Tadikaka E, Mareko Bona Timoteo Ba Tohotohodia

1-2. Mareko bona Timoteo be dahaka ese bema koudia diba kongrigeisin taudia ba durudia totona?

TADIKAKA E, reana oi na o uramu Iehova ba hesiai henia bona emu kongrigeisin taudia ba durudia, ani? Ita na ta moale badamu badina ta itaiamu memero momo herea na e uramu ma haida isiaidia bae lao heni. (Sal. 110:​3, NWT) To oi be ḡau haida ese e koumumu a? So uramu haroro ḡaukara ba habadaia badina asi dibamu dahaka be varamu, a? Eiava oi ese asainmen ta o dadaraia badina o laloamu basio karaia namonamomu, a? Ma haida danu unu e lalo tomava.

² Mareko bona Timoteo mani aita lalodia. Ena be idia na asi dibadia edia mauri ai dahaka baine vara, o reana e lalova idia na asi aonegadia, to dounu idia ese Iehova e abia hidi. Mareko na sinana ida ruma namona ta ai e nohova. Una neganai, aposetolo Paulo bona Banaba ese Mareko e noia baela gabu daudauna ai bae ha haroro. (Apos. 12:​12, 13, 25) Mareko na ena ruma namona e rakatania, ena haroro ḡaukara baine habadaia totona. Ginigunana be ia na Antioka ela. Bena Paulo bona Banaba e bamodia gabu daudaudia ma haida ela. (Apos. 13:​1-5) Timoteo danu reana tamana bona sinana ida e nohova neganai, Paulo ese e noia haroro ḡaukara bae karaia hebou. Timoteo na mero dainai reana bema gwau diba ia na dia heḡereḡere Paulo baine bamoa. (1 Korinto 16:​10, 11 bona 1 Timoteo 4:12 ba haheḡereḡeredia.) To, ia ese Paulo ena noinoi e abia dae bona Iehova e hesiai heniava lalonai hahenamo momo e moalelai.—Apos. 16:​3-5.

3. (a) Edena dala ai Paulo ese e hahedinaraia ia ese Mareko bona Timoteo na e lalodia badava? (2 Timoteo 4:​6, 9, 11) (Laulau danu ba itadia.) (b) Ina stadi lalonai ededia henanadai baita haerelaimu?

³ Mareko bona Timoteo na matamata, to kongrigeisin lalonai maduna idauidau ihuadia daladia e diba. Paulo ese unu memero na e lalodia badava, badina gabeai ena mase negana e kahirakahira neganai e noidia idia na ia badibadinai bae noho. (2 Timoteo 4:​6, 9, 11 ba duahidia.) Dahaka dainai Paulo ese Mareko bona Timoteo na e lalodia badava? Tadikaka matamatadia ese Mareko bona Timoteo be ede bae tohotohodia tomamu? Bona Paulo ena sisiba ese hari ina negai tadikaka be ede baine durudia toma?

MAREKO HEḠEREḠERENA MAI MOALEMU IDA HESIAI ḠAUKARA BA KARAIA

4-5. Edena dala ai Mareko ese e hahedinaraia ia na mai moalena ida ma haida isiaidia e lao heniva?

⁴ Ma haida isiaidia ba lao heni anina na ba ḡaukara goada idia ba durudia, bona dounu ba durudia ena be unu ba kara toma na auka. Mareko na haheitalai namona. Paulo na ena misinari loaloa iharuana ai ia na se ura Mareko baine hakaua neganai, reana Mareko na e lalo hisihisi. (Apos. 15:​37, 38) To Mareko ese ena tadikaka bona taihu isiaidia ilao henina karana na se hadokoa.

⁵ Mareko na ena kasen Banaba ida gabu ma ta ela. Laḡani 11 muridiai, Roma ai Paulo na dibura ruma ai e nohova, una neganai unuseni ai Paulo e duruava taudia ta na Mareko. (File. 23, 24) Paulo ese Mareko ena kara na e moalelaia bada, badina ia ese Mareko na ini e herevalaia toma, eto, “ia ese lau e durugu bona e hagoadagu bada.”—Kol. 4:​10, 11, NWT.

