Mauri Bona Hesiai Ḡaukara Hebou Pepana Ena Refrens
© 2023 Watch Tower Bible and Tract Society of Pennsylvania
SEPTEMBER 4-10
DIRAVA ENA HEREVA ENA NAMO | ESETA 1-2
“Baita Hekwarahi Eseta Bamona Baita Manau”
Hahetoho Negadiai Ba Manau Diba
11 Lalo veri herevadia o haida ese bae hanamoda karana ese eda manau karana bae tohoa diba. Eseta mani aita laloa. Ia na mai hairaina bona laḡani ta lalonai muramura namodia amo e dahuava bona aniani namodia e heniava. Ia na dina iboudiai Parasa Basileiana ai e nohova ulatodia ida e laova, king ese baine lalonamo henidia totona. To Eseta na e hemataurai bona ena hemami e biaguava. Danu King ese ena kwini ai e halaoa neganai, ia na se hekokoroku.—Est. 2:9, 12, 15, 17.
ia rau 130 par. 15
Dirava Ena Taunimanima Edia Kahai E Gini
15 Eseta na king enai baine raka vareai neganai, ia na maoro e henia ena ura ḡaudia baine abi hidi, reana sibona tauanina ihahairaina totona danu. To, Eseta na mai manauna ida Hegai ese e gwaurai ḡaudia mo e badina. (Eseta 2:15) Ia na e laloparara hairai ese king lalona na basine veria, to manau karana baine hahedinaraia na ḡau badana. Ia be maoro, a?
Hahetoho Negadiai Ba Manau Diba
12 Manau karana ese baine duruda eda dabua bona heḡoeva daladia amo hemataurai karana baita hahedinaraia bona kara namodia baita kara. Bema ita na ta uramu taunimanima ese bae ura henida, dia namo baita hekokoroku eiava lalodia baita veri ita bae laloda bada totona, to namona na “lalo-manau asi daḡedaḡena” baita hahedinaraia. (1 Petro 3:3, 4 ba duahi; Ier. 9:23, 24) Kudouda ai e miamu lalohadai kereredia na eda kara amo be hedinaraimu. Heḡereḡere, eda kara amo baita hahedinaraiamu ita na kongrigeisen lalonai maduna badadia ta huamu, hehuni sivaraidia haida mai dibada, eiava bamoda haida na maduna e huamu tadikakadia. Eiava ḡau haida baita hahedinarai namonamomu dainai ita mo bae hanamoda, ena be haida edia heduru amo una ta karaia. Iesu na haheitalai namona e hahedinaraia. Ia ese e gwaurai herevadia momo na Heberu Toretoredia amo e abi. Ia na mai manauna ida unu e kara toma, unu amo e kamonai henia taudia na e diba ia e gwaurai herevadia na Iehova ena amo, dia ia sibona ena aonega amo e gwaurai.—Ioa. 8:28.
Dirava Ena Hereva Ba Tahua Namonamo
Oi Mai Dibamu, A?
Hetahu ḡaukara e karamu taudia haida ese Parasa edia uro o clay nadina ta e davaria, bona ia latanai na tau ta ladana Marduka (Motu gado ai na Morodekai) e hetore. Ia na Shushan siti lalonai ḡaukara e haheauava tauna (administrator) ta, reana moni ena heau dalana e itaia taova o accountant. Una toretore e davaria negana ai, una siti ena histri mai dibana namonamo tauna, Arthur Ungnad na e gwa, una na nega ginigunana una toretore ai “Morodekai ladana e hedinarai bona una toretore na dia Baibul kahana ta.”
Ungnad ese ena hereva e gwauraia negana amo, diba bada taudia haida ese Parasa edia nadi toretoredia ma tausen momo e hahanaidia. Idia padadiai na Persepolis siti e hadikaia momorudia lalodiai e davari nadi palakadia haida, unu na guna moni e nariva gabuna (Treasury), siti maḡudia badinai e davari. Unu toretore na Xerxes I ena lohia negana ai e tore ḡaudia. Unu toretore na Elam taudia edia gado ai, bona Eseta bukana lalonai e tore ladadia haida e hahedinarai.
Persepolis toretoredia ai ina lada Marduka danu e hetore, ia na Xerxes I ena lohia negana ai ena ruma Shushan ai seketere ḡaukarana e karaiava. Nadi toretorena ta ai Marduka na e gwauraia gado hahanai tauna. Unu hereva na Baibul ese Morodekai e herevalaia dalana ida e heḡereḡere. Ia na King Ahasuero (Xerxes I) ena ruma ai hesiai ḡaukara e karaiava bona gado rua e herevalaiva. Morodekai na hanaihanai king ena ruma ikoukouna ai e helaiva Shushan ai. (Eseta 2:19, 21; 3:3) Una ikoukou na ruma o building badana ta bona king ena hesiai taudia edia ḡaukara gabuna.
Nadi toretoredia ai e gwauraia tauna Marduka bona Baibul ese e gwauraia tauna Morodekai na dala haida ai e heḡereḡere. Idia e noho negadia bona gabudia na heḡereḡere, edia dagi bona ḡaukara gabudia danu heḡereḡere. Unu hahemomokani ḡaudia ese e hahedinaraimu Marduka bona Morodekai na taunimanima tamona e herevalaia.
