3. Maladie

“Bann dimoune pou . . . gagne bann maladie bien grave.”—LUC 21:11, Parole de Vie.

● Bonzali ti travail dan enn dispensaire, dan enn pays l’Afrique ki bien affecté par la guerre civil. Mem si li pa ti kapav faire grand kitsoz, li ti essaye soigne bann dimoune ki travail dan la mine, ki ti pé mort a cause enn maladie ki appel Marburg.a Li ti suppliye bann officier gouvernement dan enn grand la ville pou gagne l’aide, mais zot pa ti faire nanyin. Quatre mois plitar, finalement l’aide ti arrivé, mais Bonzali ti fini mort. Li ti gagne maladie Marburg ar bann travailleur ki li ti essaye sauvé.

KI LA REALITÉ MONTRÉ NOU? Bann infection respiratoire (couma pneumonie), bann infection ki faire bann dimoune gagne diarrhée, sida, tuberculose, ek malaria, zot parmi bann maladie ki touye pli beaucoup dimoune. Pa trop longtemps, sa cinq qualité maladie-la ti touye apepré 10.7 million dimoune. Enn lot fason pou dire sa c’est ki sa bann maladie-la touye apepré enn dimoune chaque trois seconde, toute longue l’année.

KI L’OBJECTION SOUVENT NOU TENDÉ? Population le monde pé contigne augmenté, alors bien sur, ena pli beaucoup dimoune ki malade. Sa vedir, ki ena pli beaucoup dimoune ki kapav contaminé.

ESKI SA L’OBJECTION-LA LI VALABLE? Population le monde finn augmenté dan enn fason extraordinaire. Mais capacité bann dimoune pou detecté, controlé ek traite bann maladie, sa aussi finn bien developpé. Alors, dan enn fason logik, eski bann maladie ek zot bann l’effet lor bann dimoune, pa ti supposé diminué? Pourtant, c’est le contraire ki pé arrivé.

KI OU PENSÉ? Eski bann dimoune pé gagne bann maladie grave pareil couma la Bible ti annoncé?

Bann tremblement de terre, la famine ek maladie, zot pa bann dimoune, mais zot pé detruire la vie plusieurs million dimoune. Mais, ena plusieurs million encore ki pé souffert dan la main bann dimoune couma zot-mem—beaucoup vinn bann victime bann ki ti supposé protege zot. Guetté ki enn prophetie la Bible dire pou arrivé.

[Note]

a La fievre Marburg, ki faire enn dimoune gagne enn hemorragie, li enn virus ki ena enn lien avek Ebola.

[L’encadré page 6]

“Li enn kitsoz terrible si enn lion ou-soit enn lot kitsoz mange [enn partie ou lekor], mais li exactement pareil kan enn maladie pé mange ou endan ek ki ou trouve sa pé fané tou autour ou.”—MICHAEL OSTERHOLM, ENN SCIENTIFIK KI ETUDIÉ BANN MALADIE.

[Remerciement photo page 6]