6. Enn l’activité predication dan le monde entier
“Sa bon nouvelle lor royaume-la pou preché partout kot dimoune resté lor la terre.”—MATTHIEU 24:14.
● Vaiatea vive lor enn l’île bien retiré dan l’ocean Pacifique, dan l’archipel Tuamotu. Mem si dan sa l’archipel-la ena apepré 80 ti l’île ki’nn formé ar corail, ki dispersé lor enn distance inpé plus ki 800,000 kilometre carré, ena zis 16,000 habitant dan sa bann l’île-la. Pourtant, Vaiatea ek so bann voisin finn gagne visite bann Témoins de Jéhovah. Kifer? Parski bann Témoins envie partage la bonne nouvelle lor Royaume Bondié avek tou dimoune, n’importe kot-sa zot resté.
KI LA REALITÉ MONTRÉ NOU? Message lor Royaume Bondié pé preché dan quatre coin la terre. Zis pou l’année 2010, bann Témoins de Jéhovah finn passe plus ki 1.6 milliard l’heure temps pou annonce sa bon nouvelle-la dan 236 pays ek territoire. En moyenne, chaque Témoin inn passe 30 minute dan predication par jour. Pendant sa dix dernier l’année-la, zot finn produire ek distribué plus ki 20 milliard publication ki servi pou l’enseignement biblik.
KI L’OBJECTION SOUVENT NOU TENDÉ? Sa faire plusieurs millier l’année ki pé preche message ki ena dan la Bible.
ESKI SA L’OBJECTION-LA LI VALABLE? Li vrai ki beaucoup finn preche message ki ena dan la Bible. Mais la plupart finn faire sa zis pou enn ti periode le temps ek dan zis deux-trois place. Mais bann Témoins de Jéhovah zot, zot pé faire enn campagne predication bien organisé dan le monde entier ki touche plusieurs centaine million dimoune. Zot finn perseveré dan zot l’activité predication malgré bann grand l’opposition ki zot finn gagné ar certain parmi bann pli grand l’organisation bien cruel ki finn existé dan l’histoire l’humanité.a (Marc 13:13) En plus, pa paye bann Témoins de Jéhovah pou zot preché. Au contraire, zot donne zot le temps volontairement, ek bann publication ki zot offert zot gratis. Zot l’activité en entier li soutenir par bann contribution volontaire.
KI OU PENSÉ? Eski “sa bon nouvelle lor royaume-la” pé preché dan le monde entier? Eski li possible ki realisation sa prophetie-la montré ki ena bann bon kitsoz ki pé attann nou devant?
[Note]
a Pou gagne plus l’information, guette bann documentaire ki ena lor cassette video “ Fidèles dans les épreuves, ” “ Les triangles violets, ” ek “ La fermeté des Témoins de Jéhovah face à la persécution nazie, ” distribué par bann Témoins de Jéhovah.
[L’encadré page 9]
“Tant ki Jéhovah permette, nou pou contigne preche la bonne nouvelle lor Royaume avek zele, ek nou pou servi tou moyen ki possible pou joinde bann dimoune.”—ANNUAIRE 2010 DES TÉMOINS DE JÉHOVAH.