SEPTEMBER 11-17
DIRAVA ENA HEREVA ENA NAMO | ESETA 3-5
“Haida Ba Durudia Bae Ḡaukara Goada”
it-2 rau 431 par. 7
Morodekai
Hamana Vairanai se Igo Diho. Agag tauna Hamana na Ahasuero ese praim minista ai e halaoa neganai, king ese ena hesiai taudia iboudiai e haḡanidia Hamana ena dagi dainai ia vairanai bae igo diho. Morodekai na se igo diho bona e hamaorodia ia na Iuda tauna. (Eset 3:1-4) Morodekai na unu e kara toma badina e ura baine hahedinaraia ia na Iehova e tomadiho heniava Iuda tauna ta. Ia na e laloparara Hamana vairanai baine igo diho karana na dia iena dagi mo baine matauraia, guna Israel taudia e karava bamona, idia na lohia taudia edia dagi e matauraia dainai, vairadiai e igo dihova. (2Sa 14:4; 18:28; 1Han 1:16) Morodekai na badi maorona dainai Hamana vairanai se igo diho. Reana Hamana na Amalek tauna, bona Iehova na e gwa ia na Amalek taudia baine tuari henidia “ela uru iboudiai.” (Eso 17:16; HAMAN ba itaia.) Morodekai na Dirava e badinaia bona politikol karadiai se vareai.
it-2 rau 431 par. 9
Morodekai
Dirava ese E Ḡaukaralaia Israel Ihamaurina Totona. King ese e lohiadiava tanodia ai Iuda taudia iboudiai na bae hamasedia haheḡanina e lasi neganai, Morodekai na mai abidadamana ida Eseta e hamaoroa ia na nega maorona ai una dagi e abia Iuda taudia baine hamauridia totona. Morodekai na e hahedinaraia Eseta na ḡaukara badana be karaiamu bona e hamaoroa king ena lalonamo baine abia bona ena heduru baine tahua. Ena be Eseta na ena mauri be haboioamu, to Morodekai ena hereva e badinaia.—Eset 4:7–5:2.
ia rau 133 par. 22-23
Dirava Ena Taunimanima Edia Kahai E Gini
22 Eseta ese una sivarai e kamonai neganai, e lalohisihisi bada. Ia ese baine karaia ḡauna na ena abidadama be tohoamu. Eseta ese Morodekai e haere henia dalana amo e hahedinaraia ia na e gari. Ia ese Morodekai enai king ena taravatu e gwauraia lou eto, bema king ese se boiria tauna na ia vairanai e hedinaraimu, una tauna na bae alaia mase. To bema king ese ena dagi auna, gold ḡauna, amo ta baine dudui henia, una tau na baine mauri. Bona Eseta na mai dibana Vasati na king ena hereva se badinaia dainai king ese e dadaraia, to king ese Eseta be bogaia hisimu, a? Eseta ese Morodekai e hamaoroa dina 30 lalodiai king ese ia na do se boiria! Una dainai Eseta na lalohadai idauidau e abiva bema king ese ia na doini e lalonamo heniamu.—Eseta 4:9-11.
23 Morodekai ena haere ese Eseta ena abidadama e hagoadaia. Ia ese Eseta e hamaoroa bema ḡau ta basine karaiamu, Iuda taudia ihamauridia na idau kaha amo baine hedinarai. To daḡedaḡe karana be varamu neganai ia be edena dalai be roho maurimu? Morodekai na e hahedinaraia ia na Iehova e abidadama henia, badina Ia ese ena taunimanima na basine rakatanidia bona ena gwauhamata na baine hamomokanidia. (Ios. 23:14) Bena Morodekai ese Eseta e hamaoroa eto: “Daika dibana, oi na reana nega inihetomana bagunai dagi vada o abia ina basileia lalonai.” (Eseta 4:12-14) Morodekai na haheitalai namona, ani? Ia na ena Dirava Iehova e abidadama henia momokani. Ita danu, a?—Her. 3:5, 6.
Dirava Ena Hereva Ba Tahua Namonamo
kr rau 160 par. 14
Tomadiho Momokanina Baita Durua
14 Eseta bona Morodekai heḡereḡeredia, Iehova ena taunimanima na e ḡaukara goadamu Ia itomadiho henina karana na iena ura heḡereḡerena ai bae karaia. (Eseta 4:13-16) Tomadiho momokanina bo durua dibamu, a? Oibe. Hanaihanai emu tadikaka taihu daidiai ba ḡuriḡuri, badina hahemaoro koikoidia daidiai e hisihisimu. Ḡuriḡuri unu bamodia na mai siahudia metau bona daḡedaḡe e davarimu tadikaka bona taihu ediai. (Iakobo 5:16 ba duahia.) Iehova ese ḡuriḡuri unu bamodia e haerelaimu, a? Kota lalodiai ta kwalimumu karadia ese e hahedinaraimu unu ḡuriḡuri na e haerelaimu!—Heb. 13:18, 19.
SEPTEMBER 18-24
DIRAVA ENA HEREVA ENA NAMO | ESETA 6-8
“Herevahereva Namonamo Karana Ena Namo”
ia rau 140 par. 15-16
Ia Na mai Aonegana ida E Kara
15 Eseta na king enai ena noinoi ḡauna baine gwauraia to ia na dina ta do ma baine nari, una negai Hamana na sibona ena mase dalana e karaia. Bona reana Iehova Dirava ena siahu dainai king na se mahuta namonamo. (Her. 21:1) Una dainai Dirava ena Hereva ese e hagoadadamu Dirava baita “naria”. (Mika 7:7 ba duahia.) Dirava enai baita nari neganai, ia ese eda hekwakwanai ihamaoromaorodia dala namodia be hahedinaraiamu.
