Question bann lecteur

Couma enn chretien bizin considere la chasse ek la peche?

La Bible pa condamne ni la chasse ni la peche. (Deutéronome 14:4, 5, 9, 20; Matthieu 17:27; Jean 21:6) Mais mem sa, bann chretien ki lachasse ou-soit lapeche bizin prend en consideration plusieurs principe la Bible.

Bondié ti donne Noé ek so bann descendant permission pou touye ek mange bann zanimo a condition ki zot verse di-sang sa bann zanimo-la avant mange zot. (Genèse 9:3, 4) Sa commandement-la ti montré bien ki bizin respecté la vie bann zanimo parski sa la-vie-la sorti kot Bondié. Alors, bann chretien pa touye bann zanimo zis couma enn sport ou-soit zis par plaisir, sans ki zot prend compte valeur la vie.—Proverbes 12:10.

Ena enn lot kitsoz ki nou bizin prend en consideration ek ki implik nou l’attitude. Bann zapotre ki ti pecheur, ti surement bien content kan zot ti lapeche beaucoup poisson. Mais, pena nanyin ki montré ki zot ti faire vantard parski zot ti ena plus capacité ki lezot pou lapeche ou-soit pou lachasse. Pena nanyin aussi ki montré ki zot ti al lapeche ou-soit lachasse pou faire competition ar lezot, pou prouvé ki zot bann vrai zom, ou-soit zis pou zot gagne bann sensation kan zot lachasse zanimo-la, zot reussi gagne li ek touye li.—Psaume 11:5; Galates 5:26.

Alors nou kapav demann nou-mem: ‘Eski mo enn l’exemple dan fason ki mo respecté seki Jéhovah pensé lor la vie? Eski la chasse ou-soit la peche domine mo pensée ek mo conversation? Eski mo fason vive montré ki mo bien content sa bann sensation ki gagné kan lachasse ek lapeche, ou-soit eski sa montré ki mo enn serviteur Bondié? Eski la chasse ek la peche faire moi frequente bann dimoune dan le monde ek faire moi neglige mo famille?’—Luc 6:45.

Certain parmi bann ki lachasse ou-soit lapeche pou zot mangé kapav pensé ki pendant bann saison la chasse ek la peche, zot ena bann bon raison pou neglige bann kitsoz spirituel. Mais nou montré nou la-foi ek nou confiance dan Bondié kan nou pa laisse nanyin prend place bann kitsoz spirituel. (Matthieu 6:33) En plus, bann chretien obeir tou bann la-loi “César” ki concerne la chasse ek la peche, mem si bann l’autorité pa faire nanyin pou faire respecté sa bann la-loi-la.—Matthieu 22:21; Romains 13:1.

Pou ki zot kapav ena mem pensée ki Jéhovah lor la chasse ek la peche, certain bizin adapté zot fason pensé avek so bann principe. (Éphésiens 4:22-24) Lot coté, nou bizin aussi respecté bann decision ki lezot prend dapré zot conscience. L’apotre Paul ti donne enn conseil ki applik bien dan sa cas-la. Li ti dire: “Anou arrete juge nou camarade, mais anou plutot prend sa decision-la: pa mette devant enn frere enn l’obstacle ki kapav faire li tombé.” (Romains 14:13) Kan nou ena enn l’amour ki pa egoïste ek nou respecté lezot, sa favorise la paix dan la congregation ek sa faire plaisir nou Createur, la Source tou la-vie ki existé.—1 Corinthiens 8:13.a

[Note]