Eski ou peur bann mort?

BEAUCOUP dimoune pou reponn sa question par enn simple: “Non. Kifer mo bizin peur zot?” Zot croire ki bann ki’nn mort inn bien mort. Mais selman, ena bann million dimoune ki sur ki bann dimoune mort contigné vive dan forme bann l’esprit.

Dan Bénin, dan l’ouest l’Afrique, beaucoup croire ki bann mort kapav retourné pou touye lezot membre zot prop famille. Bann dimoune vann zot di-bien ou-soit faire dette pou offert bann sacrifice zanimo ek pou organise ceremonie pou calmé zot bann famille ki’nn mort. Certain pratik spiritisme, avek l’idée ki ena enn l’esprit ki contigne vive apré ki enn dimoune mort ek ki sa l’esprit-la kapav communik avek bann vivant. Lezot dimoune finn passe par bann l’experience ki’nn faire zot bien peur, ek zot pensé ki sa inn arrivé a cause l’influence l’esprit bann dimoune mort.

Agboola, enn missié ki reste pré kot la frontiere entre Bénin ek Nigéria, ti vive sa qualité l’experience-la. Li dire: “Dan nou l’endroit, spiritisme faire partie dan la vie toulé-jour. Ti lave lekor bann dimoune mort dapré enn certain coutume pou prepare zot pou vive dan le monde bann l’esprit. Souvent, mo ti ramasse bann boute-boute savon ki ti resté apré ek mo ti melange sa avek certain feuille. Apré, mo ti passe sa melange-la lor mo fusil la chasse, ek mo dire fort ki qualité zanimo mo envie touyé. Souvent bann dimoune faire sa bann pratik-la, et sa parette efficace. Selman, certain aspect dan spiritisme ti faire peur.

“Kan deux parmi mo bann garson finn mort dan bann circonstance etrange, mo ti pensé ki enn kikenn ti pratik spiritisme kont moi. Pou mo koné, mo ti al guette enn vié missié ki ti ena enn grand reputation a cause so bann pouvoir dan domaine spiritisme. Li’nn confirme moi seki mo ti pé pensé. Pli pire encore, li ti explik moi ki mo deux garson ti pé attann asterla dan le monde bann l’esprit pou vinn bann serviteur sa dimoune ki ti touye zot-la kan li mort. Sa vié missié-la ti dire aussi ki mo troisieme garson pou mort li aussi. Deux-trois jour apré, li ti mort li aussi.”

Apré, Agboola ti joinde John, enn Témoins de Jéhovah ki ti reste dan Nigéria. John ti servi la Bible pou donne li explication concernant condition bann dimoune mort. Sa explication-la finn change la vie Agboola. Sa kapav change ou la vie aussi.

Eski bann mort zot vivant?

Kisannla ki pli kapav reponn sa question-la? En tou cas pa enn dimoune, mem si li enn kikenn ki ena enn grand reputation. Mais Jéhovah, Createur tou la vie “dan le ciel ek lor la terre . . . bann kitsoz ki visible ek ki invisible,” Li, Li ena sa reponse-la. (Colossiens 1:16) Li ti crée bann ange pou reste dan le ciel ek bann zom ek bann zanimo pou reste lor la terre. (Psaumes 104:4, 23, 24) Partout, la vie depann lor Li. (Révélation 4:11) Alors, guetté ki so prop parole, la Bible, dire lor la mort.

Jéhovah ti premier pou koz lor la mort. Li ti averti Adam ek Ève ki zot ti pou mort si zot ti desobeir Li. (Genèse 2:17) Ki sa ti vedir? Jéhovah ti expliké: “To finn faire avek la poussiere ek to pou revinn la poussiere.” (Genèse 3:19) Kan enn dimoune mort, lekor-la decomposé, li retourne dan la poussiere. La vie arreté.

Adam ek Ève ti desobeir volontairement ek a cause sa zot ti condamné a mort. Selman, pa zot ki ti mort en premier. Zot garson Abel ki ti mort en premier. So grand frere, Caïn, ti touye li. (Genèse 4:8) Caïn pa ti peur ki so frere ki ti’nn mort ti kapav tire vengeance. Au contraire, Caïn ti plutot peur seki bann zom vivant ti kapav faire li.—Genèse 4:10-16.