Ia Na mai Lalona Goadana ida E Hereva
16 Eseta na se ura king ena haheauka karana baine tohoa, una dainai aria iharuana ai ena noinoi ḡauna na e gwauraia hedinarai. To edena dala ai? King ese e nanadaia lou neganai, Eseta ese ena noinoi ḡauna e gwauraia. (Eseta 7:2) Eseta enai una na nega maorona baine hereva.
ia rau 140 par. 17
Ia Na mai Aonegana ida E Kara
17 Mani aita laloa, Eseta na lalona ai Dirava e ḡuriḡuri henia bena king e hereva henia, eto: “Pavapava e, bema o lalo namo henigumu bona lalomu na bema heḡereḡere, egu noinoi dainai egu mauri ba henigu, bona egu ura dainai egu bese ba hamauria.” (Eseta 7:3) Eseta ena hereva dalana amo e hahedinaraia ia na king ese baine karaia abi hidi na e matauraia. Eseta na dia king adavana gunana, Vasati, heḡereḡerena, Vasati na mai ena ura ida adavana e hahemaraia! (Eseta 1:10-12) Danu, Eseta na king ese Hamana e abidadama henia karana na se gwauraia dika. To, ia na king e noia ena mauri baine gimaia.
ia rau 141 par. 18-19
Ia Na mai Aonegana ida E Kara
18 Una noinoi ese king kudouna e hamarerea bona e hoa. Daika ese kwini na dika lalonai baine atoa? Eseta ma e gwa: “Vada e hoimai, lau bona egu bese taudia, bae habuamai tari, bae alamai mase, bona bae ha-oremai vaitani totona. Bema hoimai, hesiai taudia bona hesiai hahinedia ai bema halaomai, lau na basinama hereva; badina be ai emai hisihisi na ḡau maraḡina, a hanua pavapavana imamu bema pari be ḡau badana, basita haheḡereḡeredia diba.” (Eseta 7:4) Eseta na mai momokanina ida hekwakwanai na e gwauraia hedinarai, to ma e gwa bema bae hoidia hesiai taudia ai baela, ia na basinema hereva. Una ala-ala karana bema vara, king na metau bada bema davari.
19 Eseta ena haheitalai amo hereva maorodia iḡaukaralaidia karana ta dibaia. Bema oi na o uramu emu lalokau tauna ta ida eiava siahu tauna ta ida hekwakwanai ta ba herevalaia, namona na ba haheauka, ba hemataurai, bona mai momokanimu ida ba hereva.—Her. 16:21, 23.
Dirava Ena Hereva Ba Tahua Namonamo
w06 3/1 rau 11 par. 1
Eseta Bukana Ena Hereva Badadia
7:4; NWT—Iuda taudia bae habuadia tari karana ese edena dala ai “king enai dika be havaraiamu”? Eseta na mai aonegana ida e hahedinaraia Iuda taudia na iḡui taudia bamona bae hoihoilaidia, to bema bae hamasedia una ese king enai dika bada be havaraiamu. Bema Hamana ese Iuda taudia na iḡui taudia bamona bema hoihoilaidia, ia ese moni bada herea bema abi, una ese king ena kohu totona baine heni silva moni 10,000 be hereaiamu. Hamana ena palani bema ḡuḡuru, kwini danu bema hamasea.
SEPTEMBER 25–OCTOBER 1
DIRAVA ENA HEREVA ENA NAMO | ESETA 9-10
“Morodekai Na Ena Siahu E Ḡaukaralaia Ena Taunimanima Baine Durudia”
it-2 rau 432 par. 2
Morodekai
Morodekai ese Hamana ena praim minista dagina e abia, bona king imana rinina e henia, una rini na e ḡaukaralaiamu mai anidia bada pepadia bae saini totona. Eseta ese Morodekai na Hamana ena ruma biagunai e halaoa. Bena Morodekai na King ese e henia siahuna e ḡaukaralaia oda ta e karaia, una na Iuda taudia na mai edia maoro sibodia bae hegima totona. Iuda taudia ediai una na hahemauri dalana bona moale ḡauna. Parasa Basileiana henunai e nohova taudia momo na Iuda taudia ida e hebou, bona Adara huana ena dina namba 13 ai, haheḡani bona revareva anidia e kau negana ai, Iuda taudia na e heḡaeḡae. Morodekai ena dagi dainai, iboudiai na edia kahai e gini. Susa ai dina haida lalodiai tuari e vara. Parasa Basileiana amo Iuda inaidia 75,000 mai kahana e aladia mase, Hamana natuna mamaruanedia gwautaosi danu. (Eset 8:1–9:18) Eseta ese Morodekai na gwaumaoro e henia, laḡani ta ta ai Purimi Ariana na Adara huana ena dina namba 14 bona 15 ai bae karaia. Una nega ai idia na bae moale, bae aniani, bona ta ta ediai bona ogoḡami taudia ediai harihari ḡaudia bae heni. Iuda taudia ese una e abia dae, bona idia garadia, bona edia orea ai e vareai taudia ese danu una aria bae moalelaia. Basileia lalonai Morodekai na dagi bada tauna iharuana, bona Dirava ena taunimanima, Iuda taudia, ese e matauraia bada bona Morodekai na edia namo totona doini e ḡaukarava.—Eset 9:19-22, 27-32; 10:2, 3.
it-2 rau 716 par. 5
Purimi
Anina. Haida edia hereva ese e hahedinaraiamu, hari ina negai Purimi ariana lalonai kara dikadia momo e varamu. Guna Iuda taudia ese e hamatamaia bona e moalelaiava dalana amo na idau. Morodekai bona Eseta na Dirava momokanina Iehova ena hesiai taudia, bona una aria e hamatamaia badina na Ia bae imodaia. Una negai Iuda taudia na Iehova dainai e roho mauri, una e vara badina Morodekai ese Iehova itomadiho henina karana e badinaia. Hamana na reana Amalek tauna, una bese na Iehova ese e uduguiraia, bona e gwauhamata baine hadikaia. Morodekai ese Dirava ena haheḡani e matauraia, bona Hamana vairanai se igo diho. (Eset 3:2, 5; Eso 17:14-16) Danu, Morodekai ese Eseta e hamaoroa herevana (Eset 4:14) ese e hahedinaraia Iuda taudia ihamauridia totona, ia na siahu bada tauna ta enai e tabekau, bona Eseta na king dekena do sela neganai, ia na e anivagava. Una murinai king enai e raka vareai, bena ena noinoi, aria badana ta baine karaia herevana, na king e hamaorolaia. Una ese e hahedinaraia ia na Dirava ena heduru e noia.—Eset 4:16.
