Deteronom
32 “Ekoute, A lesiel, ek mo pou koze,
Ek ki later ekout bann parol mo labous.
2 Mo lansegnman pou tonbe kouma lapli;
Mo bann parol pou koule gout-a-gout kouma laroze,
Parey kouma ti lapli lor lerb
Ek parey kouma gro lapli lor bann plant.
3 Mo pou proklam nom Zeova.
Koz lor grander nou Bondie!
4 Sa Gran Ros la, so bann aksion parfe,
Parski tou so bann sime zot drwat.
Enn Bondie fidelite ki zame pa inzis;
Li zis ek drwat.
5 Se zot ki’nn azir dan enn fason koronpi.
Zot pa so bann zanfan, zot ki ena defo.
Zot enn zenerasion ki move ek ki pa fer seki drwat!
6 Eski se koumsa ki zot bizin tret Zeova,
A pep bet ek san sazes?
Eski li pa to Papa ki’nn kree twa,
Sa Kikenn ki’nn fer twa la ek ki’nn etabli twa solidman?
7 Rapel lepok lontan;
Reflesi lor bann ansien zenerasion.
Kestionn to papa, ek li pou rakont twa;
Kestionn to bann gran dimounn, ek zot pou dir twa.
8 Kan sa kikenn ki Pli Lao la ti donn bann nasion zot leritaz,
Kan li ti separ bann garson Adan* ar sakenn zot kamarad,
Li ti fixe frontier pou bann pep
Dapre kantite bann garson Izrael.
9 Parski Zeova so par se so pep;
Zakob se so leritaz.
10 Li ti trouv li dan enn landrwa dezer
Dan enn dezer ki vid kot bann zanimo sovaz irle.
Li ti antour li pou ki li an sekirite, ek li ti pran li swin,
Ek li ti protez li kouma so lagrin lizie.
11 Parey kouma enn leg ki montre so bann tipti anvole,
Ki plane lao so bann tipti,
Ki ouver so lezel an gran, ki pran zot,
Ki sarye zot lor bout so lezel,
12 Zis Zeova ki ti kontign gid li;*
Okenn bondie etranze pa ti avek li.
13 Li ti fer li pas lor bann plas bien ot lor later,
Pou ki li kapav manz seki gagne dan bann karo.
Li ti nouri li avek dimiel ki sorti dan ros
Ek delwil ki sorti dan enn ros ki dir,*
14 Diber ki fer ar dile vas ek dile ki gagne ar mouton,
Ansam avek bann pli bon* mouton,
Ek bann mouton mal ki sorti Basann ek bann bouk,
Ansam avek pli bon kalite* dible;
Ek to ti bwar divin ki’nn fer avek zi* rezin.
15 Kan Zesouroun* ti vinn gra, li ti donn koutpie ek li ti rebele.
To’nn vinn gra, to’nn vinn gro, to’nn gonfle.
Alor li ti abandonn Bondie, ki ti fer li,
Ek li ti mepriz sa Gran Ros ki sap li la.
16 Zot ti provok li ziska ki li ankoler akoz bann bondie etranze;
Zot ti ofans li avek bann kitsoz detestab.
17 Zot ti fer bann sakrifis ar bann demon, pa ar Bondie,
Bann bondie ki zot pa’nn kone,
Bann nouvo ki fek vini,
Bann bondie ki zot bann anset pa ti kone.
18 To ti bliye sa Gran Ros ki to papa la,
Ek to’nn bliye sa Bondie ki’nn anfant twa la.
19 Kan Zeova ti trouv sa, li ti rezet zot
Parski so bann garson ek so bann tifi ti ofans li.
20 Alor li ti dir, ‘Mo pou kasiet mo figir devan zot;
Mo pou gete ki pou ariv zot.
Parski zot enn zenerasion koronpi,
Bann garson ki pena okenn fidelite.
21 Zot ti provok mwa ziska ki mo ankoler avek* enn kitsoz ki pa enn bondie;
Zot ti ofans mwa avek zot bann zidol san valer.
Alor mo pou fer zot zalou avek seki pa enn pep;
Mo pou ofans zot avek enn nasion ki bet.
22 Parski mo koler inn alim enn dife
Ki pou brile ziska bann profonder Tom,*
Ek li pou bril later ek seki li prodir net
Ek li pou anflam fondasion bann montagn.
23 Mo pou fer zot gagn enn kantite maler;
Mo pou fini tou mo bann fles lor zot.
24 Zot pou bien fatige telman zot pou fin
Ek enn gro lafiev ek enn destriksion amer pou fini zot.
Mo pou avoy bann zanimo sovaz pou mord zot
Ek osi bann reptil ki ranpe dan lapousier ek ki ena venin.
25 Deor, lepe pou touy zot;
Andan, ena terer
Ki pou trap bann zenom ek bann vierz toule-de,
Ek bann ti-baba ek bann zom ki ena seve blan toule-de.
