heberon hanuana e henia, to gabeai una hanua na roho mauri hanuana ai e halaoa. Danu, una hanua ai hahelaḡa taudia ese hahelaḡa ḡaukarana e karaiava. To, “siti [Heberon] ena taoni” bona ena hanua maraḡidia na Kaleb ena.—Ios 14:13, 14; 20:7; 21:9-13.
it-1 rau 848
Iḡui Hesiai Ḡaukara
Baibul negadiai, tuari ai e abidia mauri taudia na “iḡui hesiai ḡaukara” (Heb., mas) e karava. (De 20:11; Ios 16:10; 17:13; Es 10:1; Isa 31:8; Roh 1:1) Aigupto ai, Israel taudia na iḡui hesiai taudia ai e halaodia, idia ese Farao ena kohu e habou hanuadia rua Pitom bona Raamese e hagini bona heitatao taudia ese e itadia taova bona e hahisidiava. (Es 1:11-14) Israel taudia na Gwauhamata Tanonai bae vareai neganai, Iehova ese e haḡanidia Kanaan taudia na bae haoredia, to una na asie badinaia. Idia ese Kanaan taudia na edia hesiai taudia ai e halaodia. Gabeai Israel taudia na Kanaan taudia ese e hakaudia kerere bena dirava koikoidia e tomadiho henidia. (Ios 16:10; Hah 1:28; 2:3, 11, 12) King Solomon ese Kanaan taudia heḡereḡere Amoro taudia, Hiti taudia, Perisi taudia, bona Iebusu taudia na iḡui hesiai taudia ai e halaodia.—1Ha 9:20, 21.
it-1 rau 402 par. 3
Kanaan
Ena be Kanaan taudia momo na asie mase bona Israel ese edia tano haida na asie habuadia tari, to baita gwau dibamu “Iehova ese Israel taudia edia tano e henidia, senedia e gwaurai henidia hamata tanona idoinai e henidia” bona “Iehova ese ena gwauhamata namodia, Israel taudia e gwaurai henidia hamata ḡaudia, na ta se reaia: iboudiai ia ese e hamomokani.” (Ios 21:43-45) Israel taudia na inaidia ese e gari henidiava bona bae noho namonamo totona Israel taudia e noidia basie tuari henidia. Dirava na e gwa ia ese Kanaan taudia na “metairametaira” baine luludia lasi unu amo uda boromadia na basie hutuma bona tano basie hadikaia. (Es 23:29,30; De 7:22) Kanaan taudia edia tuari kohudia na momo herea, edia kariota saididia ai na auri mai matakadia e atova, to Israel taudia na tuari ai bae lusi neganai basieto Iehova ese ena gwauhamata na se haḡuḡurua. (Ios 17:16-18; Ha 4:13) To, Israel taudia edia sivarai amo ta dibamu, tuari haida ai asie kwalimu badina be idia ese Iehova na asie badinaia.—Nu 14:44; Ios 7:1-12.
Dirava Ena Hereva Ba Tahua Namonamo
w15 7/15 32
Oi Mai Dibamu, A?
Baibul ese e herevalaia heḡereḡerena, idaunegai Israel ai au be momo, a?
BAIBUL ese e hahedinaraia, Gwauhamata Tanonai, gabu haida na uda audia gigini bona “momo herea.” (1 Han. 10:27; Ios. 17:15, 18) To hari, unu gabu ai au badadia bona au ma haida na vada lasi dainai, taunimanima na e daradaramu.
Buka ta ladana, Life in Biblical Israel, na ini e gwau toma: “Guna Israel tanonai, uda na babada bona au na momo herea, to hari na dia unu bamona.” Gabu momo na ororo gabudiai bona unuseniai au babada gigini, heḡereḡere Aleppo pine (Pinus halepensis), evergreen oak (Quercus calliprinos), bona terebinth (Pistacia palaestina). Sepala na ororo gabuna, ia na Mediterranean konena bona Iuda ororona bogaraḡidiai, una gabu ai sikamoa fig (Ficus sycomorus) audia na momo herea.
Buka ta ladana Plants of the Bible na e gwa, hari Israel ai gabu momo ai au na dia momo. Dahaka dainai? Taunimanima ese au e utudiamu dainai, uda badadia na e ore e laomu. Una buka na ma e gwa: “Taunimanima na uma bae kara totona au e utumu, bona animal inaridia gabudia e habadamu, dia una mo to ruma bae hagini bona au rakuraku daidiai au e utumu.”