Paran—Kontiyn Devlop Bann Bon Labitid dan Leker U Zanfan
1 Nu pa ne avek bann bon labitid, ni nu gayn sa par sans. Anplis, sa pran letan pu devlop bann bon labitid dan leker bann zanfan. “Kontiyn devlop” vedir “transmet tigit par tigit” uswa “gut par gut.” Bann paran bizin tuletan gard mem latitid pu ki zot “elve zot [zanfan] dan disiplinn ek bann manyer panse Zeova.”—Efezyin 6:4.
2 Kumanse Kan Zot Byin Tipti: Bann ti zanfan ena enn kapasite extraordiner pu aprann ek pu fer bann nuvo kitsoz. Suvan bann gran gayn difikilte pu aprann enn nuvo lang, me purtan bann zanfan dan lekol maternel kapav aprann de uswa trwa lang an mem tan. Zame pa panse ki u zanfan tro zenn pu devlop bann bon labitid. Si enn zanfan gayn lanseynman Labib depi ki li ankor tipti, ek si lanseynman la kontinye, ebyin kan li pu grandi, so lespri pu ranpli avek konesans ki pu fer li vinn “saz pu delivrans.”—2 Timote 3:15.
3 Fer Predikasyon Vinn enn Labitid: Pres regilyerman bon nuvel Rwayom Bondye, sa li enn bon labitid ki kapav fer enn zanfan devlope pandan bann lane kot li gayn formasyon. Buku paran finn kumans fer sa, kan zot finn amenn zot zanfan dan predikasyon lakaz-lakaz, malgre ki zot ankor tibaba. Si bann paran rann temwanyaz regilyerman, sa pu ed zot zanfan devlop lazwa ek zel pu minister. Zot kapav montre zot zanfan kuma rann temwanyaz dan ninport ki form predikasyon.
4 Si bann zanfan partisip dan Lekol Minister Teokratik, sa pu enn lot led ankor. Lekol la anseyn zot bann bon labitid pu etidye ek konpran kan lir. Zot aprann kuma pu fer konversasyon lor Labib, kuma fer bann vizit, ek kuma pu diriz bann letid Labib. Enn trening kumsa kapav fer zot gayn dezir pu vinn pyonye ek pu gayn bann lezot privilez servis spesyal. Buku Betelit ek misyoner kontan rapel zot bann premye size dan Lekol, ek zot konsider sa kuma enn laranzman ki finn ed zot pu devlop bann bon labitid.
5 Nu kuma dir larzil dan lamin Zeova, Gran Potye. (Izai 64:8) Plis larzil fre, plis li fasil pu donn li enn form. Me plis li sek, pli li vinn dir. Bann dimunn usi parey. Kan zot zenn, li pli fasil pu form zot—ek plis zot zenn, plis bann rezilta la bon. Kan zot ankor byin tipti, sa mem laz ki bon pu donn zot enn form, ki li bon uswa move. Si u enn paran ki pran kont u bann zanfan, abe depi byin boner kumans devlop dan zot leker bann bon labitid dan minister Kretyin.