6. Mareko be lo tadikakadia ibamodia karana amo dahaka namo e davari? (Futnout ba itaia.)

⁶ Mareko na lo tadikakadia ibamodia karana amo ḡau namodia momo e diba. Roma ai ia ese Paulo e bamoa, una murinai Babulono ai ia na aposetolo Petro ida e ḡaukara hebou. Idia na tura namo hereadia ai ela, badina Petro ese e gwauraia “Natugu Mareko.” (1 Pet. 5:13) Reana Petro ese Iesu ena mauri bona haroro ḡaukara sivaraidia na mero maraḡina Mareko enai e gwauraiva, badina gabeai Mareko ese unu sivarai na ena buka lalodiai e tore.a

7. Tadikaka matamatana Sen-Wu ese Mareko be ede e tohotohoa toma? (Laulau danu ba itaia.)

⁷ Mareko na Iehova ena hesiai ḡaukara lalonai e bisiva bona ia na tadikaka badadia e bamodia hanaihanaiva. Oi ese Mareko be ede ba tohotohoa toma? Reana o uramu ministerial servant ai baola. Eiava o uramu elda tauna ai baola. To unu maduna na do so abi. Bema unu bamona, basio lalo manoka. To nega iboudiai dala ma haida ba tahu Iehova bona kongrigeisin isiaidia ba lao heni. Elda tadikakana ta Sen-Wub mani aita herevalaia. Nega momo ia na e urava ena uru tadikakadia ida baine heḡereḡere. Elda ese unu tadikaka haida na kongrigeisin ḡaukaradia e henidiava, a Sen-Wu be lasi. Una dainai, Sen-Wu na se moale bona gabeai ena lalo hisihisi na elda ediai e herevalaia. Elda ta ese ia na e hagoadaia dala idauidau ai ma haida baine durudia, ena be nega haida unu e heduru tomamu na ma haida ese se itaiamu. Sen-Wu na una sisiba e badinaia, bona ia ese burukadia bona ma haida na ena motuka amo e laohaidiava hebou. Ia ese una nega na ini e herevalaia toma, eto, “Ma haida isiaidia ilao henina karana anina na hari vada name lalopararalaia. Lau na na moale badamu badina ma haida na durudiamu.”

TIMOTEO HEḠEREḠERENA MA HAIDA BA LALOKAU HENIDIA

8. Dahaka dainai Paulo ese Timoteo e abia hidi ia baine bamoa? (Filipi 2:​19-22)

⁸ Paulo na e urava ena loaloa lalonai se gariva taudia ese ia bae bamoa. Badina ia ese be lou heniamu hanuana taudia ese guna ia na e daḡedaḡe henia. Matamanai Paulo na Sila e abia hidi ia baine bamoa, badina Sila na laḡani momo Iehova e hesiai henia. (Apos. 15:​22, 40) Gabeai, Paulo na Timoteo e abia hidi ia baine bamoa. Dahaka dainai Timoteo e abia hidi? Badina ta na Timoteo ena kongrigeisin tadikakadia na e gwauva ia na tau namona. (Apos. 16:​1, 2) Danu, Timoteo na e ura dikadikava taunimanima baine durudia o baine reḡudia namonamo.—Filipi 2:​19-22 ba duahidia.

9. Ede ta diba tomamu Timoteo ese ena tadikaka bona taihu na e lalokau henidiava?

⁹ Timoteo na Paulo e bamoa dinana ginigunana amo ia na e hahedinaraiava ia ese ma haida na e lalokau henidiava. Una dainai, Paulo ese Timoteo na Berea ai e rakatania. Badina dibana Timoteo ese unuseniai tadikaka bona taihu matamatadia na be durudiamu. (Apos. 17:​13, 14) Una neganai, reana Timoteo na Berea ai e nohova tadikakana Sila, ena amo ḡau namodia momo e diba. To gabeai danu Paulo ese Timoteo sibona e siaia Tesalonika kongrigeisin taudia baine hagoadadia. (1 Tes. 3:2) Danu, Baibul ese e hahedinaraiamu laḡani momo lalodiai Timoteo na ‘e taitaiva taudia ida danu e taiva.’ (Roma 12:15; 2 Tim. 1:4) Ia ese hisihisi taudia na e bogadia hisiva. Tadikaka matamatadia ese Timoteo be ede bae tohotohoa toma?

10. Tadikaka Wu Jay ese ma haida ilalokau henidia karana be ede e hahedinaraia toma?

¹⁰ Tadikaka ta ladana Wu Jayc na ma haida ilalokau henidia karana e dibaia. Ia do matamatana ai, e gariva lo tadikakadia baine hereva henidia. Una dainai, ia na Kingdom Hall ai hahenamo herevana tamona mo e gwauraiava bena e raka ohova. Elda ta ese Wu Jay e hamaoroa eto, “Emu tadikaka taihu ida ba herevahereva dalana ta na oi ese idia o lalokau henidiamu badina ta ba herevalaia.” Elda ese danu ia ma e hamaoroa, eto, “Namona na tadikaka taihu edia ura ḡaudia danu ba diba.” Wu Jay ese una elda ena sisiba na e badinaia. Hari, Wu Jay na elda tauna ta bona ini e gwa toma, “Hari lau na asi garigu ida taunimanima idauidau ida na herevaherevamu. Lau na na moalemu badina taunimanima ma haida edia mauri na lalopararalai namonamomu. Bona hari lau na vada mai dibagu tadikaka edia ura ḡaudia be dahaka bona ede baina durudia toma.”

