Eski To Ti Kone?

Dan Labib, ki mo “eunuque” vedir?

Parfwa, sa mo-la kapav fer referans ar enn zom ki’nn kastre. Dan lepok Biblik, ti kastre sertin misie pou pini zot ouswa kan zot lennmi ti trap zot ouswa kan ti fer zot vinn esklav. Ti servi sertin misie ki ti’nn kastre ek ki ti kapav fer konfians pou siperviz bann arem dan bann sato. Par exanp, de eunuque ki ti apel Egay ek Sasgaz ti servi kouma gardien bann madam ek bann konkibinn Asieris, Lerwa Pers. Se sa lerwa lamem ki bann dimounn panse ti Zerses I^e.​—Ester 2:3, 14.

Selman, pa tou bann ki Labib apel eunuque ki ti kastre. Sertin biblis dir ki ti osi servi sa term-la pou fer referans ar enn fonksioner dan lakour lerwa. Li paret ki se dan sa sans-la ki ti servi sa term-la pou Ebed-melek, enn kikenn ki ti ed Zeremi, ek pou sa Etiopien ar ki evanzelizater Filip ti prese la. Li kler ki Ebed-melek ti enn gran fonksioner parski li ti gagn akse direk ar Lerwa Sidkiya. (Zeremi 38:7, 8) Ek Etiopien-la li, li ti ansarz trezor Larenn Kandas ek li “ti vinn Zerizalem pou ador Bondie.”​—Zistwar Bann Apot 8:27.

Kifer bann berze dan lepok Biblik ti separ bann mouton ar bann kabri?

Kan Zezi ti pe dekrir enn lepok zizman ki ti pou ena dan lavenir, li ti dir: “Kan Garson Limanite vini dan so laglwar . . . li pou separ bann dimounn sakenn so kote, parey enn berze separ mouton ek kabri.” (Matie 25:31, 32) Kifer bann berze ti separ sa bann zanimo-la?

Pandan lazourne, normalman ti les bann mouton ek bann kabri res ansam ek manze ansam. Aswar, ti met zot dan lanklo pou protez zot kont bann zanimo sovaz, bann voler, ek freser. (Zenez 30:32, 33; 31:38-40) Me ti separ sa de kalite zanimo la dan de lanklo diferan. Koumsa, bann kabri ki inpe agresif pa ti pou kapav fer ditor bann mouton ki inpe trankil-trankil, sirtou bann femel ek bann tipti. Liv Tou Kitsoz dan Labib (angl.) dir ki bann berze-la ti osi separ bann mouton ar bann kabri kan bann mouton “ti pe met ba, ti pe donn dile zot tipti, ek kan ti pe raz zot pwal.” Lexanp ki Zezi ti servi ti baze lor bann kitsoz ki bann dimounn dan ansien Izrael ti abitie trouve ouswa fer, parski ti ena boukou berze ki ti pe swagn mouton ek kabri.