Al Prese pu Fer Bann Disip
“Kan Prisil ek Akila ti tann Apolos, zot ti amenn li avek zot, ek zot ti explik li volonte Bondye dan enn fason pli egzak.”—Akt 18:26.
1. Mem si Apolos ti “byin zele grasa lespri sin,” ki li ti bizin?
PRISIL ek Akila, enn kup Kretyin dan premye syek, ti obzerv Apolos fer diskur dan sinagog lavil Efez. Parski Apolos ti enn bon orater ek li ti konn konvink lezot, li ti kapte latansyon so bann oditer. Li ti “byin zele grasa lespri sin,” ek ‘so lanseynman ti egzak konsernan Zezi.’ Me, li ti kler ki Apolos “ti konn zis batem Zan.” Seki li ti pe anseyne lor Zezi ti egzak, me limite. Kifer? Parski so konesans pa ti konplet lor Zezi Kris. Donk, Apolos ti bizin ogmant so konesans lor rol ki Zezi ena dan realizasyon proze Zeova.—Akt 18:24-26.
2. Ki travay difisil Prisil ek Akila ti aksepte pu fer?
2 San okenn ezitasyon, Prisil ek Akila ti port zot volonter pu ed Apolos pu pratik “tu kitsoz” ki Zezi inn ordone. (Matye 28:19, 20) Labib dir ki zot ti “amenn li avek zot ek zot ti explik li volonte Bondye dan enn fason pli egzak.” Me, ti ena bann kitsoz konsernan Apolos ki ti pu fer sertin Kretyin ezite pu anseyn li. Ki sa bann kitsoz-la? Ek ki nu kapav aprann lor bann zefor ki Prisil ek Akila ti fer pu anseyn Apolos bann Lekritir? Kuma sa resi-la kapav motiv nu pu kumans bann letid Labib?
Pran Kont Bezwin Bann Dimunn
3. Kifer nivo ledikasyon Apolos pa ti anpes Prisil ek Akila pu anseyn li?
3 Apolos ti enn Zwif ki aparaman inn grandi dan lavil Alexandrie, kapital l’Égypte. Buku dimunn ti purswiv bann letid siperyer dan sa lavil-la, ki ti byin repite usi pu so gran libreri. Ti ena enn gran kominote Zwif laba, parmi, ti ena bann gran intelektyel. Dayer, se laba mem ki’nn prodir La Septante, tradiksyon an Grek bann Lekritir Ebraik. Li pa etonan alor ki Apolos ti “byin konn bann Lekritir”! Parkont, Akila ek Prisil zot, zot ti bann fabrikan latant. Eski zot ti santi ki zot pa ala oter pu ed Apolos? Non. Par lamur pu Apolos, zot ti konsider la personn, so bann bezwin, ek kuma zot ti pu kapav ed li.
4. Ki kote Apolos ti gayn led ki li ti bizin, ek kuma?
4 Mem si Apolos ti enn bon orater, li ti bizin gayn plis lanseynman. Se pa dan enn liniversite ki li ti pu gayn led ki li ti bizin, me parmi bann manb kongregasyon Kretyenn. Apolos ti pu gayn enn konpreansyon pli egzak lor dispozisyon ki Bondye inn pran pu delivre limanite. Prisil ek Akila “ti amenn li avek zot ek ti explik li volonte Bondye dan enn fason pli egzak.”
5. Ki u kapav dir lor spirityalite Prisil ek Akila?
5 Prisil ek Akila ti for lor plan spirityel ek zot lafwa ti ena enn baz byin solid. Sirman ki zot ti “tuzur pre pu defann zot lafwa devan bann dimunn ki ti demann enn lexplikasyon lor zot lesperans,” ki li ti devan enn dimunn ris, mizer, enn intelektyel, uswa enn esklav. (1 Pyer 3:15) Akila ek so madam ti “konn servi parol la verite kuma bizin.” (2 Timote 2:15) Li kler ki zot ti etidye byin seryezman bann Lekritir. Apolos ti byin tuse par linstriksyon ki li ti gayne ek ki ti baze lor ‘parol Bondye, ki vivan ek ki ena puvwar,’ pu inflyans leker bann dimunn.—Ebre 4:12.
