Pa faire la peine l’esprit saint Jéhovah
“Pa faire la peine l’esprit saint Bondié ar ki zot finn scellé.”—ÉPH. 4:30.
1. Ki Jéhovah finn faire pou plusieurs million dimoune, ek ki devoir zot ena?
JÉHOVAH finn faire enn kitsoz special pou plusieurs million dimoune ki vive dan sa le monde ki rempli ar probleme-la: Li finn permette zot vinn proche ar Li a travers Jésus Christ, so Garson ki Li finn crée direct. (Jean 6:44) Si ou finn voué ou la vie ar Bondié ek ou pé vive en accord avek sa voeu-la, ou forme partie parmi sa bann dimoune-la. Parski ou finn prend bapteme lor nom l’esprit saint, ou ena enn devoir pou ena enn conduite ki en accord avek sa l’esprit-la.—Mat. 28:19.
2. Ki bann question nou pou examiné dan sa lartik-la?
2 Enn dimoune ki ‘seme pou l’esprit,’ li mette lor li nouveau personnalité ki la Bible mentionné. (Gal. 6:8; Éph. 4:17-24) Mais selman, l’apotre Paul donne nou bann conseil ek averti nou ki fodé pa nou faire la peine l’esprit saint Bondié. (Lire Éphésiens 4:25-32.) Asterla, nou pou examine sa conseil ki Paul inn donne nou-la. Ki Paul ti pé rod dire par faire la peine l’esprit Bondié? Couma enn kikenn ki voué ar Jéhovah kapav faire enn kitsoz coumsa? Ek couma nou kapav evite faire la peine l’esprit Jéhovah?
Ki Paul ti pé rod dire?
3. Couma ou pou explik Éphésiens 4:30?
3 Pou commencé, remark seki Paul ti dire dan Éphésiens 4:30. Li ti ecrire: “Pa faire la peine l’esprit saint Bondié ar ki zot finn scellé pou enn jour liberation par enn ranson.” Paul pa ti envie ki so bann compagnon chretien mette en danger zot spiritualité. C’est avek l’esprit saint Jehovah ki zot ti “scellé pou enn jour liberation par enn ranson.” Pou bann chretien oint ki fidele, l’esprit saint Bondié ti enn scellé ou-soit enn “garantie pou seki pou arrivé” ek li encore toujours pareil pou zot zordi. (2 Cor. 1:22) Kan zot gagne sa scellé-la sa montré ki zot pou Bondié ek ki zot pou gagne la vie dan le ciel. Bann ki scellé zot en tou 144,000.—Rév. 7:2-4.
4. Kifer li important ki nou pa faire la peine l’esprit saint Bondié?
4 Faire la peine l’esprit saint kapav enn premier pas ki faire nou perdi net l’influence la force actif Bondié dan nou la vie. Seki David ti dire apré ki li ti faire peché avek Bath-Shéba, montré nou ki li possible ki enn dimoune nepli gagne l’esprit Bondié. David ti repenti ek li ti faire sa supplication-la ar Jéhovah: “Pa rejette moi devant to figure, ek pa retire to l’esprit saint lor moi.” (Ps. 51:11) Zis bann chretien oint ki reste “fidele ziska la mort,” ki pou gagne “couronne” la vie immortel dan le ciel. (Rév. 2:10; 1 Cor. 15:53) Bann chretien ki ena l’esperance pou vive lor la terre zot aussi zot bizin l’esprit saint pou zot kapav reste fidele envers Bondié. Coumsa, zot pou gagne don la vie eternel grace a zot la foi dan sacrifice Jésus Christ. (Jean 3:36; Rom. 5:8; 6:23) Sa vedir ki nou tou nou bizin faire attention pou pa faire la peine l’esprit saint Bondié.
Couma enn chretien kapav faire la peine l’esprit saint?
5, 6. Couma enn chretien kapav faire la peine l’esprit Jéhovah?
5 En tant ki bann chretien ki voué ar Bondié, nou kapav evite faire la peine l’esprit saint. Couma? Si nou ‘contigne marche ek vive par l’esprit.’ Kan nou faire sa, nou pa pou laisse nou bann mauvais desir controle nou ek nou pa pou ena enn mauvais conduite. (Gal. 5:16, 25, 26) Mais situation kapav changé. Li kapav arrivé ki nou faire la peine l’esprit Bondié kan nou laisse-nou allé ek nou eloigne-nou tigit par tigit, kitfois sans mem ki nou rann-nou compte, ek nou commence ena enn conduite ki condamné par Parole Bondié, ki’nn inspiré par sa l’esprit-la.
