Okenn zarme ki formé kont toi pa pou reussi

“N’importe ki zarme ki formé kont toi, pa pou reussi.”—ISAÏE 54:17

1, 2. Couma seki finn arrive bann Témoins de Jéhovah dan l’Albanie, montré ki seki Isaïe 54:17 dire, li vrai?

ENA plusieurs dizaine l’année, dan enn ti pays kot ena beaucoup montagne ki trouve dan sud-est l’Europe, ti ena enn groupe chretien ki ti ena beaucoup courage. Enn gouvernement communiste ki pa croire dan Bondié ti faire tou seki li kapav pou detruire zot. Pourtant, ni torture, ni travail forcé, ni bann fausse l’information ki ti circulé pa finn reussi elimine zot. Kisannla sa groupe chretien-la sa? C’est bann Témoins de Jéhovah dan l’Albanie. Mem si li ti bien difficile pou zot assisté bann reunion ek preché, zot l’endurance pendant tou sa bann l’année-la finn honore vrai religion chretien ek finn amenn bann louange lor nom Jéhovah. L’année passé, pou l’inauguration zot nouveau filiale, enn frere ki’nn reste fidele pendant longtemps ti dire: “N’importe ki quantité Satan essayé, li pou contigne perdi ek Jéhovah pou contigne gagné!”

² Tousala li enn preuve ki promesse ki Jéhovah faire ar so peuple, li vrai, pareil couma seki nou lire dan Isaïe 54:17: “N’importe ki zarme ki formé kont toi, pa pou reussi, ek n’importe kisannla ki pou porte enn jugement kont toi, to pou condamne li.” Le monde Satan kapav faire tou pou ki bann serviteur ki voué ar Jéhovah arrete adore Li. Mais l’histoire confirmé ki n’importe ki kitsoz ki le monde Satan faire, jamais sa pa pou marché.

Bann zeffort ki Satan faire, pa reussi

3, 4. (a) Cite certain parmi bann zarme ki Satan servi. (b) Dan ki fason eski bann zarme ki Satan servi pa finn reussi?

³ Bann dimoune finn servi plusieurs zarme kont bann vrai adorateur, parmi ena l’interdiction, bann emeute kont bann Témoins de Jéhovah, l’emprisonnement, ek ‘malheur ki preparé au nom la loi.’ (Psaume 94:20) En realité, pendant ki bann Témoins de Jéhovah pé etudié sa lartik-la, dan certain pays l’integrité bann vrai chretien envers Bondié pé “testé.”—Révélation 2:10.

⁴ Par exemple, rapport ki sorti dan enn filiale dire ki pendant zis enn an, bann serviteur Bondié finn gagne batté 32 fois pendant ki zot ti pé preché. En plus, 59 fois la police finn arrete ek finn emprisonne bann Témoins—jeune ek agé, missié ek madame—alors ki zot ti pé preché. La police finn prend l’empreinte certain, finn prend zot photo ek finn emprisonne zot couma bann criminel. Bann dimoune inn menace pou batte certain. Dan enn lot pays, ena asterla plus ki 1,100 cas kot finn arrete bann Témoins de Jéhovah, finn condamne zot pou paye l’amende, ou-soit finn batte zot. Plus ki 200 cas ladan ti arrivé jour kot zot ti rassemblé pou celebré la mort Jésus! Pourtant, l’esprit Jéhovah finn permette so peuple pou survive malgré ki tou ti kont zot dan sa bann pays-la ek aussi dan lezot pays. (Zekaria 4:6) Mem si colere zot bann l’ennemi bien grand, sa pa pou ferme la bouche bann ki pé loué Jéhovah. Oui, nou ena confiance ki okenn zarme pa kapav empeche projet Bondié realisé.

Bann ki porte bann fausse jugement, zot condamné

5. Ki bann fausse jugement bann dimoune ti porte kont bann serviteur Jéhovah dan premier siecle?

⁵ Isaïe ti prophetisé ki peuple Bondié pou condamne tou seki porte enn jugement kont zot. Dan premier siecle, bann dimoune souvent ti presente bann chretien couma bann mauvais dimoune. Seki nou lire dan Actes 16:20, 21 represente bien sa bann accusation-la: “Sa bann zom-la pé bien bouleverse nou la-ville; . . . ek zot pé annonce bann coutume ki nou pa gagne droit accepté ni pratiké, parski nou bann Romain.” Enn lot fois, bann l’ennemi religieux ti rod pousse bann dirigeant la ville pou agir kont bann disciple Christ kan zot ti dire: “Sa bann zom ki’nn bouleverse le monde entier-la, zot ici aussi, [ek zot] agir kont bann la-loi César.” (Actes 17:6, 7) Zot ti dire ki l’apotre Paul ti couma “enn l’epidemie,” ek zot ti dire ki li ti chef enn secte ki ti faire bann dimoune revolté kont bann l’autorité “partout dan le monde.”—Actes 24:2-5.

