Lasint Senn—Ki Ete Sa?

KI VINN dan u lespri kan u tann sa expresyon “lasint senn” la? Buku dimunn pu pans sa gran tablo ki truv dan Milan l’Italie, ki pint Leonardo da Vinci finn fer (1452-1519). Atraver bann syek, lasint senn finn inspir buku artis, ekrivin ek mizisyin.

Me ki ete Lasint Senn, ek ki sinifikasyon li ena pu bann dimunn ki viv dan nu lepok zordi? Dapre bann ansiklopedi ek bann diksyoner, Lasint Senn, uswa Repa Nu Senyer, se repa ki Zezi Kris ti pran avek so bann zapot lanwit avan li donn so lavi kuma enn sakrifis. Sertin dimunn apel sa repa la Dernye Repa Diswar parski se dernye repa diswar ki Zezi ti pran avek so bann fidel disip. Ena apel li usi Repa Nu Senyer, parski se nu Senyer Zezi Kris ki ti etabli sa levennman la.

Tutlong listwar, buku dimunn finn sakrifye zot lavi pu bann kitsoz ki ti byin inportan pu zot. Lamor sertin parmi zot finn ed bann dimunn pandan inpe letan. Li vre ki sa bann lamor la se bann aksyon ki merit loner. Me, kan nu konpar sa bann lamor la avek lamor Zezi Kris, okenn pena mem linportans ki lamor Zezi. Anplis, dan listwar sa lemond ki ranpli ar problem la, lamor okenn dimunn pa finn kapav ena sa kantite lefe la lor bann dimunn. Kifer?

Pu reponn sa kestyon la ek pu ed u konpran byin ki sinifikasyon Repa Nu Senyer ena pu u, nu invit u lir prosin lartik.