6 Si nou contigne agir dan enn fason ki contraire ar direction ki l’esprit saint donne nou, nou pou faire li la peine ek nou pou faire la peine Jéhovah, la Source sa l’esprit-la. Anou examine Éphésiens 4:25-32, nou pou trouvé ki qualité conduite nou bizin ena ek ki kapav aide nou pou evite faire la peine l’esprit Bondié.
Couma nou kapav evite faire la peine l’esprit saint?
7, 8. Expliké kifer nou bizin dire la verité.
7 Nou bizin dire la verité. Dapré Éphésiens 4:25, Paul ti ecrire: “Asterla ki zot finn arrete koz menti, sakenn parmi zot, dire la verité so prochain, parski nou bann membre enn sel lekor.” Nou uni en tant ki “bann membre enn sel lekor,” alors fodé pa ki nou faire bann kitsoz enba-enba, ou-soit ki nou rod embete nou bann compagnon chretien par expré, parski c’est coumadir nou pé koz menti ar zot. N’importe kisannla ki persisté pou ena enn conduite coumsa, pou finalement perdi bann relation ki li ena avek Bondié.—Lire Proverbes 3:32.
8 Bann parole ek bann action ki embete lezot kapav empeche ena l’unité dan congregation. Alors, nou bizin ressemblé prophete Daniel ki ti enn dimoune ki zot tou ti kapav faire confiance ek personne pa ti kapav trouve nanyin malhonnete dan seki li ti faire. (Dan. 6:4) Nou bizin toujours rappel conseil ki Paul ti donne bann chretien ki ena l’esperance pou al dan le ciel. Li ti dire zot ki chaque membre ki forme partie dan “lekor Christ,” li membre enn sel lekor. Li bizin reste uni avek bann disciple Jésus ki oint ek ki dire la verité. (Éph. 4:11, 12) Nou ki ena l’espoir pou vive pou touletan dan enn paradis lor la terre, nou aussi nou bizin dire la verité ek lerla, favorise l’unité ki ena parmi la famille international nou bann frere.
9. Kifer li bien important ki nou obeir conseil ki donné dan Éphésiens 4:26, 27?
9 Nou bizin oppose-nou ar Satan ek pa donne li okenn l’occasion pou faire nou di-tort lor plan spirituel. (Jacq. 4:7) L’esprit saint aide nou pou resisté kont Satan. Par exemple, nou kapav faire sa kan nou controle nou colere. Paul ti ecrire: “Zot kapav en colere, mais pa faire peché; pa laisse soleil couché alors ki zot encore en colere, ek pa donne Satan okenn l’occasion.” (Éph. 4:26, 27) Si arrivé ki nou en colere ek nou en raison, desuite anou prié en silence, sa kapav aide nou pou garde “enn l’esprit calme” ek pou control nou au lieu ki nou faire enn kitsoz ki kapav faire la peine l’esprit Bondié. (Prov. 17:27) Alors, fodé pa nou reste en colere ek donne Satan l’occasion pou pousse-nou pou faire enn mauvais kitsoz. (Ps. 37:8, 9) Enn fason ki nou kapav resisté kont Satan c’est kan nou reglé bann probleme vite en accord avek seki Jésus ti dire.—Mat. 5:23, 24; 18:15-17.
10, 11. Kifer fodé pa nou kokin ni faire nanyin malhonnete?
10 Nou bizin resisté kont n’importe ki tentation pou kokin ou-soit pou faire enn kitsoz malhonnete. Paul ti ecrire: “Fodé ki enn voleur arrete kokin, mais plutot ki li travail dur avek so la main pou faire enn bon travail, pou ki li kapav partage avek enn dimoune ki bizin l’aide.” (Éph. 4:28) Si enn chretien ki’nn voué ar Bondié, kokin, li pou ‘attak nom Bondié,’ setadir, li pou jette deshonneur lor nom Bondié. (Prov. 30:7-9) Mem si enn dimoune misere, sa pa donne li droit pou kokin. Bann dimoune ki content Bondié ek zot prochain, comprend ki dan okenn situation, zot pa gagne droit kokin.—Marc 12:28-31.
