Eski la vie ena vrai-mem enn sens?
“ESKI la vie ena enn sens?” Beaucoup dimoune finn pose sa question-la. Malheureusement, n’importe ki fason zot considere la vie, beaucoup dimoune pa kapav empeche zot-mem pou ena, seki Victor E. Frankl, enn neurologue autrichien ti decrire couma enn “sentiment kot nanyin pena sens ek kot tou vide” dan zot la vie.
Kifer beaucoup ena sa sentiment-la? Enn raison, c’est ki ena plusieurs million dimoune dan le monde ki pé vive dan bann situation terrible, bann condition ki faire leker faire mal. Toulé-jour zot levé dan la misere ek zot bizin faire face ar maladie, violence, ek ar bann dimoune ki faire dominere ar zot. Zot la vie vrai-mem “rempli ar difficulté,” pareil couma Job, ki ti vive dan le passé, ti dire concernant souffrance bann dimoune. (Job 14:1) Kitsoz pli important pou zot, c’est reussi vive zordi pou trouve demain.
Ena plusieurs million lezot dimoune ki ena plus l’argent ek zot vive plus en securité. Li parette ki zot ena tou seki zot bizin pou gagne enn vrai satisfaction dan la vie. Mais ena beaucoup ki pena sa satisfaction-la. Kifer? Parski souvent, ’malheur ek bann kitsoz ki faire di-tort,’ couma par exemple, bann probleme finance ki nou pa attann ou-soit bann grand malheur, couma la mort enn zenfant, detruire zot l’espoir ek zot bann rêve.—Psaume 90:10.
Ena enn lot kitsoz ki faire bann dimoune ena plus sa “sentiment kot nanyin pena sens ek kot tou vide[-la].” Ki été sa? La vie trop courte. Pou beaucoup dimoune, li pa logik ki bann humain, ki ena capacité pou faire enn quantité kitsoz, vive enn la vie bien courte coumsa. Zot pa arrivé comprend sa realité bien triste ar ki nou tou nou bizin faire face-la: mem si nou pa affecté par bann grand malheur dan nou la vie, pa zordi pa demain, la mort prend tou seki nou ena.—Ecclésiaste 3:19, 20.
Eski la vie touletan pou parette pena sens?
Le roi Salomon ki ti vive en Israël ti bien decrire sa situation-la. Li ti trouvé couma bann dimoune dan so lepok ti travail dur, zot ti servi zot talent ek zot capacité pou planté, construire, prend soin zot famille, pareil couma nou faire zordi. Apré, li ti pose sa question-la: ’A la fin kot tousala amenn nou?’ Ek finalement li ti dire ki tou seki dimoune faire, li “dan vide ek [coumadir] pé galope derriere di-vent.”—Ecclésiaste 2:17, The New English Bible.
Mais eski le roi Salomon ti pensé ki tou seki bann dimoune faire, ti pou touletan ’dan vide ek coumadir pé galope derriere di-vent’? Non. Li ti pé zis decrire dan enn fason realiste couma la vie été dan sa le monde imparfait-la. Selman, Parole ki Bondié inn inspiré kapav donne ou l’assurance ki bann kitsoz pa pou coumsa touletan!
Couma ou kapav gagne sa l’assurance-la? S’il vous plait, lire sa deux lartik apré-la. Sa bann lartik-la kapav aide ou pou comprend kifer la vie parette pena sens, couma sa situation-la pou changé, ek couma ou kapav trouve enn vrai sens dan ou la vie, asterla-mem.