Eski ou ti koné?
Kifer la Bible associé l’adoration fausse bondié Baal avek bann fête kot ti pé gagne bann relation sexuel sans okenn controle?
Baal, bondié bann Cananéen, ti avant tou enn bondié fertilité. So bann adorateur ti croire ki c’est Baal ki ti faire zot karo ou-soit zot zanimo produire beaucoup. Alors, dapré livre Us et coutumes aux temps bibliques (en anglais), bann dimoune ti gagne “bann relation sexuel dan bann place dan hauteur [kot zot ti al adoré], dan l’intention pou ki ena beaucoup production dan pays. [Zot ti faire sa] pou encourage Baal, bondié l’orage ek so compagne Ashéra pou gagne bann relation sexuel pou ki bann karo ek bann zanimo produire beaucoup.”
Bann Cananéen ti croire ki Baal ti al dan profondeur la terre pendant l’été kan Môt, bondié la secheresse ek la mort, ti gagne victoire lor li. Selman, bann dimoune ti croire ki bann premier la pluie ki ti tombé ti enn signe ki Baal ti regagne pouvoir ek lerla sa ti pou amenn encore enn grand production dan karo ek parmi bann zanimo. Bann Cananéen ti fête sa saison-la par bann grand fête sans okenn controle. Sa faire nou comprend kifer bann Israélite ki ti attaché ar Baal Péor, ti gagne bann “relation immoral avek bann tifi Moab.”—Nombres 25:1-3.
Ki Jésus ti pé rod dire kan li ti dire ki bann scribe ek bann Pharisien ressemblé bann “tombe ki badizoné ar la chaux”?
Pou montré ki bann scribe ek bann Pharisien ti bann hypocrite, Jésus ti dire zot ki “zot couma bann tombe ki badizoné ar la chaux, ki dehors parette joli mais endan, zot rempli ar lezo bann dimoune mort ek toute sorte qualité kitsoz impur.” (Matthieu 23:27) Bann Juif ti habitué passe la chaux lor bann tombe pou rann zot bien visible. Zot ti faire sa vers la fin saison la pluie, 15eme jour Adar, enn mois avant la Pâque, parski la pluie ti ena tendance pou lave la chaux ki ti lor sa bann tombe-la.
Dapré The Jewish Encyclopedia, ti passe la chaux lor sa bann tombe-la pou protege “enn grand quantité pelerin ki ti passe lor bann chemin pendant la Pâque,” pou ki zot pa vinn impur. La loi ki trouve dan Nombres 19:16 ti dire ki tou dimoune ki ti touche lekor enn mort, lezo enn dimoune, ou-soit enn tombe, ti pou impur pendant sept jour. Sa la loi-la ti interdit bann Israélite pou participe dan culte pur, sinon ti pou condamne zot a mort. (Lévitique 15:31) Jésus ti servi sa l’exemple-la zis deux-trois jour avant la Pâque; alors, sa coutume pou passe la chaux lor bann tombe-la ti pou encore bien frais dan l’esprit bann ki ti pé ecoute li. Jésus ti envie montré ki bann chef religieux ki ti opposé ar li pa ti seki zot ti pé parette en dehors ek bann ki ti gagne contact avek zot ti pou vinn impur lor plan spirituel.
[Zimage page 10]
Stèle en calcaire: “Baal au foudre,” 14eme-13eme siecle avant nou lepok
[Remerciement photo]
Musée du Louvre, Paris