11 Paul pa ti zis dire seki nou pa bizin faire; li ti dire aussi seki nou bizin faire. Si nou pé vive ek nou pé marche par l’esprit saint, nou pou travail dur pou ki nou kapav prend soin nou famille ek aussi pou “partage avek enn dimoune ki bizin l’aide.” (1 Tim. 5:8) Jésus ek so bann zapotre ti mette inpé l’argent enn coté pou aide bann pauvre, mais Judas Iscariote ki ti enn traitre, ti kokin enn partie dan sa l’argent-la. (Jean 12:4-6) Pena doute ki li pa ti laisse l’esprit saint guide li. Si nou laisse l’esprit saint guide nou, nou pou “reste honnete dan tou kitsoz,” pareil couma Paul. (Héb. 13:18) Lerla, nou pa pou faire la peine l’esprit saint Jéhovah.
Lezot fason pou evite faire la peine l’esprit saint
12, 13. (a) Dapré Éphésiens 4:29, ki qualité parole fodé pa sorti dan nou la bouche? (b) Ki qualité langage nou bizin ena?
12 Nou bizin veille bien seki nou dire. Paul ti dire: “Pa laisse okenn parole pourri sorti dan zot la bouche, mais plutot tou parole ki bon pou batir kan necessaire, pou ki bann ki pé ecouté kapav gagne kitsoz ki bon.” (Éph. 4:29) Encore enn fois, Paul pa ti zis dire nou seki nou pa bizin faire; li ti dire nou seki nou bizin faire. Si nou laisse l’esprit saint Bondié influence nou, nou pou ‘dire bann parole ki bon pou batir pou ki bann ki pé ecouté kapav gagne kitsoz ki bon.’ En plus, fodé pa nou laisse enn “parole pourri” sorti dan nou la bouche. Mot grec ki finn traduire par “pourri” finn servi pou decrire enn fruit, enn poisson, ou-soit enn la viande ki pé pourri. Pareil couma nou trouve sa qualité kitsoz-la degoutant, nou bizin aussi ena la haine pou enn langage ki Jéhovah condamné.
13 Kan nou kozé, nou parole bizin bon, “assaisonné ar di-sel,” ek montré respé pou lezot. (Col. 3:8-10; 4:6) Bann dimoune bizin kapav trouvé ki nou different kan zot tann nou kozé. Alors, anou aide lezot kan nou dire seki “bon pou batir.” Coumsa nou pou ena mem sentiment ki sa psalmiste-la kan li ti chanté: “Laisse bann parole ki sorti dan mo la bouche ek meditation mo leker faire toi plaisir. Ah Jéhovah toi ki mo grand Roche ek mo Sauveur.”—Ps. 19:14.
14. Dapré Éphésiens 4:30, 31, ki nou bizin rejeté?
14 Fodé pa ki nou vinn amer, ki nou en colere, ki nou dire bann parole ki insulté lezot, ek nou bizin arrete faire tou seki mauvais. Apré ki Paul ti averti bann Éphésiens ki fodé pa zot faire la peine l’esprit saint Bondié, li ti ecrire: “Pa vinn amer envers lezot, arrete faire la rage, en colere, criyé, dire bann parole pou insulté lezot, ek arrete faire tou seki mauvais.” (Éph. 4:30, 31) En tant ki bann dimoune imparfait, nou tou nou bizin travail dur pou controle nou bann pensée ek nou bann action. Si nou laisse nou-mem ‘vinn amer, nou faire la rage ek nou en colere,’ nou pou faire la peine l’esprit saint Bondié. Li pareil aussi si nou garde coumadir enn compte a chaque fois ki enn kikenn offense nou, nou garde rancune, ek nou refuse pou faire la paix avek sa dimoune ki finn offense nou-la. Si nou commence pa prend compte sa conseil ki mentionné dan Éphésiens-la ek lezot conseil biblik ki pareil, nou pou riské developpe bann mauvais tendance ki kapav amenn nou pou faire peché kont l’esprit saint ek nou pou gagne bann mauvais consequence.
15. Si enn kikenn finn faire nou di-tort, ki nou bizin faire?
15 Nou bizin bon, ena compassion ek pardonné. Paul ti ecrire: “Vinn bon sakenn envers so prochain, ena enn grand compassion, sakenn bizin pardonne so prochain avek tou so leker pareil couma Bondié aussi finn pardonne zot avek tou so leker par Christ.” (Éph. 4:32) Mem si nou finn senti-nou bien blessé, anou pardonné, pareil couma Bondié pardonne nou. (Luc 11:4) Faire coumadir enn lot chretien finn dire enn mauvais kitsoz lor nou. Nou envie reglé sa probleme-la ek nou al guette li. Li regretté ek li demann nou pardon. Nou pardonne li, mais nou bizin faire plus ki sa. Nou bizin suive seki Lévitique 19:18 dire: “Fodé pa to tire vengeance ni garde rancune kont bann garson to peuple; ek to bizin content to prochain couma to-mem. Mo-mem Jéhovah.”