Plusieurs siecle plitar, kan bann astrologue ti annonce le roi Hérode ki enn “le roi bann Juif” ti’nn né dan so royaume, sa ti fatigue so la tête. Hérode ti determiné pou touye sa kikenn ki kapav vinn le roi-la, ek li ti faire plan pou touye tou garson dan Bethléhem ki ena moins ki deux an. Mais enn ange ti averti Joseph pou prend Jésus ek Marie ek “sauvé al en Égypte.”—Matthieu 2:1-14.

Kan Hérode ti mort, ange-la ti dire Joseph retourne en Israël, “parski bann ki ti pé rod nâme sa ti zenfant-la finn mort.” (Matthieu 2:19, 20) Ange-la, ki enn l’esprit, ti koné ki Hérode ti pou nepli kapav faire Jésus di-tort. Joseph pa ti peur le roi Hérode ki’nn mort. Mais, Joseph ti peur seki Archélaüs, garson Hérode ki ti mauvais, ti kapav faire. Alors, Joseph avek so famille ti al habite dan Galilée, en dehors territoire ki Archélaüs ti controlé.—Matthieu 2:22.

Sa bann recit-la aide nou trouvé ki bann mort pena okenn pouvoir. Alors, couma nou kapav explik bann l’experience ki Agboola ek lezot finn koné?

“Bann demon,” ou-soit bann l’esprit impur

Kan li ti enn adulte, Jésus ti gagne zaffaire avek bann creature spirituel ki mauvais. Zot ti reconette Jésus ek zot ti appel li “Garson Bondié.” Jésus aussi pareil ti koné kisannla zot ti été. Zot pa ti l’esprit bann dimoune mort. Mais plutot, Jésus ti identifié zot couma bann “demon,” ou-soit bann l’esprit impur.—Matthieu 8:29-31; 10:8; Marc 5:8.

La Bible koz concernant bann l’esprit ki fidele envers Bondié, ek bann ki’nn rebellé kont Li. Livre Genèse dire ki kan Jéhovah ti mette Adam ek Ève dehors dan jardin Éden parski zot pa ti obeir, Li ti mette deux chérubin, ou-soit ange, dan l’est sa jardin-la, pou empeche n’importe kisannla rentré. (Genèse 3:24) Li parette ki sa ti premier fois ki bann dimoune ki kapav trouve bann l’esprit.

Inpé le temps apré, certain ange ti vinn lor la terre ek zot ti prend forme bann dimoune. Jéhovah pa ti’nn donne zot okenn mission pou accompli lor la terre. Au contraire, zot “ti quitte sa place kot zot ti’nn crée pou resté” dan domaine spirituel. (Jude 6) Zot ti ena bann mobile egoïste. Zot ti marié avek bann madame, ki apré finn produire enn race zom hybride ki ti appel Nephilim. Bann Nephilim ek zot bann papa rebelle ti rempli la terre avek violence ek avek encore beaucoup mauvais kitsoz. (Genèse 6:1-5) Jéhovah ti reglé sa situation-la kan Li ti amenn deluge lor la terre entier pendant lepok Noé. Deluge ti touye bann mauvais dimoune, bann zom bann femme ek bann Nephilim. Ki ti arrive bann ange?

Deluge ti force zot pou retourne dan le ciel. Mais Jéhovah ti empeche zot retrouve zot “position ki zot ti ena au commencement.” (Jude 6) La Bible dire: “Bondié pa finn retenir-Li pou puni bann ange ki ti faire peché, mais, kan Li’nn jette zot dan Tartare, Li’nn livré zot dan bann trou profond kot faire bien-bien noir, ek finn reserve zot pou jugement.”—2 Pierre 2:4.

Tartare li pa enn l’endroit; c’est enn condition kot bann ki ladan zot abaissé ek kot zot ena enn activité limité, pareil couma dan enn prison. Bann demon nepli kapav prend forme bann dimoune, mais zot encore ena enn grand pouvoir ek enn grand l’influence lor l’esprit ek la vie bann dimoune. Zot kapav rente dan lekor bann dimoune ek bann zanimo ek controle zot. (Matthieu 12:43-45; Luc 8:27-33) Zot trompe bann dimoune aussi kan zot faire zot passe pou l’esprit bann dimoune mort. Kifer? Pou empeche bann dimoune adore Jéhovah dan fason ki Li content ek sa bann demon-la mette zot dan confusion concernant vrai condition bann dimoune mort.