6. Kuma nu kone ki Apolos ti byin apresye led ki li ti gayne?
6 Apolos ti byin apresye legzanp so bann anseynan ek sa ti fer li vinn plis efikas ankor pu fer bann disip. Li ti byin servi so konesans pu pres la bonn nuvel, sirtu parmi bann Zwif. Apolos ti byin plase pu konvink bann Zwif lor Zezi Kris. Li ti ‘ena enn gran konesans lor bann Lekritir,’ donk li ti kapav pruve ki tu bann profet dan lepase ti pe atann Kris vini. (Akt 18:24, Kingdom Interlinear Translation) Labib dir ki answit, Apolos ti al Akai, ek laba “li’nn byin ed bann ki ti vinn krwayan par faver imerite Bondye; parski devan tu dimunn li ti donn bann prev solid, ki bann Zwif antor ek li ti servi bann Lekritir pu montre ki Zezi, limem Kris.”—Akt 18:27, 28.
Aprann par Legzanp Lezot Anseynan
7. Kuma Akila ek Prisil ti vinn bann anseynan kapab?
7 Kuma eski Akila ek Prisil ti vinn bann anseynan byin kapab lor Parol Bondye? Zot ti serye dan zot letid personel ek dan lasistans bann reynion. Me anplis, etandone ki zot ti frekant lapot Pol depre, sa usi finn sirman ed zot buku. Pandan 18 mwa, Pol ti res kot Akila ek Prisil, dan Korint. Zot ti travay ansam dan fabrikasyon ek reparasyon bann latant. (Akt 18:2, 3) Imazinn bann konversasyon spirityel byin profon ki sirman ti ena ant zot. Ek pena dut ki sa bon frekantasyon avek lapot Pol-la finn ranforsi zot spirityalite! Proverb 13:20 dir: “Seki pe mars avek bann dimunn saz, pu vinn saz.” Wi, zot bon frekantasyon finn ena enn bon lefe lor zot bann labitid spirityel.—1 Korintyin 15:33.
8. Ki Prisil ek Akila ti aprann kan zot ti obzerv Pol dan so minister?
8 Kan Prisil ek Akila ti obzerv lapot Pol dan so laktivite predikasyon, zot ti truv legzanp enn bon anseynan. Liv Akt rakonte ki, ‘sak saba, Pol ti fer enn diskur dan sinagog [Korint] ek li ti konvink bann Zwif ek bann Grek.’ Plitar, kan Silas ek Timote ti vinn zwenn li, Pol “ti kumans byin okipe par la parol, li ti donn bann Zwif temwaynaz, pu pruve ki Zezi, limem Kris.” Kan bann manb sinagog pa ti manifeste buku lintere, Prisil ek Akila finn remarke ki Pol ti sanz plas kot li ti pe prese. Li ti al dan enn plas pli favorab, dan enn lakaz akote sinagog. Laba, Pol inn reysi ed Krispus, “prezidan Sinagog,” pu vinn enn disip. Sirman Prisil ek Akila ti remarke kuma, kan Krispus ti vinn enn disip, sa ti prodir enn bon rezilta dan teritwar. Nu kapav lir seki finn arive: “Krispus . . . ti vinn enn krwayan dan le Senyer ek tu so fami usi. Ek buku parmi bann Korintyin ki ti tann [la parol], ti kumans krwar ek zot ti pran batem.”—Akt 18:4-8.
9. Ki lefe legzanp Pol finn ena lor Prisil ek Akila?
9 Lezot proklamater, parey kuma Prisil ek Akila, finn imit legzanp Pol dan so minister. Se seki lapot Pol ti ankuraz lezot Kretyin pu fer: “Imit mwa, parey kuma mwa, mo imit Kris.” (1 Korintyin 11:1) Prisil ek Akila ti swiv legzanp Pol, zot ti ed Apolos pu gayn enn konpreansyon pli egzak lor bann lanseynman Kretyin. An retur, Apolos ti kapav ed lezot dimunn ankor pu vinn bann disip. Pena dut ki Prisil ek Akila ti fer lezot disip dan Rom, Korint ek Efez.—Akt 18:1, 2, 18, 19; Romin 16:3-5.
10. Ki leson u finn aprann dan Akt sapit 18, ki pu ed u pu fer bann disip?
10 Apre ki nu finn egzaminn Akt sapit 18, ki leson nu kapav tire? Parey kuma Akila ek Prisil finn aprann buku avek Pol, nu’si, nu kapav vinn plis efikas pu fer bann disip, si nu swiv legzanp bann bon anseynan Parol Bondye. Nu kapav frekant depre bann ki “byin okipe par la parol” ek ki donn lezot enn “temwaynaz afon.” (Akt 18:5, Kingdom Interlinear Translation) Nu kapav gete kuma zot tus leker bann dimunn avek bann metod lanseynman konvinkan. Sa bann metod-la kapav ed nu pu fer bann disip. Kan nu fer letid avek enn dimunn, nu kapav dir li invit lezot manb so fami uswa bann vwazin, pu vinn etidye ansam. Ubyin nu kapav dir li, fer nu kone si ena lezot dimunn ki ti pu kontan etidye Labib.—Akt 18:6-8.