11. Tadikaka matamatadia ese edia kongrigeisin taudia ilalokau henidia karadia be ede bae hahedinarai toma? (Laulau danu ba itaia.)

¹¹ Umui tadikaka matamatamui, umui ese ma haida ilalokau henidia karana be ede ba hahedinaraia toma? Hebou gabudia o laomu negadiai, taunimanima badadia bona maraḡidia ida ba herevahereva. Idia ba nanadaidia baoto, ‘Emu mauri be ede bamona?’ Bena edia sivarai ba kamonai namonamo, unu amo oi na idia idurudia daladia bo dibamu. Heḡereḡere, reana burukana ta ena hereva amo bo kamonaimu ia na e uramu JW Library app iḡaukaralaina dalana baine dibaia. Eiava reana ena hereva amo bo dibamu haroro ḡaukara ai ia na ta ese basine bamoamu. Taunimanima unu bamodia be ede bo durudia tomamu? Edia fon o tablet ai JW Library app iḡaukaralaina ba hadibadia. Eiava haroro ḡaukara ai oi ese idia ba bamodia. Unu dala idauidau ai emu tadikaka bo durudiamu neganai, kongrigeisin ai oi na haheitalai namona bo hahedinaraiamu.

PAULO ENA SISIBA ESE OI BAINE DURUMU DIBA

12. Paulo ena sisiba ese tadikaka be ede baine durudia toma?

¹² Timoteo na Paulo ena sisiba namona e badinaia dainai, ia ese ena mauri e moalelaiava bona Dirava ena hesiai ḡaukara e karaia namonamova. (1 Tim. 1:18; 2 Tim. 4:5) Paulo ena sisiba ese umui tadikaka matamatadia be ede baine durumui toma? Paulo ese revareva rua na Timoteo e tore henia. Namona na unu revareva ba duahidia bona ba itaia edena sisiba be emu mauri ai ba badinaia diba. Mani haheitalai haida aita herevalai.

13. Dirava baita badinaia bona baita lalokau henia totona dahaka baita kara be namo?

¹³ “Dirava ibadinana mo ba goadalaia.” (2 Tim. 4:7b) Dirava baita badinaia anina be dahaka? Anina na ita na ia turana ai baitala, bona ia ese e moalelaimu karadia baita kara. To Dirava baita badinaia bona baita lalokau henia totona, dahaka baita kara be namo? Paulo ese ina hereva “goadalaia” e ḡaukaralaia neganai, ia na gadara tauna ta e laloa. Badina gadara tauna ta na e treinin goadagoadamu kompatisin ai baine vareai totona. To namona na gadara tauna ese kara namodia haida baine goadalai be namo. Unu amo gabeai ia na be kwalimu dibamu. Ita danu kara namodia baita goadalai, unu amo ita na Iehova baita hetura henia hanaihanaimu.

14. Dahaka dainai oi ese hanaihanai Baibul o duahiamu? Haheitalai ta ba gwauraia.

¹⁴ Dina ta ta ai oi ese Baibul o duahiamu badina o dibamu una ese oi na be durumumu Iehova bo hetura henia hanaihanaimu. Heḡereḡere, oi na Baibul ai taḡa tauna ta sivaraina o duahiamu. (Mar. 10:​17-22) Taḡa tauna na e abia daeva Iesu na Mesia. To ena abidadama na dia heḡereḡere Iesu murinai baine raka. Ena be ena abidadama na manoka, to Iesu ese una taḡa tauna na e “lalokau henia.” Badina ia na manau dalana ai una taḡa tauna e hereva henia. Momokani, Iesu na e urava una taḡa tauna na ena mauri baine moalelaia bona Dirava baine hesiai henia. Danu Iesu na dibana una taḡa tauna na Iehova ese e lalokau heniava. (Ioa. 14:9) Oi ese ina sivarai bona emu noho dalana o laloamu neganai, sibomu ini ba henanadai toma, ‘Lau be dahaka baina kara Iehova turana ai bainala bona ma haida isiaidia baina lao heni?’

15. Dahaka dainai tadikaka matamatadia ese haheitalai namona bae hahedinarai na namo? Haheitalai ta ba gwauraia. (1 Timoteo 4:​12, 13)

¹⁵ “Abidadama taudia vairadiai oi ese haheitalai namona ba hahedinaraia.” (1 Timoteo 4:​12, 13 ba duahidia.) Paulo ese Timoteo e hagoadaia buka iduahina tauna bona hahediba tauna namona ai bainela. To dahaka dainai Paulo ese danu Timoteo e hagoadaia lalokau, abidadama bona kara ḡoevadia baine hahedinarai? Badina ta ena kara ese ena hereva e hereaiamu. Elda na oi be abimu hidimu hebou ai tok ta ba heni bona emu tok lalonai oi na iseda haroro ḡaukara baita habadaia dalana bo herevalaiamu. Bema oi na haroro ḡaukara o goadalaiamu tauna, oi na asi hemaraimu ida tok bo henimu. Bona emu tok e kamonaiamu taudia ese emu hereva na be badinaiamu. Badina e itaiamu oi na o haroro goadagoadamu.—1 Tim. 3:13.