6, 7. Cite enn fason ki bann vrai chretien condamne bann parole ki bann dimoune dire pou attak zot.

⁶ Alors, nou pa etonné si zordi bann dimoune faire bann vrai chretien passe pou bann mauvais dimoune, koz en mal lor zot, ek faire bann campagne pou gate zot reputation. Dan ki sens eski nou kapav dire ki nou condamne sa bann parole ki bann dimoune dire pou attak nou-la?—Isaïe 54:17.

⁷ C’est souvent par zot bon conduite ki bann Témoins de Jéhovah dementi sa bann l’accusation ek propagande-la. (1 Pierre 2:12) Kan bann chretien montré ki zot bann citoyen ki obeir la-loi, ki ena enn bon moralité, ek ki interessé ar bien-etre lezot, sa montré bien ki sa bann l’accusation ki faire kont zot-la fausse. Nou bon conduite li enn preuve ki nou bann dimoune droite. A mesure ki bann dimoune ki observe nou, remarké couma nou contigne faire bann bon action, souvent sa pousse zot pou glorifié nou Papa ki dan le ciel ek pou reconette ki fason vive so bann serviteur li vrai-mem pli superieur.—Isaïe 60:14; Matthieu 5:14-16.

8. (a) Parfois ki necessaire pou nou defann nou position ki basé lor bann principe la Bible? (b) Pareil couma Jésus, couma eski nou condamne bann ki koz kont nou?

⁸ En plus ki nou ena enn bon conduite, parfois li kapav necessaire pou defann avek courage nou position ki basé lor bann principe la Bible. Enn l’exemple, c’est kan nou faire appel ar bann gouvernement ek bann la-cour pou nou gagne protection. (Esther 8:3; Actes 22:25-29; 25:10-12) Kan Jésus ti lor la terre, parfois li ti discute devant tou dimoune avek bann ki ti critik li ek li ti dementi zot bann fausse l’accusation. (Matthieu 12:34-37; 15:1-11) Pareil couma Jésus, nou content kan nou gagne l’occasion pou donne bann dimoune enn l’explication clair lor seki nou croire sincerement. (1 Pierre 3:15) Mem si nou famille ki pa Témoin ou-soit lezot dan lekol ou-soit dan travail bouffonne nou, fodé jamais nou laisse zot empeche nou faire lezot konn la verité ki ena dan Parole Bondié.—2 Pierre 3:3, 4.

Jérusalem—“Enn roche ki pese lourd”

9. Sa “roche ki pese lourd” ek ki mentionné dan Zekaria 12:3, li represente ki Jérusalem, ek kisannla ki represente li lor la terre?

⁹ Prophetie Zekaria faire nou koné kifer bann nation oppose-zot kont bann vrai chretien. Note seki Zekaria 12:3 dire: “Oui, sa jour-la mo pou faire Jérusalem vinn enn roche ki pese lourd pou tou bann peuple.” Lor ki Jérusalem sa prophetie-la pé kozé? Lor “Jérusalem celeste,” setadir Royaume celeste kot bann chretien oint pou dirigé. (Hébreux 12:22) Enn ti groupe parmi bann heritier sa Royaume messianik-la encore lor la terre. Ensam avek zot bann compagnon ki forme partie dan “lezot brebis,” zot encourage bann dimoune pou tourne-zot vers Royaume Bondié tant ki zot encore ena le temps pou faire sa. (Jean 10:16; Révélation 11:15) Couma eski bann dimoune inn reagir kan zot inn gagne sa l’invitation-la? Ek ki qualité soutien Jéhovah donne bann vrai adorateur zordi? Anou decouvert sa a mesure ki nou contigne examine signification Zekaria chapitre 12. Lerla nou pou gagne l’assurance ki ‘okenn zarme pa pou reussi’ kont bann chretien ki Bondié inn choisir par so l’esprit ek kont zot bann compagnon ki devoué.

