Eski ou saisi tou l’occasion pou koz lor ou bann croyance?

“ESKI la verité ki cent pour cent sur, existé?” Sa ti theme enn concours composition national ki ti faire en Pologne. Dan bann instruction ki ti donné pou sa composition-la, ti dire: “Nou pa bizin konn la verité ki cent pour cent sur. Personne pa bizin sa. De toute fason, la verité ki cent pour cent sur pa existé.” Agata, enn Témoin de Jéhovah ki ti pé al college ek ki ti ena 15 an, ti decidé pou servi sa l’occasion-la pou faire lezot konn so bann croyance.

Pou prepare li pou sa composition-la, d’abord Agata ti prié Jéhovah pou demann Li pou guide li ek lerla li ti commence rod bann renseignement lor sa sujet-la. Li ti trouve bann renseignement ki li ti pé rodé dan La Tour de Garde 1^er juillet 1995. Li ti cite sa question ki Ponce Pilate ti demann Jésus-la: “Ki été la verité?” (Jean 18:38) Li ti ecrire ki sa question-la ti montré ki Pilate ti ena enn l’attitude meprisant, coumadir li ti pé dire: ‘La verité? Ki été sa? La verité pa existé!’ Agata ti ecrire: “Sa question ki Pilate ti posé-la ti faire moi mazinn bann instruction ki ti gagné pou sa composition-la.”

Apré li ti koz lor enn certain fason pensé ki certain ena, setadir ki seki vrai pou enn dimoune kitfois pa vrai pou enn lot dimoune ek ki toulé-deux dimoune kapav “ena raison.” Li ti pose bann question couma par exemple, “Kisannla parmi nou pou ena courage pou rente dan enn avion, si nou pa croire ki bann la-loi naturel ki faire sa avion-la avancé, pa ti bann verité ki cent pour cent sur?” Apré li’nn attire l’attention lor la Bible kan li’nn dire: “Nou kapav compte lor Parole Bondié parski li basé solidement lor bann kitsoz ki nou kapav verifié.” Li ti dire ki li esperé ki bann ki pé rod la verité ki cent pour cent sur pou ena patience ki bizin pou trouve sa la-verité-la.

Agata ti gagne enn certificat special ek li ti gagne chance pou presente so composition devant tou so classe. Plusieurs camarade lekol ti accepté kan li ti offert zot enn l’etude la bible. Agata bien content ki li’nn saisi sa l’occasion-la pou partage so bann croyance avek lezot. Oui, kan ou veille bann l’occasion pou koz lor ou croyance, sa kapav rapporte fruit. Ki l’occasion ou ena pou koz lor ou bann croyance?