Bann dimoune humble pou herite la terre

“Mo pensé ki la nature pou transformé ek li pou ré-vinn couma li ti été avant. . . . Sa pa pou arrivé demain gramatin, mais apré beaucoup lé-temps, kan pou ena enn nouveau lé-ciel ek enn nouveau la-terre.”—Jean-Marie Pelt, enn specialiste l’environnement en France.

Beaucoup dimoune ki tracassé par bann condition social ek bann condition nou l’environnement, ti pou bien content trouve la terre vinn enn paradi. Pourtant, pa zis bann dimoune ki pé vive dan 21^eme siecle ki ena sa rêve-la. Bien longtemps, la Bible ti promette ki la terre pou vinn enn paradi. Parmi bann passage la Bible ki bann dimoune pli koné, ena sa bann parole Jésus-la: “Heureux bann dimoune ki ena la douceur, parski zot pou herite la terre” ek “Ki to volonté faire lor la terre pareil couma dan le ciel.” (Matthieu 5:5; 6:10) Mais zordi, pena beaucoup dimoune ki croire ki bann dimoune humble pou vive dan enn paradi lor la terre. Pou beaucoup dimoune ki dire ki zot chrétien, paradi inn fini perdi.

Enn magazine français ki appel La Vie, ki sorti toulé-semaine expliké kifer bann dimoune, surtout parmi bann catholique, nepli croire dan enn paradi, ki li lor la terre ou-soit dan le ciel. Nou lire: “Pendant au moins 1900 an, l’enseignement lor paradi ti enn parmi bann principal l’enseignement bann catholique. Mais zordi, nepli koz lor paradi dan bann retraite spirituel, ni dan bann la-messe, bann cours theologie, ek bann cours catechisme.” Sa mot-la mem inn enveloppé “dan enn brouillard mystere ek confusion.” Certain predicateur evite sa mot-la par expré parski li “faire trop pense bonheur lor la terre.”

Frédéric Lenoir, enn sociologue ki specialisé dan la religion dire ki kan koz paradi, bann dimoune mazinn enn pays tropical “soi-disant couma enn paradi.” Jean Delumeau, enn historien ki finn ecrire plusieurs livre lor sa sujet-la, pensé li aussi ki bann promesse la Bible pa pou realisé dan enn fason litteral. Li ecrire: “Pou reponn sa question, ‘Ki resté ar paradi?’ l’enseignement chrétien donne sa reponse-la: Grace a la resurrection nou Sauveur, enn jour nou tou nou pou trouve nou l’espoir realisé.”

Eski nou encore toujours kapav croire dan parole ki dire ki enn jour la terre pou vinn enn paradi? Ki l’avenir reservé pou nou la-terre? Eski l’avenir la terre li flou, ou-soit eski kapav faire li vinn clair? Prochain lartik pou reponn sa bann question-la.