10. (a) Kifer dimoune attak peuple Bondié? (b) Ki finn arrive bann ki’nn rod enleve ‘sa roche ki pese lourd-la’?

¹⁰ Zekaria 12:3 dire ki bann nation gagne “bann blessure.” Couma eski sa arrivé? Bondié inn donne l’ordre pou preche la bonne nouvelle lor so Royaume. Bann Témoins de Jéhovah considere sa l’obligation pou preché-la couma enn kitsoz ki bien serieux. Mais kan zot inn proclame Royaume Bondié couma sel l’espoir pou l’humanité, sa aussi inn vinn “enn roche ki pese lourd” pou bann nation. Zot rod enleve sa roche-la kan zot empeche predication lor Royaume Bondié. Kan zot faire sa, sa bann nation-la inn “gagne bann blessure,” ek zot inn coupe-coupé dan beaucoup place. Mem zot reputation inn gaté kan zot pa finn reussi ek zot inn perdi point. Zot pa kapav ferme la bouche bann vrai adorateur ki apprecié privilege ki zot ena pou proclame “bon nouvel eternel” lor Royaume messianik Bondié avant ki la fin sa systeme-la vini. (Révélation 14:6) Bann serviteur Jéhovah dan enn pays l’Afrique ti passe par beaucoup violence. Kan enn garde prison ti trouve sa, li ti dire: ‘Pou nanyin zot pé persecute sa bann dimoune-la. Jamais bannla pa pou al kont zot bann principe. Zot vinn pli beaucoup, ek nou pa kapav faire nanyin.’

11. Couma eski Bondié inn garde promesse ki Li’nn faire dan Zekaria 12:4?

¹¹ Lire Zekaria 12:4. Jéhovah promette ki dan enn sens symbolik, li pou aveuglé bann ki lutte kont bann ki annonce message lor so Royaume avek courage, ek li pou seme “panik” parmi zot. Li finn garde so parole. Par exemple, dan enn pays kot vrai l’adoration ti interdit, bann opposant pa ti kapav empeche peuple Bondié gagne nourriture spirituel. Enn journal ti mem dire ki bann Témoins de Jéhovah ti pé servi ballon pou faire bann publication biblik rente dan pays! Promesse ki Bondié ti faire ar so bann serviteur fidele ti vinn vrai: “Mo pou ouvert mo lizié . . . , ek mo pou faire tou bann cheval ki pou bann peuple, arrete trouve clair.” Bann l’ennemi Royaume Bondié tellement en colere ki zot pa trouve clair ek zot pa koné ki direction zot pou prend. Mais nou ena conviction ki Jéhovah pou preserve so peuple en tant ki groupe ek Li pou veille lor zot bien-etre.—2 Rois 6:15-19.

12. (a) Dan ki sens eski Jésus inn vinn allume enn difé lor la terre? (b) Couma eski le reste bann chretien oint inn allume enn difé dan enn sens spirituel, ek ki resultat sa finn ena?

¹² Lire Zekaria 12:5, 6. “Bann chef dan Juda,” c’est bann ki occupe fonction surveillant parmi peuple Bondié. Jéhovah faire zot ena enn grand zele pou ki zot kapav prend compte bann l’interet So Royaume lor la terre. Enn fois, Jésus ti dire so bann disciple: “Mo’nn vinn allume enn difé lor la terre.” (Luc 12:49) Jésus inn vrai-mem allume enn difé dan enn sens symbolik. Grace a so travail predication ki li ti faire avek zele, Jésus ti montré ki Royaume Bondié ti enn sujet bien important. Sa ti leve enn bel discussion parmi bann Juif. (Matthieu 4:17, 25; 10:5-7, 17-20) Zordi aussi, bann disciple Christ ki suive so trace inn allume enn difé spirituel “pareil couma enn foyer difé parmi bann pié ek enn flambeau difé parmi bann paquet cereale ki’nn fek coupé ek ki’nn mette en ligne dan karo.” En 1917, livre Le mystère de Dieu accomplia en anglais, ti demaské avek la force ki quantité la chretienté li hypocrite. Sa ti faire clergé reagir avek colere. Pa trop longtemps, Nouvelles du Royaume no. 37, “La fin fausse religion pé kosté!” finn pousse bann dimoune prend position pou, ou-soit kont Royaume Bondié.

