Jésus Christ kisannla li été vrai-mem?

“Letan li ti rente dan Jérusalem, la ville en entier ti dan enn grand l’excitation, ek bann dimoune ti pé dire: ‘Kisannla sa?’ Bann la foule ti pé dire: ‘Sa c’est Jésus, li-mem prophete ki sorti Nazareth dan Galilée!’”​—MATTHIEU 21:10, 11.

KIFER eski l’entrée Jésus Christa dan Jérusalem, printemps l’an 33 nou lepok, ti crée enn l’excitation coumsa? Beaucoup dan la ville ti’nn tann koz lor Jésus ek lor bann kitsoz extraordinaire ki li ti’nn faire. Zot ti contigne rann temoignage lor li. (Jean 12:17-19) Pourtant, bien tigit dimoune dan la foule ti koné ki parmi zot ti ena enn zom ki ti pou ena enn grand l’influence lor tou bann dimoune, pendant plusieurs siecle, ek mem ziska zordi!

Anou guette deux-trois l’exemple ki montré grand l’influence ki Jésus ti’nn ena lor l’histoire l’humanité.

▪ Calendrier ki la plupart dimoune servi dan beaucoup pays, li basé lor l’année kot bann dimoune pensé Jésus ti’nn né.

▪ Environ deux milliard dimoune​—apepré enn tiers population mondial​—dire ki zot chretien.

▪ L’islam ki ena plus ki enn milliard membre dan le monde entier, enseigné ki Jésus li “enn pli grand prophete ki Abraham, Noé, ek Moïse.”

▪ Beaucoup parmi bann parole rempli avek sagesse ki Jésus finn dire, finn rente dan nou langage toulé-jour, dan different forme. Parmi ena:

‘Si enn kikenn tape ou lor enn la joue, donne li aussi lot la joue.’​—MATTHIEU 5:39.

‘Contigne tape la porte, ek pou ouvert pou zot.’​—MATTHIEU 7:7.

‘Personne pa kapav servi deux maitre.’​—MATTHIEU 6:24.

‘Ena plus bonheur kan donné ki kan recevoir.’​—ACTES 20:35.

‘Tou kitsoz ki zot envie bann dimoune faire pou zot, zot aussi, zot bizin faire pareil pou bannla.’​—MATTHIEU 7:12.

‘Ki zot oui vedir oui, zot non, non.’​—MATTHIEU 5:37.

Pena doute ki Jésus finn ena enn grand l’influence lor bann dimoune. Pourtant, bann dimoune dan le monde entier ena different l’idée ek croyance lor li. Ala kifer surement ou demann-ou: ‘Jésus Christ, kisannla li été vrai-mem?’ Zis la Bible ki dire nou kot-sa Jésus ti sorti, dan ki fason li ti vive, ek kifer li ti mort. Kan nou konn sa bann verité-la, sa kapav ena enn grand l’effet lor nou la vie​—asterla ek dan l’avenir.

[Note]