Rekonfor pu Bann Ki Pe Sufer

DAN LEPASE, kan bann zom ek bann fam fidel ti sufer, zot ti priye Bondye avek tu zot lafors, pu gayn so direksyon. Me, zot ti usi fer kitsoz pu gayn enn sulazman. Defwa zot ti servi bann trik pu evit bann lennmi. Par egzanp, se grasa konfyans ki David ti ena an Jéhovah, ek grasa so bann zefor personel ki li finn kapav andir bann sufrans. Me, ki kapav dir lor nu zordi?

Kan u konn bann sufrans, sirman u fer kitsoz pu rezud u problem. Par egzanp, si u retruv u san travay, sirman u pu fer latet lipye pu rod enn travay konvenab, ki pu sutenir u ek u fami. (1 Timothée 5:8) Uswa, si u sufer akoz enn maladi fizik, sirman u pu rod enn led medikal apropriye. Li interesan pu remarke ki Jésus, ki purtan ti ena puvwar Bondye pu geri tu kalite maladi, ti rekonet ki ‘bann dimunn ki malad bizin dokter.’ (Matthieu 9:12) Me, se pa tuletan ki u pu kapav anlev u bann sufrans. Kitfwa u pu bizin kontiyn siport zot dan enn sertenn mezir.

Li pu bon si nu koz sa avek Jéhovah dan lapriyer. Par egzanp, si nu pe rod enn travay, nu konfyans an Jéhovah ek lapriyer pu ed nu reziste tantasyon pu aksepte enn travay ki pa an akor avek bann prinsip Biblik. Anplis, nu pa pu les lanvi pu gayn plis kas uswa lamur larzan ‘amenn nu lwin ar lafwa.’ (1 Timothée 6:10) Wi, kan nu pran bann desizyon inportan konsernan nu travay, nu fami uswa nu lasante, nu kapav swiv lankurazman David: “Zet to fardo lor Jéhovah, ek Li pu sutenir twa. Zame Li pa pu les enn kikenn drwat, tonbe.”—Psaume 55:22.

Lapriyer sinser kapav ed nu’si pu gard enn bon moral, desort ki bann sufrans pa tuf nu. Antan ki vre Kretyin, lapot Paul ti ekrir: “Tuletan, par lapriyer, siplikasyon ek remersiman, demann Bondye seki zot bizin.” Kuma eski lapriyer sinser kapav rekonfort nu? “Lape ki Bondye done ek ki siperyer a tu [seki enn dimunn] panse pu vey nu leker ek nu bann kapasite mantal par mwayin Christ Jésus.” (Philippiens 4:6, 7) Lape Bondye “siperyer a tu [seki enn dimunn] panse.” Donk, li kapav ed nu pu res stab kan nu santi nu angwase. Li pu “vey nu leker ek nu bann kapasite mantal.” Si nu azir vit-vit san reflesi, nu sufrans kapav ogmante, me lape Bondye kapav anpes nu azir kumsa.

Lapriyer kapav sanz derulman enn sityasyon. Kan lapot Paul ti anprizone dan Rome, avek imilite li ti demann bann frer ek ser pu priye pu li. Kifer? Li ti ekrir: “Mo pe ankuraz zot sirtu pu fer sa, pu ki mo kapav return kot zot pli vit.” (Hébreux 13:19) Paul ti kone ki grasa lapriyer ki so bann konpaynon pe fer avek perseverans, Jéhovah kapav sanz moman so liberasyon.—Philémon 22.

Eski lapriyer kapav ena enn lefe lor nu sufrans? Wi, li kapav. Me, nu bizin realize ki Jéhovah kapav pa reponn nu lapriyer dan fason ki nu, nu ti pu anvi. Plizir fwa Paul ti priye konsernan so “pikan dan laser,” ki ti kitfwa enn problem fizik. Olye ki Bondye tir sa sufrans-la, Li ti dir Paul: “Mo faver imerite, sa mem ase pu twa; parski se dan la febles ki to pu truv mo lafors pli byin.”—2 Corinthiens 12:7-9.

Donk, li kapav arive ki nu sufrans pa disparet tutswit. Me, nu pu gayn lokazyon pu montre ki nu fer nu Papa ki dan lesyel ful konfyans. (Jacques 1:2-4) Nu kapav asire ki mem si Jéhovah pa anlev nu sufrans, Li kapav ‘uver enn semin pu ki nu kapav siport li.’ (1 Corinthiens 10:13) Li interesan pu note ki la Bib apel Jéhovah “Bondye ki donn konsolasyon, ki konsol nu dan tu nu bann maler.” (2 Corinthiens 1:3, 4) Bondye donn nu seki nu bizin pu nu andire, ek nu ena lespwar pu gayn lavi pu tuletan.

Parol Bondye, la Bib, promet nu ki Jéhovah “pu suy tu larm dan zot lizye, lamor pu nepli egziste. Nepli pu ena dey, plore, ek duler.” (Révélation 21:3, 4) Eski enn lemond kot pena sufrans se zis enn rev sa? Si u’nn abitye viv avek bann sufrans, li kapav paret enn rev. Me, Bondye finn promet ki pu ena enn lemond kot pa pu ena ni laper ni maler. Pena bare, so proze vremem pu realize.—Isaïe 55:10, 11.

[Zimaz lor paz 9]

Kit sufrans ek gayn rekonfor