Bondié vrai-mem interessé ar nou—Couma nou koné
ALA enn question important ki finn tourmente bann dimoune pendant plusieurs millier l’année: Si Bondié content nou, kifer ena tou sa bann souffrance-la? Surement ou pou d’accord ki si ou content enn kikenn, ou pa pou envie ki sa dimoune-la souffert, ek si sa dimoune-la dan difficulté, ou pou essaye aide li. A cause sa, beaucoup dimoune ena sentiment ki si ena tellement souffrance dan le monde, sa li enn preuve ki Bondié pa interessé ar nou. Alors, pou commencé, li important ki nou guette bann preuve ki Bondié vrai-mem content nou, ki Bondié interessé ar nou.
La creation confirme l’amour Bondié
C’est Jéhovah, “[Li]-mem ki finn faire le ciel ek la terre ek la mer ek tou bann kitsoz ki ladan.” (Actes 4:24) Kan nou observe seki Jéhovah inn crée, pena doute ki nou pou bizin tire conclusion ki Li interessé ar nou. Par exemple, pense lor bann kitsoz ki faire ou plaisir. Eski ou content bann bon mangé? Jéhovah ti kapav donne zis enn sel qualité mangé pou nourri bann dimoune. Au contraire, Li finn crée enn extra grand varieté mangé pou faire nou la bouche content. Li pareil aussi pou la terre. Li’nn decore li avek tou sorte qualité pié, fleur ek bann paysage extraordinaire pou ki nou la vie vinn agreable ek interessant.
Guette aussi fason ki Bondié finn faire nou. Capacité ki Bondié inn donne nou pou riyé ek badiné, pou apprecié la musik, ek pou apprecié seki joli, zot pa vrai-mem important pou nou contigne vive—tousala c’est bann cadeau ki Li donne nou pou ki nou la vie vinn pli riche. Ek pense lor ou relation avek lezot. Kisannla pa content passe bann bon moment avek so bann bon camarade ou-soit kisannla pa content kan enn kikenn pou ki li ena enn grand l’affection serre li dan so lé-bras? Capacité pou content lezot, li-mem li enn cadeau ki sorti kot enn Bondié ki ena l’amour! Parski Bondié inn crée bann dimoune avek capacité pou content, alors sa qualité-la bizin forme partie dan personnalité Bondié.
La Bible rassure nou ki Bondié content nou
La Bible dire nou ki Bondié Li l’amour. (1 Jean 4:8) Nou pa trouve so l’amour zis dan la creation mais nou trouve li aussi dan so Parole, la Bible. Par exemple, la Bible donne bann principe ki aide nou pou ena enn bon la santé, li encourage nou pou montré ki nou raisonnable dan tou kitsoz, ek li mette nou en garde kont bann pratik couma boire ek mange plus ki bizin.—1 Corinthiens 6:9, 10.
La Bible donne aussi bann bon conseil lor couma pou ena enn bon relation avek lezot, li encourage nou pou content sakenn nou camarade ek pou traite lezot avek respé, dignité, ek bonté. (Matthieu 7:12) Li condamne bann pratik ek bann l’attitude ki amenn souffrance—couma l’envie pou gagne toujours plus, faire palab, jalousie, l’adultere, ek crime. Si tou dimoune essaye vive en accord avek bann bon conseil ki ena dan la Bible, pena doute ki ti pou ena beaucoup moins souffrance lor la terre.
Mais selman, fason pli extraordinaire ki Bondié inn montré so l’amour, c’est kan Li’nn donne so Garson, Jésus, couma enn ranson pou l’humanité. Jean 3:16 dire: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” Alors, Bondié inn fini prend bann disposition pou tire enn fois pou tou la mort ek tou lezot forme souffrance.—1 Jean 3:8.
Li clair ki ena enn quantité preuve ki Bondié content nou. Alors li logik, ki Bondié pa content trouve nou souffert. Li pou faire kitsoz pou arrete souffrance. Nou pena pou deviné couma Li pou faire sa—la Bible dire nou exactement couma Bondié pou elimine souffrance.
[Zimage lor page 4]
Capacité pou content lezot li enn cadeau ki sorti kot enn Bondié ki ena l’amour