Nu Tu Nu Bizin Felisitasyon

SA TIFI la ti pas enn bon lazurne. Mem si lezot zur li ti bizin koreksyon, sa zur la, li ti vremem fer bon tifi. Purtan, sa swar la, apre ki so mama finn fer li al dormi, li’nn tann li plore. Kan li’nn demann tifi la kifer li pe plore, tifi la finn dir li an larm: “Eski mo pa’nn fer bon tifi zordi?”

Sa kestyon la ti kuma enn kut kuto pu so mama. Li ti finn tuletan prese pu koriz so tifi. Me sa zur la, mem si li ti’nn remarke ki so tifi ti’nn fer zefor pu fer bon, mama la pa’nn dir omwin enn mo pu montre ki li ti apresye seki so tifi ti fer.

Pa zis bann tipti tifi ki bizin ki lezot felisit zot ek rasir zot. Nu tu nu bizin sa, parey kuma nu bizin konsey ek koreksyon.

Ki nu resanti kan nu gayn bann felisitasyon sinser? Eski li pa fer nu leker kontan ek fer nu pas enn bon lazurne? Kan kikenn felisit nu, nu santi ki ena kikenn ki interese avek nu, ki pran nu kont. Sa donn nu lasirans ki nu bann zefor pa dan vid, ek li pus nu pu travay dir pu lavenir. Li pa etonan ki suvan nu atire ar bann dimunn ki felisit nu sinserman ek ki pran letan pu ankuraz nu.—Proverb 15:23.

Zezi ti konpran linportans pu felisit lezot. Dan parabol bann talan, met la (ki reprezant Zezi limem) felisit sinserman tulede esklav fidel, kan li dir: “To’nn byin fer, esklav bon ek fidel!” Sa bann parol la vremem tusan! Mem si zot ti ena bann kapasite diferan ek ki zot ti arive fer diferan travay, zot ti’nn gayn mem kalite felisitasyon.—Matye 25:19-23.

Donk anu rapel mama sa tipti tifi la. Fode pa nu atann ki lezot plore pu nu felisit zot. Plito, nu kapav rod ban lokazyon pu felisit zot. Anplis, nu ena bann bon rezon pu felisit sinserman lezot dan tu lokazyon.