Kre Bann Lokazyon Pu Fer Bann Disip
11. Kot sa kapav truv bann nuvo disip?
11 Pol ek lezot Kretyin ti rod tu lokazyon pu fer bann disip: zot ti pres port-a-port, kot bazar, ek kan zot ti vwayaze—wi, partu. Si u enn proklamater zele ki pe rod fer bann disip, eski u’si u kapav fer parey dan u laktivite? Eski u kapav sezi bann lokazyon pu rod bann dimunn ki diyn ek pres avek zot? Ki sertin mwayin nu bann konpaynon ki pres la bonn nuvel, inn servi pu fer bann disip? Dabor, anu get temwaynaz par telefonn.
12-14. Pu montre byinfe temwaynaz par telefonn, rakont lexperyans ki u’nn fer personelman, uswa enn ki dan sa bann paragraf-la.
12 Kan li ti pe pres port-a-port, enn ser dan Brésil (ki nu pu apel Maria), ti donn enn trak enn madam ki ti pe sorti dan enn flat. Maria ti poz li kestyon ki ena lor trak-la: “Eski u ti pu kontan konn plis lor Labib?” Madam-la ti reponn: “Mo ti pu byin kontan. Me selman mo enn profeser, mo donn leson ek sa pran tu mo letan.” Lerla, Maria ti sigzer madam-la pu egzaminn bann size Biblik par telefonn. Madam-la ti donn Maria so nimero telefonn, ek le swar mem enn letid finn kumanse par telefonn lor brosir Ki Bondye Pe Demann Nu? a
13 Enn predikatris aplintan an Éthiopie ti pe pres avek enn misye lor telefonn, kan enn ku li’nn tann tapaz par deryer. Misye-la ti demann li si li kapav re-telefone plitar. Kan ser-la inn re-sonn li, misye-la inn demann li exkiz. Li rakonte ki la dernyer fwa, li ek so madam ti pe gayn gran lager. Ser-la inn profite pu dir li ki Labib donn bann bon konsey pu rezud problem familyal. Li’nn dir li usi ki liv Le secret du bonheur familiale, ki pibliye par bann Temwin Zeova, finn ed buku fami pu rezud zot problem. Detrwa zur apre ki misye-la inn gayn enn kopi sa liv-la, ser-la inn re-telefonn li. Misye-la dir li: “Sa liv-la inn sov mo maryaz!” Avredir, misye-la inn fer enn reynion avek so fami pu partaz bann bon konsey ki li’nn lir dan sa liv-la. Apre sa, misye-la inn kumans etidye Labib ek li pa’nn tarde pu kumans asiste bann reynion Kretyenn regilyerman.
14 Enn proklamatris dan Danemark ti kumans enn letid Labib grasa temwaynaz par telefonn. Li dir: “Sirveyan servis ti ankuraz mwa pu donn temwaynaz par telefonn. Okumansman, mo ti ezite, mo ti dir: ‘Sa, pa pu mwa, sa.’ Me enn zur, mo’nn pran kuraz ek mo’nn konpoz enn premye nimero telefonn. Mo’nn zwenn enn madam ki apel Sonia. Apre enn ti konversasyon, Sonia inn dakor pu gayn bann piblikasyon Biblik. Enn lapre-midi, nu’nn diskit lor la kreasyon ek li ti anvi gayn liv La vie: comment est-elle apparue? Évolution ou création?b Mo’nn sigzer li ki li ti pu bon si nu ti kapav zwenn an personn pu diskit lor sa size-la. Li’nn aksepte. Kan mo’nn al kot li, Sonia ti pre pu letid, ek depi sa zur-la, nu finn fer letid sak semenn.” Pu termine, ser-la dir: “Pandan lontan mo finn priye pu gayn enn letid Labib, me, zame mo pa ti atann pu gayn enn, grasa temwaynaz par telefonn.”
15, 16. Ki lexperyans u kapav rakonte, pu montre byinfe ki nu gayne kan nu konsyan ki ena diferan fason pu kumans bann letid Labib?
