Question bann lecteur . . .

▪ Non. La Bible dire dan enn fason bien clair: “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.”​—Actes 10:34, 35.

Dan sa domaine-la, pensée Bondié ena beaucoup plus valeur ki pensée bann dimoune imparfait. Beaucoup dimoune croire ki enn race (bien souvent zot prop race) li pli superieur ki lezot race. Sa fason pensée-la li pareil ar fason pensée Charles Darwin, ki ti ecrire: “Enn jour dan l’avenir, . . . pena doute ki bann race dimoune civilisé pou preské elimine net bann race sauvage ek pou remplace zot.” Li bien triste ki beaucoup finn victime bann mauvais traitement ar bann dimoune lezot race ki ti prend zot-mem pou pli superieur.

Eski li vaut la peine ki nou considere nou race pli superieur ki lezot? Par exemple, eski la science inn prouvé ki certain race pli superieur lor plan genetik, alors ki lezot race zot inferieur? Non, au contraire, Bryan Sykes, enn professeur dan l’université Oxford, ki etudié bann gène dire: “Pena okenn base genetik pou classe [bann dimoune] dan enn fason precis dapré zot l’origine ou-soit zot race. . . . Souvent [bann dimoune] demann moi si ena enn ADN grec ou-soit enn gène italien, mais, bien sur ki pena. . . . Nou [tou nou] bien proche.”

Sa bann decouverte-la zot en accord avek seki nou lire dan la Bible. La Bible enseigne nou ki Bondié ti crée zis enn zom ek enn femme, ek tou lezot dimoune zot bann descendant sa premier couple-la. (Genèse 3:20; Actes 17:26) Alors devant Jéhovah ena zis enn sel race​—race humain.

Jéhovah pa donne okenn l’importance couleur la peau ou-soit trait enn dimoune. Au contraire, Li donne l’importance enn kitsoz ki ena beaucoup plus valeur​—nou leker symbolik, ou-soit seki nou été endan. Li dire: “Bann dimoune juge lezot dapré zot l’apparence, mais moi mo juge bann dimoune par seki ena dan zot leker.” (1 Samuel 16:7, Contemporary English Version) Kan nou garde sa verité-la dan nou l’esprit sa kapav bien encourage nou. Couma?

N’importe ki race nou été, beaucoup parmi nou pa satisfait avek certain l’aspect dan nou l’apparence physik, pourtant nou ena bien tigit pouvoir pou change sa bann kitsoz-la. Mais selman, nou kapav ameliore seki ena plus l’importance​—bann pensée ek bann sentiment ki ena dan nou leker. (Colossiens 3:9-11) Si nou honnete avek nou-mem, kitfois nou pou rann-nou compte ki nou ena tendance pou senti-nou, soit inpé pli superieur, soit inpé pli inferieur ki bann dimoune enn lot race. Sa deux fason pensée-la zot pa en accord avek pensée Bondié, alors nou bizin travail dur pou tire sa qualité sentiment-la dan nou leker.​—Psaume 139:23, 24.

A mesure ki nou faire zeffort pou trouve nou-mem ek lezot dimoune pareil couma Jéhovah, nou kapav sur ki Li pou aide nou. So Parole donne nou sa rappel-la: “En seki concerne Jéhovah, so lizié pé guette partout lor la terre pou montré so la force en faveur bann dimoune ki ena enn leker complet envers Li.” (2 Chroniques 16:9) Sa bann parole-la, zot appliké ar nou tou, n’importe ki race nou été.