Lamor Fer Soufer

Bann dimounn santi zot malalez pou koz lor lamor. Boukou pa kontan koz lor la. Me pa zordi pa demin, nou pou bizin fer fas ar sa sitiasion-la. Kan enn dimounn mor, sa fer nou leker fermal ek fer nou soufer boukou.

Nanye pa pou kapav vremem prepar nou pou fer fas ar douler ki nou pou gagne kan enn paran, enn konzwin, ouswa enn zanfan mor. Enn maler kapav arive enn sel kout san ki nou atann, ouswa arive apre enn long peryod letan. Me dan toulede ka, nou pa kapav evit douler ki lamor amene, ek alafin sa fer nou soufer boukou.

Antonio, ki ti perdi so papa dan enn aksidan larout, explike: “Se koumadir enn kikenn inn ferm ou lakaz akle ek inn pran bann lakle-la inn ale. Ou pa kapav retourn kot ou, mem pou enn ti moman. Res zis ou bann souvenir. Se koumsa ki lavi ete asterla. Mem si ou pa pe rod aksepte sa​—parski pou ou sa li inzis​—pena nanye ki ou kapav fer.”

Dorothy osi ki ti pas par sa sitiasion-la kan li ti vinn vev laz 47 an, ti bien deside pou rod bann repons. Li ti enn profeser dan enn lekol relizie ki fer dan Dimans, alor, zame li ti panse ki tou fini avek lamor. Me li pa ti ena bann repons sir. Li ti demann so pret Anglikan: “Ki ariv nou kan nou mor?” So pret ti reponn li: “Personn pa vremem kone. Nou bizin zis atann ek gete.”

Eski nou’nn kondane zis pou “atann ek gete”? Eski ena enn mwayin kot nou kapav vremem kone si tou fini avek lamor?