15 Buku proklamater gayn bann bon rezilta parski zot met an pratik konsey pu donn temwaynaz partu kot ena dimunn. Dan États-Unis, enn ser ti aret so loto dan enn parking, pre kot enn vann ki livre marsandiz. Kan madam ki ti dan sa vann-la ti remark li, ser-la inn kumans explik li laktivite ki nu fer pu anseyn bann dimunn Labib. Madam-la inn ekut li, apre, li’nn desann dan so vann ek li’nn vinn pre kot loto ser-la. Li ti dir ser-la: “Mo byin kontan ki u’nn arete pu koz ar mwa. Sa fer byin lontan ki mo pa’nn gayn zot bann piblikasyon. Anplis mo ti pu kontan etidye Labib ankor. Eski u ti pu aksepte fer mo letid?” Ala kuma nu ser finn kre enn bon lokazyon pu partaz la bonn nuvel.
16 Tuzur dan États-Unis, enn ser ti fer enn bon lexperyans kan li ti vizit enn mezon retret. Li ti al zwenn enn direkter ki okip sertenn aktivite dan sa sant-la. Li’nn dir li ki li ti pu kontan ofer enn led spirityel bann dimunn ki res la. Li ti dir usi ki sa ti pu fer li plezir pu kondir enn letid Labib gratis, tulesemenn, ar tu seki ti pu kontan. Direkter-la inn donn li permisyon pu vizit plizir lasam. Byin vit, ser-la inn kumans kondir enn letid Labib, trwa fwa par semenn, avek 26 dimunn, ek enn parmi zot pe kapav asiste reynion regilyerman.
17. Ki mwayin ki suvan byin efikas pu kumans bann letid Labib?
17 Sertin proklamater gayn bann bon rezilta kan zot propoz enn letid Labib direkteman avek bann dimunn. Enn gramatin, enn kongregasyon kot ena 105 proklamater, ti fer enn zefor spesyal pu propoz enn letid Labib avek sak dimunn ki zot ti zwenn dan predikasyon. Sa zur-la, 86 proklamater ti sorti an predikasyon. Apre dezertan predikasyon, zot inn kumans omwin 15 letid Labib avek bann dimunn.
Kontiyn Rod Bann Dimunn Ki Diyn
18, 19. Ki komannman inportan Zezi inn donn nu, ki nu bizin gard byin dan nu lespri? Pu nu kapav fer sa, ki nu bizin byin deside pu fer?
18 Antan ki proklamater, sirman u ti pu kontan esey bann sigzesyon ki’nn done dan sa lartik-la. Byinsir, li bon ki nu pran an konsiderasyon bann kutim lokal, avan deside ki metod nu pu servi pu donn temwaynaz. Me avantu, anu gard dan nu lespri komannman ki Zezi inn done pu rod bann dimunn ki diyn ek ed zot pu vinn bann disip.—Matye 10:11; 28:19.
19 Pu akonpli sa travay-la, li inportan ki nu ‘servi parol la verite kuma bizin.’ Nu kapav fer sa kan nu servi bann largiman ki baze antyerman lor Labib pu konvink bann dimunn. Sa pu ed nu tus leker bann ki dispoze pu ekute ek insit zot pu azir. Si nu priye Zeova ek fer Li konfyans, nu pu kapav ed sertin pu vinn bann disip Zezi Kris. Ek nu kone ki kantite benediksyon nu pu gayne an retur! Donk, anu ‘fer tu nu posib pu paret devan Bondye kuma bann dimunn apruve.’ Anu glorifye Zeova tuletan antan ki bann proklamater zele, ki al prese avek lintansyon pu fer bann disip.—2 Timote 2:15.
[Notes]
a Pibliye par bann Temwin Zeova.
b Pibliye par bann Temwin Zeova.
Eski U Rapel?
• Kifer Apolos ti bizin gayn enn lexplikasyon pli konplet lor volonte Bondye?
• Dan ki fason Prisil ek Akila ti aprann ar lapot Pol?
• Dapre Akt sapit 18, ki u finn aprann konsernan laktivite pu fer bann disip?
• Kuma u kapav kre bann lokazyon pu fer bann disip
[Zimage page 18]
Prisil ek Akila ti “explik [Apolos], volonte Bondye dan enn fason pli egzak”
[Zimage page 20]
Apolos ti vinn byin kapab pu fer bann disip
[Zimage page 21]
Pol ti pres partu kot li ti ale