Kifer Eski Bann Temwin Jéhovah Kontiyn Vizit U?

Dan lemond antye, bann dimunn konn bann Temwin Jéhovah pu zot perseverans dan zot laktivite de port-an-port. Sertin demande kifer bann Temwin kontiyn vizit zot, malgre ki zot pa vreman interese ar zot mesaz. De let ki sorti la Russie explik nu kifer.

Maasha, enn tifi 19 an ki res Khabarovsk, rekonet: “Onetman, dan le pase mo finn fer tu pu evit bann Temwin Jéhovah.” Me, apre ki li’nn lir detrwa magazinn ki bann Temwin pibliye, li finn sanz so latitid. Li ekrir: “Tu seki mo’nn lir dan sa bann magazinn-la ti byin interesan; mo’nn aprann buku kitsoz. Me seki pli inportan, seki sa finn fer mwa get lemond avek enn lot regar. Dusma-dusma mo’nn konpran kifer nu lor later.”

Sveltana, ki res dan lavil Ussuriysk, ki truv 80 km dan le Nord Vladivostok, finn ekrir: “Mo finn fek kumans lir Latur Degard ek Réveillez-vous! Dan lepok kot nu pe viv, nu byin bizin sa bann magazinn-la. Mo kontan tu zot bann lartik. Zot byin interesan ek zot aprann nu buku kitsoz. Mersi! Mersi buku ki ena bann dimunn kuma zot dan sa lemond-la ek mersi pu sa bon travay byin inportan ki zot pe fer-la.”

Lapot Paul ti poz enn kestyon ki fer byin reflesi: “Kuma zot pu tande si personn pa prese?” (Romains 10:14) Bann Temwin Jéhovah dan lemond antye pe pran sa kestyon-la aker. Nu ankuraz u pran detrwa minit pu ekut bann Temwin la prosenn fwa ki zot vinn kot u. Kitfwa u’si u pu apresye mesaz rekonfortan ki truv dan Parol Bondye, la Bib.