Ki bann chretien bizin faire zordi?
BANN vrai chretien zordi pa participe dan politik. Kifer? Parski zot suive l’exemple Jésus. Li ti dire lor li-mem: “Mo pa faire partie dan le monde.” Concernant so bann disciple, li ti dire: “Zot pa faire partie dan le monde.” (Jean 15:19; 17:14) Anou guette deux-trois raison kifer fodé pa ki bann chretien implik-zot dan politik.
1. Capacité bann dimoune, limité. La Bible dire ki bann dimoune pena ni capacité ni droit pou dirige zot par zot-mem. Prophete Jérémie ti ecrire: “Enn dimoune ki pé marché pa finn crée pou dirige so pas.”—Jérémie 10:23.
Pareil couma Bondié pa ti crée bann dimoune pou ki zot reussi envolé par zot-mem, alors, Li pa ti crée zot pou reussi dirige zot par zot-mem. Historien David Fromkin ti koz lor bann limite ki bann gouvernement ena ek li ti faire sa remark-la: “C’est bann humain ki forme partie dan bann gouvernement; a cause sa, zot faire bann erreur ek zot l’avenir pa sur. Zot ena enn certain pouvoir, mais zis enn pouvoir limité.” (La question du gouvernement, en anglais) Li pa etonnant ki la Bible mette nou en garde pou nou pa mette nou confiance dan bann zom!—Psaume 146:3.
2. Bann mauvais l’esprit ena enn l’influence dan nou lepok. Kan Satan ti offert Jésus pouvoir pou dirige le monde, Jésus pa ti dire ki Satan pena pouvoir pou donne li tou bann royaume ki ena dan le monde. En realité, dan enn lot l’occasion, Jésus ti appel Satan “chef le monde.” Plusieurs l’année apré, l’apotre Paul ti decrire Satan couma “bondié sa systeme-la.” (Jean 14:30; 2 Corinthiens 4:4) Paul ti ecrire so bann compagnon chretien: “Nou bizin lutté, . . . kont bann dirigeant le monde ki dan sa noirté-la, kont bann mauvais l’esprit ki trouve dan le ciel.” (Éphésiens 6:12) Sans ki bann dimoune koné, c’est bann mauvais l’esprit ki en realité pé dirige sa le monde-la. Ki l’effet sa bizin ena lor fason ki nou considere politik?
Reflechi lor sa comparaison-la: pareil couma bann courant bien fort ki ena dan la mer, pousse bann ti bateau, bann mauvais l’esprit ki bien puissant, pousse kot zot envie bann dirigeant politik sa le monde-la. Ek pareil couma bann marin dan sa bann bateau-la pa kapav faire nanyin pou change sa bann courant-la, bann politicien pa kapav faire nanyin pou change l’influence ki sa bann mauvais l’esprit-la ena. Sa bann l’esprit-la bien decidé pou faire bann dimoune faire le mal ek pou amenn “malheur [lor] la terre.” (Révélation 12:12) Alors, c’est zis enn kikenn ki beaucoup pli puissant ki Satan ek so bann demon ki pou kapav amenn enn vrai changement lor la terre. Sa Kikenn-la c’est Jéhovah Li-mem.—Psaume 83:18; Jérémie 10:7, 10.
3. Bann vrai chretien soumette zis ar Royaume Bondié. Jésus ek so bann disciple ti koné ki dan ler ki Bondié inn fixé, Li ti pou etabli enn gouvernement dan le ciel pou dirige la terre entier. La Bible appel sa gouvernement-la Royaume Bondié ek montré ki so le roi c’est Jésus Christ. (Révélation 11:15) Sa Royaume-la concerne tou dimoune, a cause sa-mem ki l’enseignement Jésus ti basé surtout lor “la bonne nouvelle lor royaume Bondié.” (Luc 4:43) Li ti aussi enseigne so bann disciple pou faire sa la priere-la: “Ki to royaume vini.” Kifer? Parski kan sa Royaume-la pou dirigé, pena okenn doute ki volonté Bondié pou faire dan le ciel ek lor la terre.—Matthieu 6:9, 10.
Mais lerla, ki pou arrive bann gouvernement humain? La Bible reponn ki bann gouvernement “lor la terre entier” pou detruire. (Révélation 16:14; 19:19-21) Si enn dimoune vrai-mem croire ki Royaume Bondié bientot pou tire tou bann systeme politik, alors li logik ki li pa pou soutenir sa bann systeme politik-la. Apré tou, si li essaye soutenir bann gouvernement humain ki’nn condamné, en realité, li pou oppose-li ar Bondié.
Alors, bann vrai chretien pa participe dan politik, mais eski sa vedir ki zot pa interessé pou ameliore la societé kot zot pé vive? Examine reponse ki trouve dan prochain lartik.
[L’encadré page 6]
Bann Témoins de Jéhovah bien occupé pou soutenir Royaume Bondié, pa pou change bann gouvernement politik