Iehova E Badinaiamu Taudia Na E Moalemu

1-2. (a) Gavamani haida ese Iehova ena taunimanima be ede e tomadiamu, to iena taunimanima be dahaka e karamu? (b) Edena dalai daḡedaḡe ese moale baine havaraia diba? (Rau 1 laulauna ba herevalaia danu.)

HARI ina negai, tanobada heḡeḡemadai tano 30 mai kahana lalodiai eda ḡaukara na e taravatu eiava e koua. Unu tano haida ai, siahu taudia ese tadikaka taihu na e hadiburadia. Idia be dahaka kerere e kara? Iehova vairanai idia na ḡau ta asie karaia kerere. Idia ese e karaia ḡauna na, Baibul e duahia bona e stadilaia, e abi daemu ḡaudia na ma haida e hadibalaidia, bona tadikakadia ida e hebou. Danu asie ura politikol karadia lalodiai bae vareai. Ena be daḡedaḡe bada herea e davari, to unu abidadama tadikakadia ese dounu Dirava na e badinaiab​—anina na idia ese Iehova mo e tomadiho heniamu. Bona una dainai e moalemu!

² Momokani, reana unu abidadama tadikaka taihu e kiri laulaudia na vada o ita. E moalemu badina mai dibadia Iehova vairanai kara maorona e badinaia dainai Ia ese e moale henidiamu. (1 Sis. 29:17a) Iesu na e gwa: “Kara maoromaoro daidiai e daḡedaḡe henidia taudia be nanamo. . . . Ba moale, ba moale hisi dae, badina be guba ai davamui baine bada.”​—Mat. 5:10-12.

ITA IDURUDA HAHEITALAINA

3. Aposetolo Edia Kara 4:19, 20 heḡereḡerena, Kristen ginigunadia edia negai daḡedaḡe e vara neganai, aposetolo taudia be dahaka e kara, bona dahaka dainai?

³ Eda tadikaka taihu ese e haheaukalaimu hekwakwanaidia na Iesu ena aposetolo ese e haheaukalai hekwakwanaidia heḡereḡeredia, badina idia ese Iesu sivaraina e harorolaiava. Iuda edia kaunsil ena hahemaoro taudia ese e oda henidia loulou “Iesu ladana ai basie hahediba.” (Apos. 4:18; 5:27, 28, 40) Aposetolo taudia be dahaka e kara? (Aposetolo Edia Kara 4:19, 20 ba duahi.) Idia na mai dibadia siahu herea tauna ta ena oda dainai taunimanima vairadiai Iesu Keriso bae “harorolaia,” bona bae “gwauraia hedinarai.” (Apos. 10:42) Una dainai, idia edia gwaukau taudia, Petro bona Ioane, na mai edia goada ida unu hahemaoro taudia e hamaorodia, Dirava ena haheḡani baia badinaia to dia umui emui haheḡani, bona e gwa Iesu sivaraina na dounu baia harorolaia. Idia na vaitani bema gwau, ‘O laloamu umui emui haheḡani ese Dirava ena haheḡani e hereaia, a?’

4. Aposetolo Edia Kara 5:27-29 heḡereḡerena, Kristen taudia iboudiai ediai aposetolo taudia be edena haheitalai e hahedinaraia, bona ede baita badinaia diba toma?

⁴ Unu aposetolo taudia ese haheitalai namona e hahedinaraia, una nega amo ema bona hari Kristen taudia momokanidia ese e badinaiamu, “Dirava ikamonai-henina be namo; taunimanima ikamonai-henidia be dika.” (Aposetolo Edia Kara 5:27-29 ba duahi.) Aposetolo taudia na Dirava e badinaia dainai, e dadabadia bena Iuda edia kaunsil e rakatania neganai, e moale “badina be Iesu ladana bagunai hisi e ani” bona dounu e harorova!​—Apos. 5:40-42.

5. Ededia henanadai baita haerelai na namo?

⁵ Aposetolo ese e hahedinaraia haheitalaina dainai, henanadai haida e hedinarai. Heḡereḡere, edena dalai aposetolo ese Dirava bae kamonai henia a taunimanima basie kamonai henidia bona nega tamona Baibul ena haheḡani, “lohia bae matauraidia” karana bae badinaia? (Roma 13:1) Edena dalai ita ese aposetolo Paulo ena hereva, “hahemaoro taudia bona siahu taudia” baita matauraidia, bona dounu Dirava, eda Lohia badana baita badinaia?​—Tito 3:1.