cl rau 101-102 par. 12-13
Emu Siahu O Ḡaukaralaiamu Negadiai Dirava Ba Tohotohoa
12 Kristen kongrigeisin lalonai Iehova ese elda taudia e atodia. (Heberu 13:17) Ini lo tadikakadia na Dirava ese e henidia siahuna amo mamoe serina bae durua bona edia namo bae laloa. Edia elda maduna dainai idia ese tadikakadia bae biagudia auka, a? Lasi! Kongrigeisin lalonai elda taudia ese edia ḡaukara na bae laloa maoromaoro bona mai manaudia ida bae karaia. (1 Petro 5:2, 3) Baibul ese elda taudia e hamaorodia: “Dirava ena ekalesia ia rarana e davalaia ḡauna, ba ubua helaoreana.” (Apos. 20:28) Una badi badana dainai elda taudia ese mamoe ta ta na mai lalokaudia ida bae kara henidia.
13 Mani ina haheitalai aita laloa, bema turamu namona ta ese baine noimu iena kohu badana ta ba reḡua, oi na mai dibamu una kohu na moni bada ai e hoia. Oi ese una kohu na bo reḡua namonamomu, ani? Una heḡereḡerena, Dirava ese elda taudia na maduna e henidia una dava bada kohuna, kongrigeisin, ena mamoe ta ta na bae reḡudia namonamo. (Ioa. 21:16, 17) Iehova ese ena mamoe na e lalodia badamu, badina ia Natuna vara-edeana, Iesu Keriso, rarana hereadaena amo e hoidia. Iehova ese ena mamoe na dava bada ḡauna ai e hoidia. Elda taudia ese una bae laloatao bona Iehova ena mamoe bae kara henidia namonamo.
Dirava Ena Hereva Ba Tahua Namonamo
w06 3/1 rau 11 par. 4
Eseta Bukana Ena Hereva Badadia
9:10, 15, 16—Ena be Iuda taudia na maoro e henidia kohu bae dadi, to dahaka dainai idia na unu se kara toma? Badina idia na e ura inaidia amo edia mauri bae gimaia, a dia kohu momo bae abi daidiai.
OCTOBER 2-8
DIRAVA ENA HEREVA ENA NAMO | IOBU 1-3
“Emu Lalokau Iehova Enai Na Ba Hahesiriua”
Noa, Daniel, Bona Iobu Edia Abidadama Bona Kamonai Karana Ba Tohotohoa
16 Iobu ese e davari hekwakwanaidia. Iobu ena mauri lalonai ḡau momo e vara. Hahetoho do se davari neganai, “mairiveina kahana taudia iboudiai bogaraḡidiai” ia sibona na herea. (Iobu 1:3) Ia na taḡa bona lada bada tauna bona momo ese e matauraiava. (Iobu 29:7-16) To, Iobu na se hekokoroku eiava se laloa Dirava ena heduru baine tahua na asi anina. Danu, Iehova ese ia na e gwauraia “egu hesiai tauna.” Ma eto: “Ia na asi ena kerere ta, bona kara maoromaoro tauna; Dirava garina e garimu, bona kara dika amo e raka ohomu, ani?”—Iobu 1:8.
17 To se daudau Iobu ena mauri na e idau. Ia na e ogoḡami bona e lalohisihisi bada. Ta dibamu una e vara badina na, Satana, lada ihadikana tauna, ese koikoi herevadia e gwauraia, eto Iobu na sibona ena namo e lalomu dainai Dirava e tomadiho heniamu. (Iobu 1:9, 10 ba duahi.) Iehova ese una hahebade herevana na se laloa maraḡi. To, nega e heni unu amo Iobu ese baine hahedinaraia ia na Dirava e badinaiamu, bona e lalokau heniamu dainai e tomadiho heniamu.
Dirava Ba Badinaia Hanaihanai!
10 Edena dala ai oi danu Satana ena hepapahuahu lalonai? Satana na vaitani e gwaumu, oi ese Iehova Dirava na so lalokau henia momokanimu, sibomu emu namo dainai basio hesiai heniamu, bona ia na bo rakataniamu! (Iobu 2:4, 5; Apok. 12:10) Una dainai emu hemami be ede bamona? Una na mai lalohisihisina, ani? To mani ina a laloa: Iehova ese oi na e abidadama henimumu, una dainai Satana na se kouamu oi baine tohomu. Iehova na mai dibana ia na bo badinaiamu, bona e gwauhamata baine durumu Satana ba hakoikoia totona. (Heb. 13:6) Ḡau iboudiai ihavaradia Diravana ese e abidadama henidamu na hahenamo ta! Dirava ibadinana karana ena namo o itaiamu, a? Una ese e durudamu Satana ena koikoi herevadia baita dadarai, bona Tamada ladana namona baita abia isi bona ena lohia dalana baita badinaia. Dahaka baita kara Dirava baita badinaia hanaihanai totona?
