Zot partage bon nouvel avek bann ki sourde

“ZOT amenn spiritualité kot ou!”C’est coumsa ki recemment, directeur enn couvent pou bann dimoune agé dan Navalcarnero, Madrid, l’Espagne, ti decrire bann visite ki bann Témoins de Jéhovah ti faire dan sa couvent-la. Ki ti pousse li pou dire sa?

Plusieurs parmi bann ki reste dan centre Rosas del Camino, zot sourde. C’est seulement parski bann Témoins de Jéhovah inn faire zeffort pou aprann langue des signes espagnol, ki zot inn kapav communik avek bannla. Directeur-la ti felicite bann Témoins parski zot inn offert zot lé-temps gratis pou enseigne bann kitsoz ki sorti dan la Bible avek bann ki bizin enn l’aide special pou aprann. Li ti remark l’influence favorable ki l’enseignement la bonne nouvelle ti ena lor sa bann dimoune-la. Ek zot aussi—surtout bann ki pa bien tendé ou-soit ki pa trouve clair—bien apprecié visite bann Témoins.

Eulogio, enn missié ki aveugle ek sourde, pé etudié la Bible avek bann Témoins de Jéhovah. Enn jour pendant l’etude, enn missié agé ti approché ek ti offert sa Témoin-la enn poem ki bann ki reste dan sa couvent-la ti’nn ecrire pou exprime zot reconnaissance. Titre sa poem-la ti: “Pou vinn enn Témoin.” En partie, li ti dire: “Zot reste equilibré /Zot discipliné. /La joie ek sagesse /Li donne zot en abondance. /Zot preché sans cesse. /En Jéhovah zot ena confiance.”

C’est justement sa qualité confiance dan Jéhovah-la ki finn pousse bann Témoins dan le monde entier pou aprann langue des signes ki bann dimoune sourde dan zot pays servi. Coumsa zot partage message encourageant ki trouve dan la Bible avek sa bann dimoune-la.