“LOHIA TAUDIA”

6. (a) Roma 13:1 ese e gwaurai “lohia taudia” be daidia, bona eda maduna idia ediai be dahaka? (b) Hari ina negai e lohiamu taudia edia siahu be ede bamona?

⁶ Roma 13:1 ba duahia. Ina siri ai, ina hereva “lohia” na mai edia siahu o maoro taunimanima bae lohiadia taudia e herevalaidiamu. Kristen taudia ese unu lohia taudia bae matauraidia na maoro. Idia ese taunimanima e haḡanidiamu taravatu bae badina, bona ibadinadia daladia e haheḡanilaimu, bona nega haida idia ese Iehova ena taunimanima e durudiamu. (Apok. 12:16) Una dainai, ita na e haḡanidamu idia ese bae gwaurai tax monidia baita heni, baita gari henidia, bona baita matauraidia. (Roma 13:7) To, unu gavamani na e lohiamu badina Iehova ese maoro e henidia dainai. Roma Gavanana Pontio Pilato ese Iesu e hakotaia neganai, una na e hahedinaraia. Ia ese Iesu e hamaoroa ia na mai siahuna baine ruhaia eiava baine hamasea neganai, Iesu na e gwa: “Atai amo siahu basinema henimu, asi emu siahu boma noho.” (Ioa. 19:11) Pilato heḡereḡerena, hari ina negai e lohiamu taudia bona politikol taudia edia siahu na mai hetoana.

7. Ededia negai lohia taudia basita badinadia, bona idia be dahaka bae diba na namo?

⁷ Kristen taudia ese gavamani edia taravatu na e badinamu, bema unu taravatu ese Dirava ena taravatu na asie utumu. To, taunimanima na basita badinadia bema bae haḡanida Dirava ena taravatu baita utua eiava bae kouda Dirava ena haheḡani basita badina. Heḡereḡere, gavamani na baine ura tauhau iboudiai na edia tano dainai bae tuari.c Eiava eda Baibul, Baibul pablikeisindia bae taravatudia, bona bae kouda basita haroro bona basita hebou. Bema lohia taudia ese edia siahu bae ḡaukaralai kerere, heḡereḡere Keriso ena hahediba bae daḡedaḡe henidia, idia na Dirava ese be hahemaoro henidiamu. Iehova ese na e itadiamu!​—Koh. 5:8.

8. Ini hereva “hereadae” bona “herea mikamika” edia idau be dahaka, bona dahaka dainai una na mai anina bada?

⁸ Ina hereva, “hereadae” anina na “namo herea, bada herea, eiava atai herea dagina.” To anina na dia “namo herea momokani, bada herea momokani, eiava atai herea momokani dagina.” Una ese ina hereva “herea mikamika” e hahedinaraia. Ena be taunimanima edia gavamani na e gwauraidia “lohia [o siahu] taudia,” to idia daediai na atai herea momokani lohiana ta​—herea mikamika e nohomu. Baibul ai nega hani Iehova Dirava na e gwauraia, “Herea Mikamika Diravana.”​—Dan. 7:18, 22, 25, 27.

“HEREA MIKAMIKA DIRAVANA”

9. Peroveta tauna Daniel ese mata-hanai ai dahaka e ita?

⁹ Peroveta tauna Daniel ese e itaia mata-hanaina lalonai, Iehova na herea mikamika lohia iboudiai daediai. Mata-hanai lalonai Daniel ese mauri ḡaudia badadia hani e itadia, idia ese basileia badadia​—Babulono, Mede-Parasa, Greece, Roma, bona hari ina negai e lohiamu basileiana Anglo-America​—e laulaulaidia. (Dan. 7:1-3, 17) Bena Daniel ese Iehova Dirava na ena terono gubai ai helai na e itaia. (Dan. 7:9, 10) Una abidadama peroveta tauna ese gabeai e itaia ḡauna ese hari e lohiamu taudia na ḡau ta baine hadibadia na namo.

10. Daniel 7:13, 14, 27 heḡereḡerena, Iehova ese tanobada ilohiana siahuna be daidia e henidia, bona una ese dahaka e hamomokaniamu?

