L’esprit saint—Kifer ena different l’opinion?

KI ÉTÉ l’esprit saint? Sa question-la parette bien simple, mais pou trouve enn reponse ki simple li pa sa facile-la. Le pape Benoît XVI ti dire enn la foule dan l’Australie: “Li preské impossible pou comprend dan enn fason clair ki été [l’Esprit Saint].”

Li clair ki ena plusieurs l’opinion ek beaucoup doute lor sa question-la: Ki été l’esprit saint? Anou guette certain reponse ki souvent nou tendé:

• Li enn personne réel ki vive dan bann disciple Christ.

• Li presence Bondié ki pé agir dan le monde.

• Li troisieme personne dan Trinité.

Kifer ena sa bann different l’opinion-la? Sa finn commencé depuis quatrieme siecle nou lepok kan certain dimoune ki ti etudié la religion ti dire ki l’esprit saint li enn personne ki dan enn certaine fason egal ar Bondié. Pourtant, bann l’Ecriture ou-soit bann premier disciple Christ pa ti enseigne sa l’idée-la. New Catholic Encyclopedia donne sa l’explication-la: “Li clair ki Ancien Testament pa decrire l’esprit Bondié couma enn personne . . . l’esprit Bondié li simplement la force Bondié.” Sa livre reference-la ajouté: “La plupart bann texte ki ena dan Nouveau Testament decrire l’esprit Bondié couma enn kitsoz, pa couma enn personne; nou trouve sa surtout dan fason ki servi sa deux mot-la, l’esprit ek la force Bondié, pou montré ki toulé-deux ena mem signification.”

Nou comprend kifer bann dimoune trouve sa difficile pou imagine enn la force couma enn personne. Dapré enn sondage ki’nn fek faire dan l’Amérique, la plupart dimoune pa daccord avek l’idée ki l’esprit saint li enn personne ou-soit enn “kitsoz ki vivant.” Eski zot ena raison? Ou-soit eski nou bizin croire bann dimoune ki etudié la religion ek ki contigne dire ki “l’Esprit Saint li enn Personne bien réel ki separé completement avek le Père ek le Fils”?

Pou gagne enn reponse sur, nou bizin tourne nou vers Parole Bondié, la Bible, ki decrire l’esprit saint en detail. L’apotre Paul ti ecrire: “Tou l’Ecriture li inspiré par Bondié ek li utile pou enseigne la verité, pou corrige enn erreur.”—2 Timothée 3:16, Bible en français courant.

Kifer ou bizin rod konn la verité lor l’esprit saint? Parski kan ou pou koné ki été l’esprit saint, sa kapav permette ou gagne l’aide Bondié. Eski parfois ou trouve sa difficile pou endure bann difficulté zis avek ou prop la force? Jésus ti promette so bann disciple: “Contigne demandé, ek zot pou gagné . . . Si zot . . . konn donne zot zenfant seki bon, kifer nou Papa ki dan le ciel pa pou donne encore plus l’esprit saint bann ki demann Li?”—Luc 11:9, 13.

Dan bann lartik ki suive, nou pou laisse bann l’Ecriture explik nou ki été l’esprit saint. Ek nou pou guetté couma li kapav ena enn bon l’influence dan nou la vie.

[L’encadré lor page 3]

Bann l’Ecriture faire nou koné ki été l’esprit saint