Dirava Ena Hereva Ba Tahua Namonamo
Iesu Ena Hereva Ginigabedia amo Diba Baita Abi
9 Iesu be dahaka e gwa? Iesu kahirakahira baine mase neganai, e lolo eto: “Egu Dirava e, egu Dirava e, dahaka lau ome rakatanigu.” (Mat. 27:46) Baibul ese na se hahedinaraia dahaka dainai Iesu na unu e hereva toma. To unu hereva amo baita diba ḡaudia baita lalodia. Ta dibaiamu ḡauna ta na, Iesu na unu hereva amo Salamo 22:1 ena peroveta herevana e haḡuḡurua. Danu, unu hereva ese e hahedinaraia Iehova ese Natuna igimana ‘maḡuna’ ta se atoa. (Iobu 1:10) Iesu na e laloparara, Tamana ese na se koua inaina ese bae tohoa. Tanobada tauna ta na hahetoho unu bamona se abia. Danu, unu hereva ese e hamomokania, ia na asi ena kerere bona bae hamasea na dia maoro.
OCTOBER 9-15
DIRAVA ENA HEREVA ENA NAMO | IOBU 4-5
“Hereva Koikoidia Ba Dadarai”
it-1 rau 713 par. 11
Elifasa
2. Ia na Iobu turana ta. (Iobu 2:11) Ia na Teman tauna, bona reana Esau natuna roboana ena bese amo, una dainai ia na Abraham ena bese bona Iobu varavarana ta. Ia bona ena bese taudia na edia aonega dainai e heaḡi. (Ier 49:7) Unu tatau tatoiosi amo Elifasa na lada bada tauna, bona reana idia padadiai ia na iahu. Edia herevahereva lalodiai, Elifasa na e hereva guna bona ena hereva na lalata.
w05 9/15 rau 26 par. 2
Lalohadai Kereredia Ba Dadarai!
Elifasa na enai e vara ḡauna ta e herevalaia, eto: “Lauma ta vairagu ai e hanai, bena deragu na e tala; e gini, to oromana asina itaia ḡoeva; ḡau ta na vairagu ai e gini, asi reḡereḡena. Bena gado ta na kamonai.” (Iobu 4:15, 16) Edena lauma ese Elifasa ena lalohadai dalana e haidaua? Elifasa ena hereva dalana amo e hahedinaraia una lauma na dia Dirava ena kara maoromaoro aneruna. (Iobu 4:17, 18) Una na lauma dikana ta. Elifasa bona ia turana raruosi ese hereva koikoidia e gwaurai dainai Iehova ese e gwau henidia. (Iobu 42:7) Elifasa na lauma dikana ta ese lalona e ania dainai e gwaurai herevadia na dia Dirava ena lalohadai.
w10 2/15 rau 19 par. 5-6
Satana Ena Hereva Koikoidia Ba Dadarai
Satana ese Iobu turana ta, Elifasa, e ḡaukaralaia dainai ia ese Iobu e hamaoroa taunimanima na mamanoka. Taunimanima na “raro rumadia ai e nohomu taudia” heḡereḡeredia, “badidia na ḡahu ai gigini.” Ia ese Iobu e hamaoroa, eto: “Kaubebe na e taoa patapata haraḡamu, a idia hari e taodia patapata haraḡa-haraḡamu. Daba bona adorahi padadiai idia na e habuadia tarimu, e mase vaitanimu, bona ta ese se lalodiamu.”—Iobu 4:19, 20.
Siri haida ai, ita na raro amo e karamu “hodu” na heheto. (2 Kor. 4:7) Ita na manoka badina mai eda kara dika bona ita na dia ḡoevadae. (Roma 5:12) Bema ita na asi iduruda, Satana ena hedibaḡani ai baita moru dibamu. To ita na Kristen tauda bona mai iduruda. Ena be mai eda manoka ḡaudia to Dirava vairanai ita na dava bada ḡaudia na heheto. (Isa. 43:4) Danu, Iehova ese lauma helaḡa na e noiamu taudia ediai e henimu. (Luka 11:13) Iena lauma ese “siahu hereadaena” baine henida, unu amo Satana ese e havaramu hedibaḡani baita haheaukalai diba. (2 Kor. 4:7; Fili. 4:13) Bema Diabolo baita dadaraiamu, bona abidadama ai baita gini tutuka-tutukamu, Dirava ese be hagoadadamu. (1 Pet. 5:8-10) Unu amo Satana Diabolo garina basita gari.
mrt 32 par. 13-17
Hereva Koikoidia amo Sibomu Ba Hegima
● Infomeisin ema Dalana Ba Tahua Namonamo
Baibul be dahaka e gwaumu? “Ḡau iboudiai ba diba toho.”—1 Tesalonika 5:21.
Ena be o kamonai eiava o itaia sivaraina na nius ai e gwauraia loulou, to do so abia dae eiava haida ediai do so siaia lalonai, namona na ba hamomokania guna. Edena dala ai?
Infomeisin ema dalana ba hamomokania. Nius e halasimu kampanidia bona orea ma haida ese reana sivarai be haidauamu badina e uramu moni bae kara, eiava politikol karadia bae durudia. Nius ai o itamu ḡaudia na nius e halasimu kampanidia haida ida ba haheḡereḡerea. Nega haida, tura haida na reana se lalo namonamomu bona infomeisin kereredia na email amo e siaimu, eiava social media ai e atomu. Una dainai o kamonaimu sivaraina na basio abia dae haraḡa, to hahemomokani gaudia ba seke.
Namona na ba tahua namonamo bema o kamonaiamu sivaraina na sivarai maorona bona dia sivarai gunana. Una sivarai e halasia deitina bona e hamomokania herevadia na ba sekedia namonamo. Ba henahua toho badina nega haida sivarai haida na kaha tamona mo e gwauraiamu to dia sivarai ibounai, eiava una sivarai ese taunimanima be habadudiamu.
