“To Finn Faire Bann Tibaba Konn Sa”

Eski ou envie konn la verité lor Bondié​—kisannla Li été, seki Li content ek seki Li detesté, ek ki so volonté? Dan so Parole, la Bible, Jéhovah nou Bondié faire nou konn tou la verité lor Li. Mais, sa pa vedir ki n’importe kisannla ki lire la Bible pou bien comprend sa la verité-la. Kifer? Parski c’est zis certain dimoune ki gagne privilege pou comprend sa verité spirituel-la; pa zot tou. Anou guetté ki Jésus ti dire lor la.​—Lire Matthieu 11:25.

Sa verset-la commence par sa bann parole-la: “Lerla Jésus ti dire.” Alors, seki Jésus ti pé al dire kitfois ti ena enn rapport avek seki ti fek arrivé. Li ti fek reprend bann dimoune ki ti reste dan trois la ville Galilée parski zot ti indifferent ar bann mirak ki li ti faire. (Matthieu 11:20-24) Kitfois ou pé demann-ou-mem: ‘Couma enn dimoune kapav trouve bann mirak Jésus mais pa accepté bann verité ki li enseigné?’ Sa bann dimoune-la pa ti accepté message Jésus parski sa pa ti touche zot leker.​—Matthieu 13:10-15.

Jésus ti koné ki nou bizin deux kitsoz pou comprend la verité lor Bondié: l’aide Bondié ek enn leker ki humble. Jésus ti expliké: “Devant tou dimoune, mo loué toi Papa, Seigneur le ciel ek la terre, parski to finn cachiette sa bann kitsoz-la ar bann dimoune ki ena la sagesse ek bann intellectuel, ek to finn faire bann tibaba konn sa.” Eski ou trouvé kifer zis certain dimoune ki ena privilege pou comprend la verité spirituel ki ena dan la Bible? En accord avek so volonté, Jéhovah, “Seigneur le ciel ek la terre,” ena droit pou decidé ar kisannla Li envie faire konn la verité. Mais Bondié pa faire preference kan Li bizin faire bann dimoune konn la verité. Lor ki kitsoz Li base-Li pou faire certain konn la verité ki ena dan la Bible ek lezot non?

Jéhovah donne so faveur bann ki humble, pa bann ki ena l’orgueil. (Jacques 4:6) Li cachiette la verité “ar bann dimoune ki ena la sagesse ek bann intellectuel”​—bann ki ena sagesse sa le monde-la ek bann ki ena enn grand l’education pa trouve l’importance pou rod l’aide Bondié parski zot fiere ek compte lor zot-mem. (1 Corinthiens 1:19-21) Mais Li faire “bann tibaba” konn la verité​—bann ki vinn vers Li avek enn leker sincere, ki montré l’humilité pareil couma enn zenfant. (Matthieu 18:1-4; 1 Corinthiens 1:26-28) Jésus, Garson Bondié, ti zwenn toulé-deux categorie dimoune. Beaucoup bann chef religieux ki ti fiere ek ti ena enn grand l’education pa ti comprend message Jésus, mais bann simple pecheur ki ti ena l’humilité ti comprend. (Matthieu 4:18-22; 23:1-5; Actes 4:13) En mem temps, certain dimoune riche ki ti ena enn grand l’education ti manifesté enn vrai l’humilité ek ti vinn bann disciple Jésus.​—Luc 19:1, 2, 8; Actes 22:1-3.

Anou ré-guette question ki ti soulevé dan commencement sa lartik-la: Eski ou envie konn la verité lor Bondié? Si oui, kitfois sa rassure-ou pou koné ki Bondié pa favorise bann ki considere-zot couma bann dimoune sage dan sa le monde-la. Au contraire, Li donne so faveur bann dimoune ki kitfois bann sage sa le monde-la meprisé. Si ou etudié Parole Bondié avek enn l’esprit ek enn leker humble, kitfois ou pou trouve-ou parmi bann ki Jéhovah donne enn cadeau ki ena enn grand valeur​—possibilité pou konn la verité lor Li. Kan ou comprend la verité ki ena dan la Bible, sa pou permette ou ena enn la vie ki ena sens depuis asterla-mem ek faire ou “saisi vrai la vie”​—enn la vie pou touletan dan le monde nouveau kot pou ena la justice, ki Bondié inn promette pou ena bientot.a​—1 Timothée 6:12, 19; 2 Pierre 3:13.