Nou bizin reste lor nou garde
16. Donne enn l’exemple ki montré ki kitfois nou bizin faire bann changement pou nou pa faire la peine l’esprit saint Bondié.
16 Kan nou tousel, nou kapav tenté pou faire enn kitsoz ki Bondié pa content. Par exemple, kitfois enn frere habitué ecoute bann la musik ki pa bon pou bann chretien. Enn certain moment, so conscience commence troublé parski li rann-li compte ki li pa pé suive bann conseil biblik ki trouve dan bann publication “l’esclave fidele et avisé.” (Mat. 24:45) Li prié Jéhovah lor sa probleme-la ek li rappel seki Paul ti dire dan Éphésiens 4:30. Li bien decidé pou pa faire nanyin ki pou faire la peine l’esprit saint Bondié, li prend decision ki li pou nepli ecoute sa qualité la musik-la. Jéhovah pou beni l’attitude ki sa frere-la manifesté. Alors, sa l’exemple-la montré nou ki nou bizin reste lor nou garde pou pa faire la peine l’esprit saint Bondié.
17. Ki kapav arrivé si nou pa reste lor nou garde ek nou pa prié?
17 Li bien important ki nou reste lor nou garde ek nou prié, sinon nou pou kapav faire enn kitsoz impur ou-soit lezot peché. Lerla nou pou faire la peine l’esprit saint Bondié. Jéhovah servi so l’esprit saint en accord avek so volonté, alors, si nou faire la peine sa l’esprit-la c’est coumadir nou pé faire la peine Jéhovah, ek nou pa envie ki enn kitsoz coumsa arrive nou. (Éph. 4:30) Dan premier siecle, bann scribe ti faire enn grand peché kan zot ti dire ki c’est par pouvoir Satan ki Jésus ti pé faire bann mirak. (Lire Marc 3:22-30.) Sa bann l’ennemi Christ-la ti “blaspheme kont l’esprit saint” ek a cause sa zot ti faire enn peché ki Bondié pa pardonné. Fodé jamais ki enn kitsoz coumsa arrive nou!
18. Couma nou kapav koné ki nou pa finn faire enn peché ki Bondié pa pardonné?
18 Surement nou pa envie faire enn kitsoz ki pou amenn nou ziska faire enn peché ki Bondié pa pardonné. Alors, nou bizin rappel seki Paul ti dire concernant pa faire la peine l’esprit saint Bondié. Mais ki nou pou faire si nou finn faire enn peché grave? Si nou finn repenti ek nou finn gagne l’aide bann ancien, nou kapav consideré ki Bondié finn pardonne nou ek ki nou pa finn faire enn peché kont l’esprit saint. Avek l’aide Bondié, nou kapav aussi evite faire la peine l’esprit saint dan lezot fason.
19, 20. (a) Ki certain kitsoz ki nou bizin evite faire? (b) Ki nou bizin bien decidé pou faire?
19 Par so l’esprit saint, Bondié favorise l’amour, la joie ek l’unité parmi so peuple. (Ps. 133:1-3) Alors, fodé pa nou faire la peine l’esprit saint Bondié kan nou faire bann palab pou faire lezot di-tort, ou-soit kan nou dire bann kitsoz ki mank respé envers bann ancien ki l’esprit saint finn etabli couma bann berger spirituel. (Actes 20:28; Jude 8) Au contraire, nou envie favorise l’unité ek respé dan congregation. Oui, fodé pa ki nou forme bann clan parmi bann serviteur Bondié. Paul ti ecrire: “Frere, mo encourage zot par nom nou Seigneur Jésus Christ, pou koz mem langage zot tou. Fodé pa ki ena division parmi zot, mais zot bizin bien uni dan mem pensée ek mem l’opinion.”—1 Cor. 1:10.
20 Jéhovah ena desir ek capacité pou aide nou evite faire la peine so l’esprit. Alors, anou contigne prié pou gagne l’esprit saint ek anou bien decidé pou pa faire li la peine. Anou aussi contigne “semé pou l’esprit” ek rod so direction dan nou la vie asterla ek pou touletan.
Couma ou pou reponn?
• Ki sa vedir faire la peine l’esprit saint Bondié?
• Couma enn chretien ki voué ar Jéhovah kapav faire la peine so l’esprit?
• Cite bann fason couma nou kapav evité faire la peine l’esprit saint.
[Zimage page 30]
Reglé bann probleme vite
[Zimage page 31]
Ki fruit ki represente pli bien ou langage?