Zeova Donn Lafors
1 Ki u linpresyon lor lapot Pol? Kan nu lir liv Akt, nu apresye ki kantite zel li ti ena pu servis Zeova. Kuma eski Pol finn kapav realiz tusala? Li finn dir: “Pu tu kitsoz mo ena kuraz grasa sa Kikenn ki donn mwa lafors la.” (Filipyin 4:13) Nu’si nu kapav gayn lafors ki Bondye done. Kuma? Kan nu profit sis laranzman ki Li fer pu redonn nu lavi ek lafors lor plan spirityel.
2 Parol Bondye: Parey kuma nu bizin manze pu nu ena lafors dan nu lekor, nu bizin nuri nu avek Parol Bondye usi pu nu res vivan lor plan spirityel. (Matye 4:4) Labib donn nu lafors pu nu res for. Pu gard nu zel ek nu lantuzyas pu laverite, nu bizin si posib tulezur, ena enn letid personel serye, ek nu bizin medite.—Psom 1:2, 3.
3 Lapriyer: Li inportan pu vinn pros ar Zeova, sirtu dan bann moman kot nu byin bizin Li. Par mwayin so lespri, Li donn lenerzi tu bann ki demann Li dan lapriyer. (Lik 11:13; Efezyin 3:16) Labib ankuraz nu pu “persevere dan lapriyer.” (Romin 12:12) Eski u fer sa?
4 Kongregasyon: Nu gayn usi lafors ek lankurazman kan nu asiste bann reynion ek kan nu frekant nu bann frer ek ser. (Ebre 10:24, 25) Kan nu dan problem, zot ankuraz nu pu nu kapav debut lor nu lipye, ek avek lamur zot ed nu.—Proverb 17:17; Eklezyast 4:10.
5 Predikasyon: Partisip regilyerman dan predikasyon ed nu pu fixe nu lespri lor Rwayom ek so bann benediksyon. Nu gayn kuraz kan nu ed lezot pu konn Zeova. (Akt 20:35) Pa tu parmi nu ki kapav al servi kot ena gran bezwin, uswa fer servis aplintan, me nu tu, nu kapav partisip plis dan minister dan lezot fason.—Ebre 6:10-12.
6 Bann Sirveyan Kretyin: Nu tir profi kan bann ansyin ankuraz nu ek ed nu. Zeova finn donn zot responsabilite pu pran swin so trupo. (1 Pyer 5:2) Bann sirveyan ki vizit bann kongregasyon fortifye bann kongregasyon kot zot ale, parey kuma Pol ti pe fer dan so lepok.—Romin 1:11, 12.
7 Legzanp Bann Ki Finn Res Fidel: Li ankurazan pu pran kont legzanp bann serviter fidel lontan ek dan nu lepok. (Ebre 12:1) Kan u bizin kuraz, kifer eski u pa lir enn parmi bann zistwar ankurazan ki truv dan nu bann magazinn, uswa enn resi fortifyan dan L’Annuaire, uswa ankor enn parmi bann resi interesan lor listwar modern bann Temwin Zeova dan liv Prédicateurs?
8 Enn frer, ki ena plis ki 90 an, ti aksepte laverite kan li ti ankor tipti. Alor ki li ti ankor enn ti garson, so lafwa finn pas dan leprev. Dabor, sertin parmi bann ki ti byin aktif dan lorganizasyon Zeova finn kit laverite. Apre sa, li ti truv predikasyon lakaz-lakaz difisil. Mem sa, li finn tuletan kont lor Zeova. Alor, li pa finn tarde pu apresye so minister. Ek zordi? Malgre ki so lasante pa tro bon, li tuzur enn manb fami Betel Brooklyn, ek li pe servi kuma enn manb Konsey Direkter. Li pa regret ditu ki li finn res atase ar lorganizasyon Zeova.
9 Enn ser ki manb fami Betel Angleter ti batize laz 13 an. Lane apre so batem, li finn kumans fer servis pyonye avek so gran frer. Me lane answit, so papa finn al dan prizon parski li pa finn pran par dan Dezyem Lager Mondyal. Ser la finn kontiyn kont lor Zeova pu gayn lafors, ek li finn kontiyn servi vre Bondye. Avek letan, li finn marye avek enn frer fidel, ek ansam zot finn kontiyn fer volonte Zeova. Apre 35 an maryaz, enn ku so mari finn mor. La usi, Zeova finn donn li kuraz, ek ziska zordi li pe kontiyn servi Zeova, avek lintansyon pu tuletan servi kuma enn manb fami Zeova lor later.
10 Zeova ed so bann serviter fidel ek Li fortifye zot. “Li donn lafors seki fatige; ek kikenn ki pena lenerzi ditu, Li donn li kuraz an abondans.” Si nu profit sa sis laranzman ki finn mansyone lao la, nu pu kapav gayn sa lasurs lafors ki zame pa fini. Mazinn sa: “Bann ki kont lor Zeova pu regayn lafors. . . . Zot pu galupe, ek zot pa pu feb; zot pu marse ek zot pa pu fatige.” (Izai 40:29-31) Pol ti kont buku lor Zeova pu li gayn kuraz, alor nu’si, nu bizin fer parey.