16. (a) Tadikaka be ededia dala faiv ai haheitalai namona bae hahedinaraia diba? (b) Tadikaka ese ededia dala ai ena “hereva ai” haheitalai namona baine hahedinaraia?

¹⁶ Oi ese 1 Timoteo 4:12 ai ome itaia Paulo ese tadikaka e hagoadaia namona na ena hereva, kara, lalokau, abidadama bona kara ḡoeva ai haheitalai namona baine hahedinaraia. Namona na nega bavato unu kara iboudiai 5 ba stadilaidia. Heḡereḡere, oi na o uramu emu hereva ai haheitalai namona ba hahedinaraia. Oi be o laloamu edena hereva amo ma haida ba hagoadadia diba? Bema oi na doini tamamu sinamu edia ruma ai o nohomu, nega momo oi ese idia o tenkiu henidiamu badina oi e narimumu, a? Hebou muridiai ai oi ese tadikaka ta o taihu ta ba tenkiu henia badina iena tok o ura henia, a? Bona oi danu ba hekwarahi hebou ai emu hereva dalanai haere ba heni. Bema emu hereva ai haheitalai namona bo hahedinaraiamu, anina na oi ese emu goada na taunimanima iboudiai vairadiai o hahedinaraiamu.—1 Tim. 4:15.

17. Bema tadikaka ta na e uramu Iehova ena hesiai ḡaukara baine habadaia, dahaka baine kara be namo? (2 Timoteo 2:22)

¹⁷ “Uhau edia lebulebu karadia ba heautani. Ini na ba ḡava: kara maoromaoro.” (2 Timoteo 2:22 ba duahia.) Paulo ese Timoteo e hagoadaia “lebulebu karadia” o ura idauidau amo baine heau siri. Badina dia namo unu ura daidiai ia ese Iehova ena hesiai ḡaukara baine ha maraḡia o Iehova e hetura heniamu karana baine hadikaia. Reana oi danu o itaiamu moale karadia ai nega bada o ḡaukaralaiamu dainai, emu nega na dia heḡereḡere Iehova ena hesiai ḡaukara ma haida ba kara totona. Heḡereḡere, mani a laloa oi be hora hida o halusimu sports, internet o video games ai. Bema namo oi ese una hora ba haria unu amo hora haida ba ḡaukaralai Iehova bona ma haida ba hesiai henidia totona, a? Reana oi ese emu Kingdom Hall ihanamona ḡaukarana ba durua diba o emu kongrigeisin ena troly haroro ḡaukarana ba durua. Bema oi na ḡaukara unu bamodia lalodiai bo vareaimu oi ese turamu namodia bo davaridiamu bona idia ese oi be hagoadamumu Iehova ena hesiai ḡaukara ma haida bo karamu.

MA HAIDA IHESIAI HENIDIA NA MAI ENA HAHENAMO

18. Dahaka dainai baita gwau diba Mareko bona Timoteo ese moale bada e davaria?

¹⁸ Mareko bona Timoteo na edia mauri ai senisi momo e kara unu amo ma haida e hesiai henidia. Idia na unu e kara toma dainai moale bada e davari. (Apos. 20:35) Mareko be gabu daudaudia momo herea ela ena tadikaka bona taihu baine durudia totona. Danu ia ese Iesu ena mauri bona haroro ḡaukara sivaraidia e tore. Timoteo be Paulo e durua kongrigeisin matamatadia e hagini, bona ena tadikaka bona taihu e hagoadadiava. Momokani Mareko bona Timoteo edia kara daidiai Iehova na e moale.

19. Dahaka dainai tadikaka ese Paulo ena sisiba bae badinaia na namo? Bona tadikaka na unu be kara tomamu neganai dahaka namo be davarimu?

¹⁹ Paulo ese ena leta ruaosi lalodia ai e tore herevadia amo ta itamu ia ese Timoteo na e lalokau henia badava. Danu unu leta ese e hahedinaraimu Iehova ese oi tadikaka o mero na e lalokau henimumu. Ia na e uramu oi ese emu hesiai ḡaukara na ba moalelaia. Una dainai ba hekwarahi Paulo ena sisiba ba badinaia, bona ma haida isiaidia ba lao heni. Bema unu bo kara tomamu hari ina negai emu mauri bo moalelaiamu bona vaira negana ai ‘mauri korikorina bo abiamu.’—1 Tim. 6:​18, 19.