“Bann la-tente Juda” sapé

13. Ki l’expression “bann la-tente Juda” montré, ek kifer Jéhovah sap bann ki coumadir sans protection?

¹³ Lire Zekaria 12:7, 8. Dan lepok ancien Israël, bann Juif ti habitué trouve bann la-tente dan zot pays parski bann berger ek bann ki travail dan karo parfois ti reste ladan. Si l’ennemi ti vinn attak la ville Jérusalem, sa bann dimoune-la ti parmi bann premier ki ti pou affecté ek ki ti pou bizin protection. L’expression “bann la-tente Juda” montré ki zordi le reste bann chretien oint zot dan enn l’endroit kot pena protection, coumadir zot pa dan bann la-ville ki bien protegé. Là, zot pé defann bann l’interet Royaume messianik avek courage. Jéhovah, chef bann l’armée pou sap “bann la-tente Juda avant” parski dan so l’attak Satan pé vise zot direct.

14. Couma eski Jéhovah defann bann ki dan “bann la-tente Juda” ek Li empeche zot tombé?

¹⁴ Oui, l’histoire prouvé ki Jéhovah pé defann sa bann ambassadeur ki Li’nn choisir pou represente so Royaume-la ek ki dan zot “la-tente” en dehors dan karo.b Li empeche zot “tombé” kan Li faire zot vinn fort ek ena courage pareil couma David, le roi ki ti enn guerrier.

15. Kifer Jéhovah “rod detruire net bann nation,” ek kan eski Li pou faire sa?

¹⁵ Lire Zekaria 12:9. Kifer Jéhovah “rod detruire net tou bann nation”? Parski zot contigne oppose kont so Royaume messianik. Parski zot fatigue ek persecute peuple Bondié, zot inn fini condamné. Bientot bann agent ki Satan ena lor la terre pou lance enn l’attak final kont bann vrai adorateur Bondié, ek sa pou amenn situation mondial ki la Bible appel Har–Maguédôn. (Révélation 16:13-16) Juge supreme pou reagir kont sa l’attak-la. Li pou defann so bann serviteur ek sanctifié so nom parmi bann nation.—Ézékiel 38:14-18, 22, 23.

16, 17. (a) Ki ‘di-bien bann serviteur Jéhovah finn herité’? (b) Kan nou endure bann l’attak Satan, ki sa prouvé?

¹⁶ Satan pena okenn zarme ki kapav affaibli la foi peuple Bondié ou-soit teigne zot zele partout lor la terre. La paix spirituel ki nou gagné parski Jéhovah ena capacité pou sap nou, sa-mem “di-bien ki bann serviteur Jéhovah finn herité.” (Isaïe 54:17) Personne pa kapav servi la force pou faire nou perdi nou la-paix ek nou prosperité spirituel. (Psaume 118:6) Satan pou contigne jette petrole lor bann la-flamme l’opposition, ek faire nou gagne probleme. Kan nou contigne enduré mem si bann dimoune koz en mal lor nou, sa li enn preuve ki nou ena l’esprit Bondié lor nou. (1 Pierre 4:14) La bonne nouvelle lor Royaume Jéhovah ki’nn fini etabli, pé preché dan le monde entier. Dan enn sens symbolik finn envoye beaucoup “roche ki servi dan bann fleche,” setadir beaucoup different qualité l’opposition kont peuple Bondié pou decourage zot ek empeche zot agir. Pourtant, avek la force Jéhovah, So bann serviteur inn reussi barre tou sa bann roche-la, ek empeche zot faire degat. (Zekaria 9:15) Nanyin pa pou reussi arrete le reste bann chretien oint ek zot bann compagnon fidele!

¹⁷ Nou attann avek impatience kan nou pou delivré net ar bann l’attak Satan. Eski nou pa gagne enn grand reconfort kan nou lire sa garantie ki ‘n’importe ki zarme ki formé kont nou pa pou reussi, ek n’importe kisannla ki pou porte enn jugement kont nou, nou pou condamne li’?

Couma ou pou reponn?

• Ki montré nou ki bann zarme Satan pa finn reussi?

• Couma eski Jérusalem celeste inn vinn “enn roche ki pese lourd”

• Couma Jéhovah sap “bann la-tente Juda”?

• A mesure ki nou approche ar Har–Maguédôn, ki l’assurance ou ena?

[Note]

[Zimage page 23]

Peuple Jéhovah dan l’Albanie ti reste fidele malgré bann l’attak Satan

[Zimage page 25]

Jésus ti dementi bann fausse l’accusation

[Zimage page 26]

Okenn zarme ki formé kont bann ki pé annonce la bonne nouvelle pa pou reussi