Question bann lecteur . . .

▪ Beaucoup paret faire bann grand zeffort pou protege zot zenfant pou zot pa attrape bann maladie grave. Bann parent bizin faire mem zeffort pou protege zot zenfant ar enn conduite ki pou faire zot di-tort. Enn fason pou faire sa c’est kan zot donne zot zenfant enn bon l’education lor plan sexuel. (Proverbes 5:3-23) Li bien important ki bann parent donne zot zenfant sa qualité formation-la ek guide zot en rapport avek conduite ki zot bizin ena. Kifer? Parski pli allé, bann zenfant rente en contact avek bann kitsoz ki koz lor sexe dan television ek lor Internet, dan bann livre.

Enn ecrivain ki aussi enn professeur l’education, ki appel Diane Levin ti ecrire: “Zordi, nou probleme, c’est pa parski nou bann zenfant pé aprann lor sexe, mais probleme-la c’est, ki kitsoz zot pé aprann, ki l’age zot pé aprann sa, ek kisannla ki pé enseigne zot. L’education sexuel ki nou bann zenfant pé gagné ar bann vendeur ek ar seki bann dimoune pé enseigné lor sexe, li bien profond ek sa faire zot di-tort.”

Bann parent bizin protege zot bann zenfant pou ki zot pena mem pensée deformé ek immoral ki bann dimoune ena lor sexe ek ki pé gate la societé. (Proverbes 5:1; Éphésiens 6:4) Bann jeune zenfant bizin koné couma zot lekor fonctionné, couma pou prend zot-mem soin lor plan physik, ek couma pou protege zot-mem kont bann dimoune immoral. Avant li faire croissance​—enn l’age kot bann signe ki zot pé grandi lor plan sexuel, commence parette​—enn tifi bizin koné ki bann changement ki pou ena dan so lekor. Li bizin comprend aussi kifer enn tifi gagne regle ek couma sa passé. Enn garson aussi bizin konn bann kitsoz lor ecoulement sperme ki arrivé pendant la nuit, ki certain appel “ rêve humide ” ou-soit “wet dreams.” Kan bann zenfant encore tipti, bann parent kapav enseigne zot couma bann partie zot lekor appelé exactement. Bann parent ki content zot zenfant enseigne zot trois kitsoz ki bien important concernant sa bann partie zot lekor-la: (1) Zot privé. (2) Fodé pa koz lor la dan enn mauvais fason. (3) En general, fodé pa zot laisse personne touche sa ou-soit montré sa lezot. A mesure ki bann zenfant vinn pli grand, bann parent bizin koné kan pou explik zot couma enn femme tombe enceinte.a

Kan eski bann parent bizin commence enseigne sa zot bann zenfant? Pli boner ki beaucoup pensé. Enn tifi kapav commence gagne so regle l’age 10 an, kitfois-mem avant. Enn garson kapav gagne so premier ecoulement sperme la nuit, depuis l’age 11 an ou-soit 12 an. Sa bann l’evenement ki change la vie enn dimoune-la, kapav bien bouleverse bann zenfant si zot pa comprend seki pé arrive zot. Bann parent bizin rassure zot zenfant bien a l’avance ki pena nanyin mauvais avek sa bann developpement naturel ki passé dan zot lekor-la. C’est aussi ler pou faire zot comprend ki bann principe moral ki ena dan la Bible zot ena valeur ek li important ki zot suive sa​—enn kitsoz ki la plupart programme lor l’education sexuel ki le monde donné, pa faire.​—Proverbes 6:27-35.

[Note]