Eski To Ti Kone?

Dan lepok Biblik, ki travay enn administrater ti fer?

DAN lepok Biblik, enn administrater ti ansarz lakaz ouswa dibien enn lot dimounn.

Kan Zozef, garson Zakob, ti enn esklav dan Lezip, Zozef ti ansarz lakaz so met. Anplis, so met ki ti enn Ezipsien, “ti les tou dan lame Zozef.” (Zen. 39:2-6) Plitar, kan Zozef limem ti vinn enn dirizan pwisan dan Lezip, li ti met enn administrater ansarz so lakaz.​—Zen. 44:4.

Dan lepok Zezi, bann proprieter karo souvan ti res dan bann lavil ki bien lwin ar zot karo. Alor, sa bann proprieter-la ti etabli bann administrater lor bann travay ki ti bizin fer toulezour dan zot karo.

Kisannla ti kalifie pou fer travay enn administrater? Columella, enn ekrivin Romin ki ti viv dan premie siek, explike ki enn esklav ki ti gagn responsabilite pou vinn enn administrater ti “enn kikenn ki ti aprann fer travay-la bien.” Li ti enn dimounn ki ti pou “fer sir ki bann travayer fer zot travay san ki li kriel avek zot.” Columella explike osi ki seki pli inportan pou enn administrater se ki fode pa li panse ki li konn tou kitsoz ek ki li bizin touletan ena dezir pou aprann bann nouvo kitsoz.

Labib servi lexanp enn administrater ek travay ki li fer pou explik sertin responsabilite ki ena dan lasanble Kretien. Par exanp, lapot Pier ankouraz bann Kretien pou servi bann kapasite ki Bondie inn donn zot “pou ed sakenn [zot] kamarad kouma bann bon administrater faver Bondie, faver ki personn pa merite.”​—1 Pier 4:10, NW.

Zezi osi ti servi lexanp enn administrater dan Lik 16:1-8. Anplis, dan enn profesi konsernan sign ki pou montre so prezans antan ki Lerwa, Zezi ti donn so bann disip lasirans ki li ti pou etabli enn “esklav fidel ek saz,” ouswa enn “administrater fidel.” Responsabilite prinsipal sa administrater-la se pou kontign nouri bann disip Zezi Kris lor plan spiritiel dan lepok lafin. (Mat. 24:45-47, NW; Lik 12:42) Nou bien rekonesan ki nou gagn bann piblikasion ki sa administrater fidel la prepare ek distribie dan lemond antie, pa vre!