Eski reponse sa question-la li important?

“Mo ti ena dix an kan mo ti commence sorti avek bann garson. Au commencement, nou ti zis trappe la main ek embrassé. Mais bien vite, nou ti pé caresse bann partie intime sakenn nou camarade ek nou ti essaye plusieurs pratik sexuel. Kan mo ti ena 15 an, mo ti commence travail. Bann zom dan mo travail ti aborde moi parski zot ti envie gagne bann relation sexuel. Mo ti envie montré ki mo pa ti peur nanyin ek mo ti participe dan n’importe ki kitsoz ki mo bann camarade travail ti pé faire. Mo ti envie ki zot accepté moi ek sa ti amenn moi pou gagne plus relation sexuel.”​—SARAH,a AUSTRALIE.

ESKI ou ti pou etonné si ou aprann ki Sarah finn grandi dan enn famille bien religieux? So bann parent ti essaye elevé li en accord avek bann principe moral ki ena dan la Bible. Mais Sarah ti prefere agir dan enn lot fason.

Beaucoup dimoune approuve choix ki Sarah ti faire. Zot croire ki seki la Bible dire lor relation sexuel li nepli la mode. Pou lezot, pena nanyin de mal pou dire ki zot enn dimoune religieux ek en mem temps, contigne amenn enn la vie kot zot gagne relation sexuel kan zot envie.

Eski li important ki ou koné seki la Bible enseigné lor relation sexuel ek ou vive en accord avek sa? La Bible dire ki li “inspiré par Bondié, ek li utile pou enseigné.” (2 Timothée 3:16) Si ou croire ki Bondié ti crée bann dimoune ek ki la Bible c’est so Parole ki Li’nn inspiré, alors li vaut la peine ki ou koné seki la Bible dire lor sa sujet-la.

Malheureusement, beaucoup dimoune faire confusion lor seki la Bible enseigné concernant relation sexuel. Bann chef religieux enseigne bann different l’idée lor relation sexuel ek zot pretann ki sa bann l’idée-la basé lor la Bible. Mais, sa sujet-la finn divise beaucoup grand religion la chretienté.

Au lieu ki ou ecoute seki lezot dire, kifer ou pa prend enn ti moment pou faire bann recherche lor sa sujet-la par ou-mem? Prochain lartik examine dix question ki souvent bann dimoune posé concernant seki la Bible dire lor relation sexuel. Dan sa lartik-la, ou pou trouve bann reponse franc ki basé lor seki la Bible enseigné vrai-mem. Dernier lartik dan sa serie-la pou montré nou kifer bann choix ki nou faire zot important.

[Note]