Kestyon Ki Suleve

◼ Si nu anvi servi nu bann piblikasyon avek sazes, ki bann kitsoz nu bizin pran an konsiderasyon kan nu ofer piblikasyon lor lavwa piblik?

Kan nu fer lavwa piblik, li bon ki nu ena bann magazinn uswa bann lezot piblikasyon dan nu lame, avek lobzektif pu kumans enn konversasyon avek bann dimunn. Kumsa, nu kapav diserne si sa dimunn ki nu finn zwenn la interese ek si li pu aksepte pu lir nu bann magazinn. Li ti pu pli bon ankor si nu kapav koz lor enn bann lartik ki ena dan enn nu bann magazinn. Nu kapav usi explike ki nu travay fer dan lemond antye par bann volonter, ek li pena enn bi komersyal. Me, li sutenir par bann kontribisyon volonter. Parfwa, enn proklamater bizin kitfwa kontiyn mars avek sa dimunn la an mem tan ki li pe prezant li enn magazinn.

Me, nu bizin ena disernman ek get byin reaksyon bann dimunn. Buku bann dimunn ki nu zwenn dan lari, zot telman prese ki li difisil pu nu kone si zot vremem interese. Dan bann ka kumsa, li preferab ki nu les enn trak ki pu fer zot gayn gu pu lir nu bann lezot piblikasyon. Kitfwa, apre nu kapav mem gayn enn konversasyon avek zot.

Si nu fer lavwa piblik regilyerman dan bann landrwa ek dan bann moman favorab, bann dimunn pu abitye ar nu. Zot pu mem kontan pu koz avek nu si zot ena lokazyon ek lerla sa pu permet nu disern zot lintere.

Nu anvi servi nu bann piblikasyon avek sazes. Alor, li bon ki nu swazir enn moman favorab pu ofer bann piblikasyon. Sirveyan servis pu organiz bann sorti pu pres lor lavwa piblik. Si sertin kongregasyon pena teritwar pu fer sa form predikasyon la, zot kapav organiz avek bann lezot kongregasyon ki ena sa bann teritwar la, kuma par egzanp bann magazin, plas bazar, ek lezot plas ankor. Wi, si nu swazir bann bon moman pu ofer nu bann piblikasyon, nu pu kapav swiv lintere bann dimunn ki nu zwenn ek donn zot bann lexplikasyon lor nu travay.