Dirava Ena Hereva Ba Tahua Namonamo
w03 5/15 rau 22 par. 5-6
Dirava Ba Badinaia Tarika-tarika, Bona Mauri Heau Heluluna ai Ba Kwalimu
Tanobada heḡeḡemadai Dirava ena orea lalonai ta nohomu karana ese e duruda badamu. Tadikaka oreana ta bamoamu karana na hahenamo badana! (1 Petro 2:17) Bona ita ese tadikakada baita durudia bae goada totona.
Kara maoromaoro tauna Iobu ena kara mani a laloa. Iobu enai tauhalo e heni koikoi tauna Elifasa na e gwa: “Emu hereva ese hekwakwanai tauna vada e haginia tore, tui manoka taudia oi ese vada o ha-aukadia.” (Iobu 4:4) Eda hereva daladia amo tadikakada ta hagoadadiamu eiava? Ita ta ta eda maduna na tadikakada baita durudia, unu amo mai haheaukadia ida Dirava bae hesiai henia. Idia ta kara henidiamu neganai, namona na ini hereva baita badina: “Ima manokadia ba hagoadadia; tui manokadia ba ha-aukadia.” (Isaia 35:3) Hebou negadiai oi be nega o atomu emu tadikaka ta eiava taihu ta ba hagoadaia totona, a? (Heberu 10:24, 25) Idia na e ḡaukara goadamu Iehova bae hamoalea dainai, hereva namodia baita gwaurai, unu amo baita durudia bae gini goada bona mauri heauna ai bae kwalimu.
OCTOBER 16-22
DIRAVA ENA HEREVA ENA NAMO | IOBU 6-7
“Bema O Mamiamu Mauri Ihaheaukalaina Na Auka”
w06 3/15 rau 14 par. 10
Iobu Bukana Ena Hereva Badadia
7:1; 14:14—Ini hereva “hekwarahi” eiava hesiai ḡaukara anidia be dahaka? Iobu e davaria metauna na bada herea dainai, e laloa ena mauri na auka, ta ese hesiai ḡaukarana bema karaia na heto. (Iobu 10:17) Ta e masemu negana amo ela bona baine toreisi lou negana na Iobu ese hesiai tauna ena mauri ida e haheḡereḡerea.
Iehova Na Lalometau Taudia E Hamauridiamu
NEGA haida na ta laloamu ‘eda mauri dinadia na gagadoi bona hekwarahi’ ai e honu honu dae. (Iobu 14:1) Una dainai nega haida ta lalometaumu. Baibul negadiai, Iehova e hesiai heniava taudia haida edia hemami danu unu heto. Haida be e urava bae mase. (1 Han. 19:2-4; Iobu 3:1-3, 11; 7:15, 16) To, nega iboudiai Iehova ese e durudiava bona hagoadadiava. Edia sivarai na Baibul ai e tore ita bae hagoadada bona bae hadibada totona.—Roma 15:4.
g 1/12 rau 16-17
Bema Mauri Ihaheaukalaina Na Auka
Ena be emu hekwakwanai na reana auka herea, to ba helalotao oi na dia sibomu, taunimanima momo ese danu hekwakwanai idauidau e haheaukalaimu. Baibul na eto: “[Dirava] e kara ḡaudia iboudiai na e ḡanaḡana boumu, e hisihisi boumu.” (Roma 8:22) Ena be bo mamiamu emu hekwakwanai na basine oremu, to nega e laomu lalonai ḡau haida na be namomu. Dahaka ese baine durumu diba ba haheauka?
Emu hemami na turamu namona ta enai ba herevalai. Baibul na eto: “Tau ta turana ese nega iboudiai e lalokau heniamu; bona tadikakana ena lalokau na dika negana ai e hedinaraimu.” (Hereva Lada-isidia 17:17) Baibul ese e gwauraiamu kara maoromaoro tauna Iobu na ena metau negana lalonai ena hemami na ma haida ediai e herevalaia. Iobu na e mamia ena ‘mauri na e inai heniamu’ neganai, eto: “Egu maumau herevadia baina gwaurai hedinarai; mai laumagu iditana ida baina hereva.” (Iobu 10:1) Ma haida ediai emu hemami ba gwauraia hedinarai neganai, una ese emu lalometau o lalohisihisi hemamina na be hamaraḡiamu bona be durumumu o davaria hekwakwanaina ai lalohadai maorona bavabia.
Ḡuriḡuri ai Dirava enai emu lalohadai iboudiai ba gwaurai. Haida na e lalomu ḡuriḡuri karana na ta lalona o ena hemami baine hanamoa mo, to Baibul ena hereva na ma idau. Salamo 65:2 ai Iehova na e gwauraiamu “Ḡuriḡuri ikamonaina Diravana,” bona 1 Petro 5:7 na e gwaumu: “Ia ese e lalomuimu.” Baibul ese Dirava enai ba tabekau ena namo na e gwauraia loulou. Heḡereḡere:
“Iehova bavabidadama henia mai lalomu idoinai; sibomu emu lalo-parara basio abidadama henia. Emu dala iboudiai lalodiai ia bavabia dae, bena ia ese emu dala baine hamaoromaorodia.”—HEREVA LADA-ISIDIA 3:5, 6.
“[Iehova] garina e garimu taudia iboudiai edia ura na ia ese e haḡuḡuruamu, edia taitai danu e kamonaimu, bona e hamauridiamu.”—SALAMO 145:19.
“Ia ta abidadama heniamu dainai, dibada ḡau ta iena ura heḡereḡerena ai baita noia, ia ese baine hakala henida.”—1 IOANE 5:14.
“Iehova bona kara dika taudia padadia na daudau, a kara maoromaoro tauna ena ḡuriḡuri ia ese e kamonaiamu.”—HEREVA LADA-ISIDIA 15:29.