¹⁰ Daniel 7:13, 14, 27 ba duahi. Dirava ese taunimanima bae lohiadia ena siahu ibounai na taunimanima e lohiadiamu taudia iboudiai edia amo e kokia bena mai edia maoro eiava mai edia siahu lohia taudia ma haida e henidia. Daidia e henidia? Ia ese “taunimanima natuna” Iesu Keriso, bona “Herea Mikamika Diravana ena helaḡa taudia” 144,000, bae lohia “hanaihanai” taudia, e henidia. (Dan. 7:18) E hahedinaraia ḡoevaḡoevamu, Iehova na “Herea Mikamika Diravana” badina ia sibona na mai ena siahu unu baine kara toma diba.

11. Daniel be dahaka danu e herevalai, una ese Iehova ena herea mikamika karana e hahedinaraia?

¹¹ Daniel ese mata-hanai ai e ita ḡaudia ese guna e gwauraia ḡauna e hamomokania. Daniel na e gwa, “guba Diravana” ese “hanua pavapavadia e abidia ohomu bona e haginidiamu.” Bona ma eto: “Hereva Mikamika Diravana ese taunimanima edia basileia e lohiaiamu, bona e uramu baine henia tauna na e heniamu.” (Dan. 2:19-21; 4:17) Nega ta Iehova ese da lohia taudia e kokidia eiava e haginidia, a? Oibe!

12. Iehova ese guna pavapava na edia terono amo e kokidia haheitalaina ta a gwaurai. (Laulau ba itaia)

¹² Iehova ese e hahedinaraia ḡoevaḡoeva, ia na herea mikamika Diravana. Mani haheitalai toi aita lalodia. Aigupto ena Farao ese Iehova ena taunimanima na hesiai taudia ai e halaodia bona se urava baine siaidia. To, Dirava ese e ruhadia bona Farao na Davara Kakakakana ai e hamaloaia. (Eso. 14:26-28; Sal. 136:15) King Belesasara, Babulono pavapavana na aria ta e karaia bona sibona e heabi isi, silva bona golo amo e karadia diravadia e imodaidia, to dia Iehova. (Dan. 5:22, 23) To, Dirava ese una hekokoroku tauna na e hamanaua. “Una hanuaboi” ai, Belesasara na e hamasea bona ena basileia na Mede bona Parasa taudia e henidia. (Dan. 5:28, 30, 31) Palestine e lohiaiava tauna, King Herod Agripa Ginigunana ese aposetolo Iakobo e hamasea bona aposetolo Petro na e hadiburaia, badina e urava ia danu baine hamasea. To, Iehova ese Herod na e koua ena palani basine haḡuḡurua. “Lohiabada ena aneru ta ese e huaria” bena e mase.​—Apos. 12:1-5, 21-23.

13. Iehova ese e ḡaukara hebouva pavapavadia e hadareredia haheitalaina ta a gwauraia.

¹³ Iehova ese danu e ḡaukara hebouva lohiadia ediai e hahedinaraia, ia sibona na herea mikamika. Ia na Israel daidiai e tuari, e durudia bena e ḡaukara hebouva Kanaan pavapavadia 31 e hamasedia bona Gwauhamata Tanona kahana badana e abia. (Ios. 11:4-6, 20; 12:1, 7, 24) Iehova ese danu King Ben-hadad bona Suria pavapavadia 32 e tuari henidia bona e hamasedia.​—1 Han. 20:1, 26-29.

14-15. (a) King Nebukadnesara bona King Darauese ese Iehova ena lohia siahuna be ede e herevalaia toma? (b) Salamo itorena tauna ese Iehova bona ena bese be ede e herevalaidia toma?

¹⁴ Iehova na hanaihanai e hamomokaniava Ia na Herea Mikamika Diravana! Babulono pavapavana, King Nebukadnesara ese ena siahu, ena goada, bona ena pavapava hairaina e heaḡilaia to Iehova se imodaia neganai, Dirava ese e hakavakavaia. Nebukadnesara e namo lou murinai, ia ese “Herea Mikamika Diravana” e hanamoa bona e gwa, Iehova ena lohia “siahuna na mia hanaihanai siahuna.” Bona ia na ma e gwa: “Ta ese ia imana basine laoa ahu diba.” (Dan. 4:30, 33-35) Daniel ena Dirava ibadinana karana e tohoa bona Iehova ese leona kohuana amo e hamauria murinai, King Darauese na e haheḡani e gwa: “Taunimanima na bae heude-heude bona bae gari, Daniel ena Dirava vairanai. Badina be ia na mauri Diravana, e mauri hanaihanaimu; ena basileia na basie habuaia tari ela bona hanaihanai, ena siahu na baine hesiriu ela bona dokona.”​—Dan. 6:7-10, 19-22, 26, 27.

