“Mo Finn Truv Tu Seki Mo Ti Bizin”

DAPRE enn rapor ki l’Organisation mondial de la santé inn fer, dan lemond ena apepre plis ki 120 milyon dimunn ki gayn depresyon. Sak lane, ena 1 milyon dimunn ki swisid zot ek ant 10 ek 20 milyon ki rod swisid zot. Ki led ena pu bann dimunn ki sufer akoz depresyon? Enn tretman medikal kapav sulaz zot. Li byin inportan usi ki zot gayn buku lafeksyon. Me apar sa, sertin ki pe resanti sa bann santiman la, inn gayn enn lot led byin pratik dan piblikasyon bann Temwin Zeova. Sa let ki sorti La France la, montre sa.

“Pa tro lontan, mo pa ti truv okenn rezon kifer mo bizin kontiyn viv. Mo ti priye Bondye pu Li les mwa mor. Mo ti kumadir inn fini mor andan momem. Mo ti’nn rod enn direksyon dan mo lavi ek mo’nn sipliy Zeova dan lapriyer pu ed mwa. Mo ti deside pu lir l’Annuaire des Témoins de Jéhovah pu lane 2002, ek mo ti fini lir li dan trwa zur. Mo kapav dir ki sa inn ankuraz mwa buku ek inn fortifye mo lafwa.”

“Mo ti fer detrwa resers dan La Tour de Garde ek Réveillez-vous ! ek mo’nn gayn enn gran sirpriz! Mo finn lir sa bann magazinn la regilyerman depi 15 an, me zame mo ti realize ki kantite sa bann lartik la zot ankurazan ek interesan. Bann parol ki ti ena dan sa bann lartik la ti ranpli ar lamur—enn kalite ki byin rar zordi. Mo finn truv tu seki mo ti bizin.”

Labib dir: “Zeova pre ar bann dimunn ki ena enn gran sagrin dan zot leker, ek Li sov bann ki demoralize.” (Psom 34:18) San okenn dut, bann ki “ena enn gran sagrin dan zot leker” uswa ki “demoralize” kapav gayn enn lankurazman ek enn lespwar pu lavenir, atraver Labib. Bann Temwin Zeova distribye bann piblikasyon ki baze lor Labib. Grasa sa bann piblikasyon la, bann dimunn ki bizin led, kapav profit konsolasyon ki sorti dan Labib.