Bema emu hekwakwanai na Dirava bo hamaoroamu, ia ese be durumumu. Badi namona ta dainai, Baibul ese e hagoadamumu “nega iboudiai ia bavabidadama henia . . . lalomui anidia na ia vairanai ba hahedinarai.”—Salamo 62:8.
Dirava Ena Hereva Ba Tahua Namonamo
Ba Hakala, Ba Dibadia, Bona Ba Hebogahisi
10 Iehova baita tohotohoa dalana na baita hekwarahi tadikaka taihu baita lalopararalaidia. Una dainai idia na baita dibadia namonamo. Hebou do se matama o hebou e oremu murinai idia ida baita herevahereva, baita haroro hebou, bona bema mai dalana baita boiridia ita ida baita aniani hebou. Unu bo kara tomamu neganai, bo lalopararamu taihu ta na se uramu ma haida baine bamodia badina ia na e hemaraimu, mai ena moni momo tadikakana ta na dia kohu e lalo badamu to heabidae tauna, eiava ruma bese ta na nega momo hebou e mai leidimu badina daḡedaḡe e haheaukalaimu. (Iobu 6:29) Una dainai, namona na ma haida ediai e varamu ḡaudia na basita maumaurai. (1 Tim. 5:13) To, tadikaka taihu na baita dibadia namonamo bona ediai e vara ḡaudia baita diba namonamo. Una ese be durudamu idia baita lalopararalaidiamu.
OCTOBER 23-29
DIRAVA ENA HEREVA ENA NAMO | IOBU 8-10
“Dirava Ena Mia Hanaihanai Lalokauna ese Satana Ena Koikoi Karadia amo E Gimadamu”
w15 7/1 rau 12 par. 3
Ita ese Dirava Baita Hamoalea Diba, A?
Iobu na hekwakwanai momo e davari. Ia na lalohadai kererena e abia bona eto, ena be ia na Dirava e abidadama heniamu eiava lasi, to Dirava ese una na se laloa badamu. (Iobu 9:20-22) Iobu na sibona maorona e gwaurai dainai, haida na e lalova ia ese Dirava ena kara maoromaoro na e hereaia.—Iobu 32:1, 2; 35:1, 2.
Dahaka Dainai Iehova Ena Mia Hanaihanai Lalokauna Baita Laloa Bada?
14 Dirava ena mia hanaihanai lalokauna ese lauma dalanai e gimadamu. David na Iehova e ḡuriḡuri henia, e gwa: “Oi na egu komu gabuna, dika amo o hamaurigumu, bona hahemauri anedia amo o haheḡeḡegu daemu. . . . Iehova e abidadama heniamu tauna na hebogahisi ese e ḡeḡea daemu.” (Sal. 32:7, 10) Idaunega hanuana ta e ḡeḡea ahu habadia ese ena taunimanima e gimadiamu heḡereḡerena, Iehova ena mia hanaihanai lalokauna ese ita gimadamu ḡau ta ese ia hetura henina karana basine hadikaia totona. Danu, Iehova na ena mia hanaihanai lalokauna dainai ita e verida mai Ia baita hetura henia.—Ier. 31:3.
Dirava Ena Hereva Ba Tahua Namonamo
w10 10/15 rau 6-7 par. 19-20
“Daika ese Iehova Ena Lalohadai E Dibamu?”
19 “Iehova ena lalohadai” ai dahaka ta dibamu? Namona na Baibul ese baine duruda Iehova ena lalohadai baita lalopararalaia. Eda diba na Iehova ena diba ida basita haheḡereḡerea bona siboda ese ta atomu taravatudia bona eda lalohadai amo ia baita hahemaoro henia. Iobu na eto: “[Dirava] na dia taunimanima, lau bamogu; bema taunimanima, be bama haere henia, bena raruosi na hahemaoro gabuna ai baiama gini.” (Iobu 9:32) Iobu heḡereḡerena, Iehova ena lalohadai baita lalopararalaiamu neganai, baita gwa diba: “A itaia, ini na ena kara rimuna mo; ia harina sisina mo ta kamonai lahulahumu, a iena siahu reḡena, guba-rahurahu na heto, daika dibana?”—Iobu 26:14.
20 Siri ta Baibul ai ta duahiamu lalonai, bema Iehova ena lalohadai ilalopararalaina na auka, dahaka baita kara? Bema hetahu ḡaukarana ta ta karaiamu murinai doini asita lalopararamu, una ese eda abidadama Iehova enai na be tohoamu. Baita helalotao, nega haida hereva unu bamodia ese dala be kehomu Iehova ena kara namodia ai eda abidadama baita gwaurai hedinarai. Namona na mai manauda ida baita abia dae Iehova ese e kara ḡaudia iboudiai na basita lalopararalai diba. (Koh. 11:5) Una dainai aposetolo Paulo ena hereva na ta abia daemu, eto: “Dirava ena aonega bona ena lalo-parara na daka dobu! Ena hahemaoro na daika ese baine tahua diba? Ena dala na daika ese baine davaria diba? Daika na Lohiabada lalona dibana? Daika ese ena kara baine herevalai henia? Daika enai e abi torehai, bena davana baine henia? Badina be ḡau iboudiai ihavaradia ia mo; bona ḡau iboudiai badidia bona dokodia ia mo. Ia mo baita imodaia hanaihanai. Amen.”—Roma 11:33-36.