¹⁵ Salamo itorena tauna na e gwa: “Iehova ese bese idau-idau edia henega e hakarohodiamu, orea idau-idau edia lalo-hadai ia ese e laodia ahumu.” Bona e gwa: “Iehova na ena Dirava ai e halaoamu besena be namo; vada e abidia hidi ia dihina ai baela taudia be nanamo.” (Sal. 33:10, 12) Badi namo hereana ta dainai, Iehova baita badinaia na ḡau badana!

BE VARAMU ḠAUNA GINIGABENA

16. Hisihisi badana be varamu neganai ta diba momokanimu dahaka be varamu bona dahaka dainai? (Laulau ba itaia)

¹⁶ Ita ese Iehova guna e kara ḡaudia na da tame duahi. Vaira negai be dahaka be varamu? Ta diba momokanimu Iehova ese ena abidadama hesiai taudia na ‘hisi bada-hereana’ o hisihisi badana be varamu neganai be hamauridiamu. (Mat. 24:21; Dan. 12:1) Una na Gog, Magog tauna eiava tanobada besedia iboudiai be heboumu bena Iehova e abidadama heniamu taudia be tuari henidiamu neganai, be varamu. Ena be unu tanobada besedia na United Nations ena memba besedia 193 iboudiai, to Herea Mikamika Diravana bona ena guba tuari oreana ediai idia na ḡau ta lasi! Iehova na e gwauhamata: “Unu amo egu herea-dae bona egu helaḡa baina hahedinaraidia, bona bese momo vairadiai sibogu baine hahedinarai. Bena idia bae diba lau na Iehova.”​—Ese. 38:14-16, 23; Sal. 46:10.

17. Baibul ese vaira negana ai tanobada pavapavadia ediai bona Iehova e badinaiamu taudia ediai be varamu ḡaudia be ede e herevalai toma?

¹⁷ Gog ese Iehova ena taunimanima be hahisidiamu neganai, una ese Aramagedono tuarina be havaraiamu, una neganai Iehova ese be karaiamu ḡauna ginigabena na, “tanobada idoinai hanua hanua pavapavadia” iboudiai be haorediamu. (Apok. 16:14, 16; 19:19-21) To, “kara maoromaoro taudia [mo] na tano bae noholaia, bona lalo-maoromaoro taudia [mo] na ia lalonai bae noho.”​—Her. 2:21.

DIRAVA BAITA BADINAIA HANAIHANAI

18. Kristen taudia momokanidia momo be e uramu dahaka bae kara, bona dahaka dainai? (Daniel 3:28)

¹⁸ Laḡani momo herea lalodiai, Kristen taudia momokanidia momo ese edia ura kwalimu bona edia mauri na, Iehova e lalokau henia bona e abia dae Ia ese baine lohiadia na maoro dainai e haboiodia. Idia na Heberu memero tatoi, Herea Mikamika Diravana ese edia abidadama dainai lahi siahu hereana amo e hamauridia taudia heḡereḡeredia.​—Daniel 3:28 ba duahia.

19. Edena badi dainai Iehova ese ena taunimanima be hahemaoro henidiamu, una dainai hari ina negai dahaka baita kara na namo?

¹⁹ Salamo itorena tauna David ese dahaka dainai Dirava baita badinaia na mai anina bada e herevalaia neganai, e gwa: “Iehova ese bese idau-idau e hahemaoro henidiamu: Iehova e, egu kara maoromaoro bona egu lalo-ḡoevaḡoeva heḡereḡeredia ba hahemaoro henigu.” (Sal. 7:8) David na ma e gwa: “Kara momokani bona kara maoromaoro ese bae hamaurigu.” (Sal. 25:21) Mauri dalana hereadaena na, Iehova mo baita abidadama henia bona baita badinaia hanaihanai, herevana eda mauri ai dahaka baine vara! Bena ita na salamo itorena tauna ena hemami heḡereḡerena baita gwa diba: “Asi edia kerere e rakamu . . . [o Iehova e badinaiamu taudia], Iehova ena taravatu ai rakamu taudia, idia na nanamo.”​—Sal. 119:1.