Ki été “la fin”?

“ . . . ek lerla la fin pou vini.”​—MATTHIEU 24:14.

SA BANN dernier l’année-la, nou finn tann enn quantité zistoire concernant la fin du monde. Bann livre, bann film, ek bann magazine, ki zot comik ou-soit scientifik, presente tou sorte qualité catastrophe ki pou amenn la fin: enn la guerre nucleaire ki pou detruire la terre, enn asteroïde ki pou tape avek la terre, enn virus mortel, enn changement climat ki pa kapav controlé, ou-soit bann creature ki sorti dan l’espace ki vinn attak la terre.

Bann religion aussi ena different qualité l’opinion lor la; beaucoup enseigné ki “la fin” pou detruire tou la vie lor la terre. Concernant Matthieu 24:14, enn specialiste dan domaine la religion ti ecrire sa bann parole ki faire peur-la: “Sa verset-la c’est enn parmi bann verset pli important dan Parole Bondié en entier . . . Nou generation li devant enn destruction tellement total, ki kapav arrivé n’importe kan, ki bien tigit parmi nou essaye maziné couma sa realité ki faire bien peur-la, pou été.”

Kan bann dimoune ena sa bann qualité l’opinion-la, zot neglige enn point bien important: Bondié, Jéhovah, “finn etabli [la terre] dan enn fason solide, [Li] pa finn crée li pou nanyin, mais [Li] finn forme li pou ki dimoune reste lor la.” (Isaïe 45:18) Alors kan Jésus ti koz lor “la fin,” li pa ti pé rod dire ki la terre ou-soit ki l’humanité ti pou detruire net. Li ti pé koz lor destruction bann mauvais dimoune​—bann ki pa accepté pou vive en accord avek direction ki Jéhovah donné avek amour.

Anou prend enn l’exemple. Faire coumadir ou proprietaire enn joli lakaz ek ou laisse bann dimoune reste ladan sans payé. Certain locataire vive ensam dan l’accorité ek zot prend bien soin ou lakaz. Mais, ena lezot ki touletan pé crée probleme. Zot laguerre entre zot-mem ek zot pa agir bien envers bann bon locataire-la. Zot casse ou lakaz ek zot contigne faire sa, mem si ou demann zot pou arreté.

Ki ou pou faire pou reglé sa situation-la? Eski ou pou detruire ou lakaz? Surement pa. Kitfois ou pou mette sa bann mauvais locataire-la dehors ek ou pou repare bann degat ki zot inn faire.

Jéhovah pou agir dan mem fason. Li ti inspire enn psalmiste pou ecrire: “Bann mauvais dimoune pou detruire, mais bann ki mette zot l’espoir en Jéhovah pou herite la terre. Enn tigit le temps encore, ek mauvais dimoune nepli pou existé; oui, to pou rod li dan so place, mais li pa pou la. Mais bann ki ena l’humilité pou herite la terre, ek vrai-mem zot pou trouve enn grand la joie dan l’abondance la paix.”​—Psaume 37:9-11.

L’apotre Pierre ti koz lor mem sujet. Par inspiration, li ti ecrire: “Par parole Bondié ti ena bann le ciel depuis lepok longtemps ek ti ena enn la terre ki ti sorti net dan de l’eau ek ki ti au milieu de l’eau; ek par sa bann moyen-la, le monde dan sa lepok-la ti detruire kan li ti couvert ar de l’eau.” (2 Pierre 3:5, 6) Ici l’apotre Pierre pé koz lor deluge dan lepok Noé. Le monde dan sa lepok-la, setadir bann dimoune ki pa ti respecté Bondié, ti detruire, mais la terre pa ti detruire. Sa deluge ki ti ena partout lor la terre-la “ti donne bann dimoune ki pena okenn respé pou Bondié, enn l’exemple lor bann kitsoz ki pou arrivé.”​—2 Pierre 2:6.

Apré sa Pierre ti ajouté: “Bondié finn reserve le ciel ek la terre ki existé zordi, pou brulé par difé.” Si nou arrete la, nou kapav mal comprend sa pensée-la. Mais, remarké ki sa verset-la dire aussi: “Ek destruction bann dimoune ki pena okenn respé pou Bondié.” Sa destruction-la c’est pa destruction la terre mais destruction bann dimoune ki pena respé pou Bondié. Ki sa verset-la dire apré? Pierre ti ecrire: “Nou pé attann, couma Li’nn promette, bann nouveau le ciel [Royaume messianik Bondié] ek enn nouveau la terre [enn societé ki juste], kot pou ena la justice.”​—2 Pierre 3:7, 13.

Bann prophetie la Bible montré aussi ki lepok kot “la fin” pou vini li bien pré. Kan ou pou lire Matthieu 24:3-14 ek 2 Timothée 3:1-5 ou pou trouve bann different kitsoz ki montré ki sa li vrai.a

Eski ou trouve sa drole ki ena sa quantité confusion-la concernant Matthieu 24:14, enn verset ki mem enn zenfant kapav comprend? Ena bann raison kifer sa coumsa. Satan inn aveuglé bann dimoune, li empeche zot pou trouve bann verité ki ena enn grand valeur, ki trouve dan Parole Bondié. (2 Corinthiens 4:4) Enn lot raison, c’est ki Bondié finn cachiette So bann projet ar bann dimoune ki ena l’orgueil ek Li’nn faire bann dimoune ki humble konn sa. En rapport avek sa, Jésus ti dire: “Devant tou dimoune, mo loué toi Papa, Seigneur le ciel ek la terre, parski to finn cachiette sa bann kitsoz-la ar bann dimoune ki ena la sagesse ek bann intellectuel, ek to finn faire bann tibaba konn sa.” (Matthieu 11:25) Oui, c’est vrai-mem enn l’honneur pou forme partie parmi bann dimoune humble ki comprend seki Royaume Bondié été vrai-mem ek ki attann avek impatience bann benediction ki sa Royaume-la pou amené pou tou bann ki soutenir sa!

[Note]

[Zimage page 9]

Royaume Bondié pou amenn enn “la fin” pou tou mechanceté ki ena lor la terre