OCTOBER 30–NOVEMBER 5
DIRAVA ENA HEREVA ENA NAMO | IOBU 11-12
“Dala Toi Ai Ba Aonega Bona Una Aonega amo Namo Ba Davari”
w09 4/15 rau 6 par. 17
Iobu ese Iehova Ladana E Abia Isi
17 Dahaka ese Iobu e durua Dirava baine badinaia? Iobu na dika do se davari lalonai, Iehova ida ena hetura karana na goada. Ena be Iobu na Satana bona Iehova padadiai e varava hepapahuahuna na asi dibana, to lalona e hadaia Iehova baine badinaia. Ia na eto: “Harihari ela bona baina mase egu Dirava na baina badinaia.” (Iobu 27:5; NWT) Edena dala ai Iobu na Iehova turana namona ai ela? Iobu na ia varavarana Abraham, Isaak, bona Iakob, sivaraidia e kamonai bona Dirava ese e kara henidia dalana na e laloa bada. Bona Iehova ese e havara ḡaudia e lalodia dobu dainai, Iehova ena kara namodia momo e dibadia.—Iobu 12:7-9, 13, 16 ba duahi.
Oi Na Dia Sibomu, Iehova Na Oi Dekedekemuai
10 Tadikaka taihu ba bamodia. Bema kongrigeisin ai burukadia eiava matamatadia bo bamodiamu, edia haheitalai namona amo diba bo abimu. Baibul ese ita e hadibadamu “aonega na taunimanima burukadia ediai.” (Iobu 12:12) To, iahudia danu Dirava e badinaiamu matamata taudia amo diba be abimu. Ena be David laḡanina na maraḡi bona Ionatan laḡanina na bada, to idia na tura namodia ai ela. (1 Sam. 18:1) David bona Ionatan na e heduru heheniva, nega aukadiai Iehova bae hesiai henia. (1 Sam. 23:16-18) Irina ena ruma bese ai ia sibona mo Witnes, ia na e gwa: “Eda tadikaka taihu na vaitani tamada, sinada, kakada bona tadida na heto. Iehova ese idia na e ḡaukaralaidiamu ita bae duruda totona.”
11 Bema oi na hemarai tauna reana oiemu ai na be aukamu haida ba hetura henidia. Ratna na hemarai taihuna, bona hereva momokani e dibaia neganai, haida ese e daḡedaḡe henia, ia na ini e gwa toma: “Launa na laloparara kongrigeisin ai haida edia heduru baina abi na namo.” Ena be ta enai emu hemami igwauraina na auka, to emu hemami bo gwauraiamu neganai ia na oi turamu namona ai be laomu. Turamu na e uramu bae hagoadamu bona bae durumu, to namona na oi sibomu ese edia heduru ba noia
12 Tura namodia idavarina dalana namona ta na, haroro ḡaukara ai tadikaka taihu haida ida baita ḡaukara hebou. Matamanai tame herevalaia taihu, Carol na ini e gwau toma: “Haroro ḡaukara ai bona tiokratik ḡaukaradia ma haida ai taihu na bamodiamu neganai, idia na lau turagu namodia ai e laomu. Laḡani momo lalodiai Iehova na ini tura namodia amo lau e durugu.” Abidadama Kristen taudia baita bamodiamu neganai, namo baita davarimu. O lalomanokamu eiava o mamiamu oi na sibomu neganai, Iehova ese tura unu bamodia amo be hagoadamumu.—Her. 17:17.
it-2 rau 1190 par. 2
Aonega
Dirava ena Aonega. Aonega na Iehova Dirava sibona enai baita davaria, badina ia sibona mo “Aonega Diravana.” (Ro 16:27; Apok 7:12) Diba bona hamomokania ḡaudia na e ḡaukara heboumu, bona ita Ihavarada Tauna Iehova, na “una negana ema bona hari ela bona hanaihanai” (Sa 90:1, 2), e nohomu dainai, iunives ai ḡau iboudiai na mai dibana. Heḡereḡere dina, hua, hisiu bona ranu bae heau namonamo totona taravatu e atodia, bona taunimanima na unu ḡaudia amo hetahu ḡaukaradia bona ḡau idauidau e karamu. Bema unu ḡaudia na lasi, ḡau ta basie karaia dibamu. (Iobu 38:34-38; Sa 104:24; Her 3:19; Ier 10:12, 13) Baita gwa diba Dirava ese e ato taravatudia na mai anidia bada, ta be duruamu abia hidi maorodia baine kara, bona ena mauri baine moalelaia. (Deu 32:4-6; JEHOVAH ba itaia [A God of moral standards].) Iehova ena laloparara na asi hetoana. (Isa 40:13, 14) Ena be taunimanima ese e atomu taravatudia na iena kara maoromaoro taravatudia amo e idaumu, to vaira negai ḡau iboudiai na iena ura heḡereḡerenai be varamu, bona e herevalaimu ḡaudia ese “namo baine habadaia.”—Isa 55:8-11; 46:9-11.
Dirava Ena Hereva Ba Tahua Namonamo
Memero Kekeni Ida Herevahereva Karana
▪ ‘Natudia ese e gwauraimu herevadia anidia na lalopararalaimu, eiava?’ Iobu 12:11 na e gwaumu: “Taia ese hereva e mamidia tohomu, udu ese aniani e mamidia tohomu na heto, ani?” Namona na natumu merona eiava kekenina ese e gwauraimu herevadia ba haerodia. Nega momo memero kekeni na ini bamona herevadia e gwauraimu. Heḡereḡere, reana be gwaumu, “Hanaihanai lau na maraḡidia bamona o kara henigumu!” eiava “So uramu ba kamonai henigu!” Basioto unu na hereva kereredia, to e gwauraimu herevadia anidia ba lalopararalai. Heḡereḡere, ina hereva “Hanaihanai lau na maraḡidia bamona o kara henigumu” anina na “Oi ese lau na so abidadama henigumu,” bona ina hereva “So uramu ba kamonai henigu” anina na “Na uramu oiemuai egu hemami korikorina baina gwaurai.” Namona na baita hekwarahi edia hereva anidia baita lalopararalai toho.