“Nu Finn Travay Nu Teritwar Plizir Fwa!”
1 Eski u finn deza ena linpresyon ki u telman travay u teritwar suvan ki nepli ena okenn dimunn byin dispoze ki reste? Kitfwa u finn rezonn kumsa: ‘Mo kone kuma bann dimunn la pu reazir. Kifer eski nu bizin kontiyn return get bann dimunn ki pa interese?’ Li vre ki suvan nu fer mem teritwar. Me fode pa nu ena enn latitid negatif akoz sa, okontrer nu bizin pozitif. Kifer? Anu get kat rezon pu sa.
2 Zeova Finn Ekut Nu Bann Lapriyer: Zezi finn dir: “Vremem, rekolt la gran, me bann travayer tigit. Donk, sipliy Met rekolt pu avoy bann travayer dan rekolt.” (Lik 10:2) Depi plizir banane nu finn sipliy Zeova pu nu gayn plis led. Asterla dan buku landrwa, nu finn gayn sa bann travayer ki ti manke la. Alor, nu pe kapav kuver bann teritwar pli suvan. Pwiski Zeova finn reponn nu bann lapriyer, eski sa li pa enn rezon pu nu rezwir?
3 Perseverans Raport Bann Bon Frwi: Mem dan bann teritwar kot suvan prese, ankor ena dimunn ki pe pran kont mesaz Rwayom ek ki pe aksepte gayn enn konesans laverite. Donk, nu bizin kontiyn vizit bann dimunn ankor ek ankor dan lespwar pu truv bann dimunn ki ena enn leker onet. (Izai 6:8-11) Parey kuma bann premye disip Zezi ti fer, “kontiyn al” get bann dimunn dan u teritwar, ek fer zefor pu ogmant zot lintere pu Rwayom Bondye.—Matye 10:6, 7.
4 Dan Portigal (Portugal) buku kongregasyon kuver zot teritwar sak semenn, me purtan zot ankor pe truv bann dimunn byin dispoze. Enn ser ti sirtu gard enn latitid pozitif. Li dir: “Mo priye Zeova tulegramatin avan mo al prese, mo demann Li ed mwa pu truv enn kikenn ki interese pu etidye Labib.” Enn zur li finn fer laranzman pu fer letid avek bann dimunn ki travay dan enn salon kwafer. Me plitar, zis enn parmi sa bann dimunn la finn vini pu etidye ek li finn dir ser la: “Bannla pa interese, me mwa wi.” Dan enn mwa etidyan la li mem ti pe diriz de letid Labib. Apre sa, li finn pran batem, ek plitar li finn pran servis pyonye!
5 Travay La Pe Fer: Bon nuvel pe prese, parey kuma Zezi ti anonse. (Matye 24:14) Mem dan bann plas kot bann dimunn “ pa anvi ekut [nu],” zot pe gayn enn lavertisman atraver nu travay predikasyon. Nu kone ki ena pa pu ekute uswa mem zot pu kont laverite. Me, nu bizin byin averti zot ki zizman Zeova pe vini.—Ezekyel 2:4, 5; 3:7, 8, 19.
6 Nu Pankor Fini: Pa nu ki deside kan bizin aret travay predikasyon. Zeova kone egzakteman kan li bizin fini. Li kone si dan nu teritwar ena dimunn ki ankor kapav aksepte mesaz bon nuvel. Zordi, buku dimunn dir zot pa interese, me bann gran sanzman dan zot lavi—par egzanp perdi travay, enn maladi grav, lamor enn kikenn ki zot kontan—kapav fer zot pran nu mesaz pli kont apre. Akoz zot ena enn move lopinyon lor nu uswa zot tro okipe pu ekute, buku dimunn pa finn gayn zame lokazyon pu ekut nu mesaz. Si nu fer bann ti vizit amikal regilyerman, sa kapav fer zot pran kont ek ekute.
7 Bann ki finn grandi pandan bann lane ki finn pase ek ki asterla ena zot prop fami, ena enn vizyon pli serye lor lavi. Zot pe poz bann kestyon ki zis Parol Bondye kapav reponn. Enn fwa, enn zenn madam finn invit de ser Temwin kot li ek li finn dir zot: “Kan mo ti tipti, zame mo ti kapav konpran kifer tuletan mo mama ti pus bann Temwin ek li dir zot ki li pa interese, alor ki sa bann Temwin la ti tu sinpleman ule koz lor Labib. Mo finn donk deside ki kan mo pu vinn gran, ek kan mo pu fini marye ek ena mo prop lakaz, mo pu invit bann Temwin Zeova kot mwa ek mo dir zot explik mwa Labib.” Alor, sa mem seki li finn fer, ek sa finn fer sa bann Temwin ki ti vizit li la buku plezir.
8 Eski U Kapav Gayn Pli Bon Rezilta? Suvan, pa zis bann dimunn dan teritwar ki fer nu travay paret dir. Defwa, nu mem ki responsab. Eski nu ena bann lide negatif kan nu kumans prese? Sa kapav afekte nu latitid, nu lavwa ek lexpresyon nu figir. Montre enn lespri pozitif ek enn bon figir. Sey enn nuvo fason pu abord bann dimunn. Varye u prezantasyon, ek fer zefor pu amelyor li. Kitfwa u kapav poz enn lot kestyon dan u lintrodiksyon uswa servi enn lot pasaz Labib dan u konversasyon. Demann bann lezot frer ek ser seki fer zot gayn pli bon rezilta dan zot teritwar. Pres avek diferan proklamater ek pyonye, ek note ki fer zot gayn bon rezilta dan zot minister.
9 Zeova apruv travay predikasyon Rwayom ek Li beni li. Nu partisipasyon dan sa travay la pruve ki nu kontan Zeova ek nu kontan nu prosin. (Matye 22:37-39) Donk, anu akonpli nu travay ziska li fini, ek pa les fatig gayn nu si nu bizin travay enn teritwar plizir fwa.