26 Mo ti pou dir: “Mo pou dispers zot;
Mo pou fer ki zot souvenir disparet parmi bann zom,”
27 Me mo per reaksion bann lennmi,
Parski bann adverser-la ti pou kapav mal interpret sa.
Zot ti pou kapav dir: “Nou’nn gagn laviktwar parski nou pwisan;
Se pa Zeova ki’nn fer tousala.”
28 Parski zot enn nasion ki pa reflesi,*
Ek pena lintelizans parmi zot.
29 Si selman zot ti saz! Zot ti pou medit lor la.
Zot ti pou reflesi lor seki ti pou ariv zot.
30 Kouma enn ti pou kapav pourswiv 1,000 dimounn,
Ek kouma de ti pou kapav fer 10,000 dimounn sove?
Si zot Gran Ros pa ti’nn vann bann-la ar zot
Ek si Zeova pa ti’nn livre bann-la dan zot lame.
31 Parski zot gran ros pa kouma nou Gran Ros,
Mem nou bann lennmi inn konpran sa.
32 Parski zot pie rezin sorti dan pie rezin Sodom
Ek lor bann teras Gomor.
Zot bann rezin se bann rezin anpwazone,
Zot bann grap rezin amer.
33 Zot divin se venin bann serpan,
Pwazon kriel bann kobra.
34 Eski pa’nn gard li kot mwa,
Bien sele dan mo stor?
35 Mwa ki pou tir vanzans ek mwa ki pou fer peye,
Dan moman ki’nn fixe zot lipie pou glise,
Parski zour zot destriksion bien pros,
Ek seki pe atann zot pou vini bien vit.’
36 Parski Zeova pou ziz so pep,
Ek li pou ena pitie* pou so bann serviter
Kan li pou trouve ki zot lafors inn diminie,
Ek ki res zis bann ki bizin led ek bann ki feb.
37 Lerla li pou dir, ‘Kot zot bann bondie,
Sa gran ros kot zot ti pe rod refiz la,
38 Ki ti abitie manz lagres zot bann sakrifis,
Bwar divin zot bann ofrand divin?
Ki bann-la leve ek vinn ed zot.
Ki bann-la vinn landrwa kot zot rod refiz.
39 Aster-la gete ki mwa—mo Bondie,
Ek pena okenn lezot bondie apart mwa.
Mo met amor ek mo donn lavi.
Mo fer gagn dimal ek mo geri,
Ek personn pa kapav sape dan mo lame.
40 Parski mo lev mo lame ver lesiel,
Ek mo fer serman: “Parey kouma mo viv pou touzour,”
41 Si mo fit mo lepe ki eklere
Ek mo prepar mo lame pou zizman,
Mo pou tir vanzans lor mo bann adverser
Ek mo pou fer bann ki ena laenn pou mwa peye.
42 Mo pou fer mo bann fles sou ar disan,
Ek mo lepe pou manz laser,
Avek disan bann ki’nn mor* ek bann ki an kaptivite,
Avek bann sef lennmi zot latet.’
43 Zot bann nasion, zot bizin dan lazwa avek so pep,
Parski li pou tir vanzans pou disan so bann serviter,
Ek li pou tir vanzans lor so bann adverser
Ek li pou pirifie pei so pep.”
44 Lerla Moiz ansam avek Ozea,* garson Noun, ti vini ek ti resit tou bann parol sa sante-la pou ki lepep tande. 45 Kan Moiz ti’nn fini dir tou sa bann parol-la ar tou Izrael, 46 li ti dir zot: “Pran aker tou bann parol ki ena dan sa lavertisman ki mo pe donn zot azordi la, pou ki zot kapav ordonn zot bann garson pou fer sir ki zot met an pratik tou bann parol ki ena dan sa Lalwa-la. 47 Parski sa bann parol-la, se pa bann parol ki pena valer, me se bann parol ki pou fer zot gagn lavi. Gras-a sa bann parol-la, zot pou kapav viv lontan dan pei ki zot pou al pran apre ki zot inn travers Zourdin.”
48 Sa mem zour-la, Zeova ti koz ar Moiz ek ti dir: 49 “Mont lor montagn Nebo, ki dan ranze bann montagn Abarim, ki dan pei Moab, anfas ar Zeriko, ek get pei Kanaan ki mo pe donn bann Izraelit pou pran. 50 Apre sa to pou mor lor sa montagn ki to pre pou al monte la, ek to pou al repoze avek to bann anset* parey kouma to frer Aaron ti mor lor Montagn Or ek ti al repoze avek so bann anset, 51 parski zot toule-de ti infidel anver mwa devan bann Izraelit kot bann delo Meriba, dan Kades, dan dezer Zinn, parski zot pa’nn sanktifie mwa devan pep Izrael. 52 To pou trouv pei-la delwin me to pa pou rant dan pei ki mo pe donn pep Izrael.”