Kestyon Bann Lekter

Ziska ki pwin bann restriksyon ki ena dan Lalwa Moiz lor maryaz ant bann manb mem fami aplike pu bann Kretyin dan nu lepok?

Lalwa ki Zeova ti donn nasyon Izrael pa donn buku detay lor bann seremoni maryaz ek bann fason fer. Me selman, li donn bann lalwa ki defann sertin maryaz ant bann manb fami ki pros. Par egzanp, dan Levitik 18:6-20, nu truv enn lalis bann relasyon ki ti defann, ki inplik “enn paran pros.” Sa pasaz la donn bann lezot ti detay kan li presize ki bann paran pros bizin pa gayn relasyon sexyel ant zot. Byinsir, bann Kretyin pa anba Lalwa Moiz, ni zot oblize swiv so bann komannman. (Efezyin 2:15; Kolosyin 2:14). Purtan, sa pa vedir ki bann Kretyin kapav inyor sa bann kitsoz la kan zot swazir kikenn pu marye. Anu gete kifer.

Pu kumanse, ena bann lalwa guvernman ki kontrol bann maryaz ant bann paran pros, ek normalman bann Kretyin oblize obeir bann lalwa dan peyi kot zot reste. (Matye 22:21; Romin 13:1). Byinsir, sak peyi ena so bann lalwa. Laplipar sa bann lalwa modern la pran sirtu an konsiderasyon bann problem zenetik. Nu tu kone ki kan de paran pros marye, ena buku risk ki zot zanfan gayn bann malformasyon uswa bann maladi zenetik. Alor, pu sa rezon la ek parski zot “sumet avek bann lotorite siperyer,” bann Kretyin ki pu marye, obeir sa bann lalwa lokal la.

Enn lot kitsoz ki nu bizin pran an konsiderasyon, se gete ki akseptab uswa pa akseptab dan kominote kot nu reste. Preske sak kiltir ena so bann regleman ek so bann kutim ki kondann maryaz ant bann dimunn ki pros par disan. Sa bann kalite maryaz la zot interdi, parski zot konsidere kuma linses. Mem si sa bann relasyon ki defann la varye dapre bann kiltir, enn ansiklopedi (The Encyclopædia Britannica) dir ki “an zeneral, plis lyin zenetik la pros ant de dimunn, plis linterdiksyon ki dekuraz relasyon sexyel ant zot la, li for.” Donk, mem si pena linses, bann Kretyin pale inyor bann kutim etabli uswa santiman bann dimunn dan zot kominote, pu ki kongregasyon Kretyin uswa non Bondye pa gayn repros.—2 Korintyin 6:3.

Nu bizin pa bliye usi konsyans ki Bondye finn donn nu. Tu bann dimunn finn ne avek enn sans pu konn seki bon ek seki pabon. (Romin 2:15) Dapre lord, zot konsyans dir zot seki normal ek konvenab ek seki pa natirel ek sokan, amwin ki li finn deforme uswa finn vinn insansib par bann pratik perverti. Zeova ti atir latansyon lor la kan li ti donn bann Izraelit so lalwa lor maryaz ant bann paran pros. Nu lir: “Zot bizin pa fer parey kuma peyi Lezip, la kot zot ti reste, ek zot bizin pa fer kuma peyi Kanaan, kot mo pe amenn zot ek zot bizin pa mars dapre zot bann lalwa.” (Levitik 18:3) Bann Kretyin atas buku valer ar zot konsyans ki baze lor Labib. Zot pa les li sali par manyer panse deforme ki bann nasyon ena lor seki byin ek seki mal.—Efezyin 4:17-19.

Donk, ki nu kapav dir an konklizyon? Mem si bann Kretyin pa anba Lalwa Moiz, zot konsyans dir zot klerman ki maryaz ant bann fami pros—parey kuma papa ek tifi, mama ek garson, frer ek ser—interdi parmi bann Kretyin.a Asterla, mem si lyin parante par disan la kapav elwayne, bann Kretyin rekonet ki zot bizin respekte bann lalwa ek bann regleman ki kontrol maryaz ek usi respekte seki akseptab dan kominote ek kiltir kot zot viv. Nu bizin pran tusala an konsiderasyon pu ki nu kapav respekte sa lord ki Labib done la: “Fode ki maryaz gard so loner devan tu dimunn.”—Ebre 13:4.

[Not anba paz]