Couma pou surmonte la peur

Agboola ti trouve bann l’explication logik ki la Bible donné concernant la mort ek lor l’identité bann l’esprit. Li’nn comprend ki li bizin aprann plus. Li’nn commence lire la Bible ek bann publication ki basé lor la Bible avek John. Agboola ti gagne reconfort kan li’nn aprann ki so bann garson pé dormi dan la tombe, ek zot pa pé attann ki sa dimoune ki’nn touye zot-la vinn dan le monde bann l’esprit ek lerla zot pou vinn so serviteur.—Jean 11:11-13.

Agboola finn realisé aussi ki li bizin arreté net avek tou bann pratik spiritisme. Li’nn brule tou so bann zaffaire ki ti ena enn lien avek spiritisme. (Actes 19:19) Certain dimoune dan so l’endroit ti averti li ki bann l’esprit pa pou content ek ki zot pou attak li. Mais Agboola pa ti gagne peur. Li ti suive conseil ki ena dan Éphésiens 6:11, 12: “Mette lor zot l’equipement la guerre ki complet, ki Bondié donné . . . parski nou bizin lutté . . . kont bann mauvais l’esprit.” Dan sa l’equipement la guerre spirituel-la, ena la verité, la justice, bon nouvelle lor la paix, la foi, ek l’epée l’esprit, Parole Bondié. Sa l’equipement la guerre ki sorti kot Bondié-la, li vrai-mem puissant.

Certain parmi bann camarade ek bann famille Agboola ti rejette li parski li’nn arrete pratik bann coutume ki ena enn lien avek spiritisme. Mais selman, dan la Salle du Royaume ki dan so l’endroit li finn gagne bann nouveau camarade, ki croire seki la Bible enseigné.

Asterla Agboola koné ki Jéhovah bientot pou nettoye la terre et pou tire mechanceté, ek pou arrete tou seki bann demon pé faire. Finalement, Li pou detruire zot net. (Révélation 20:1, 2, 10) Ici lor la terre, Bondié pou ressuscite “tou seki dan bann tombe souvenir.” (Jean 5:28, 29) Parmi sa bannla, pou ena Abel, bann zenfant innocent ki le roi Hérode ti touyé, ek bann million lezot. Agboola ena la foi ki so bann garson aussi pou parmi bann ressuscité. Bann dimoune ki ou content mais ki’nn mort kapav aussi parmi sa bann dimoune-la. Tou bann ki pou ressuscité pou confirmé ki entre zot la mort ek zot resurrection, zot ti completement inconscient, zot pa ti konn nanyin concernant bann ceremonie ki ti pé faire pou zot.

Ou pena okenn raison pou peur bann dimoune mort. Au contraire, ou kapav attann pou retrouve bann dimoune ki ou content mais ki’nn mort. Mais avant ki sa arrivé, kifer ou pa etudié la Bible pou augmente ou la foi? Frequente bann dimoune ki croire dan seki la Bible enseigné. Si ou pé pratik spiritisme zis couma enn l’amusement, arreté desuite. Protege ou-mem kont bann demon kan ou mette lor ou “l’equipement la guerre ki complet, ki Bondié donné.”(Éphésiens 6:11) Bann Témoins de Jéhovah pou content pou aide ou. Zot offert bann l’etude la Bible gratis kot ou. Pou faire sa l’etude-la zot servi livre Ki la Bible enseigné vrai-mem? a

Agboola nepli peur bann dimoune mort, ek li’nn aprann couma pou resisté kont bann demon. Li dire: “Mo pa koné kisannla finn faire mo trois garson mort. Mais depuis ki mo servi Jéhovah, mo finn gagne sept lezot zenfant, ek jamais enn l’esprit finn faire zot di-mal.”

[Note]

[L’encadré lor page 27]

Caïn pa ti peur ki so frere ki ti’nn mort ti pou tire vengeance

[L’encadré lor page 28]

Agboola nepli peur bann dimoune mort, ek li’nn aprann couma pou resisté kont bann demon