Evit Rod “Bann Kitsoz Initil”
1 Zordi, E-mail se enn mwayin popiler pu kominike. Kitfwa nu truve ki sa mwayin la li bon pu partaz nu prop lexperyans ek nu bann lide avek nu fami ek nu bann kamarad. Me, nu kapav gayn kontak avek “bann kitsoz initil” si nu pa servi E-mail dan enn fason rezonab. Ki sa bann kitsoz la sa?—Pro. 12:11.
2 Bann Warning Konsernan E-mail: Sertin panse ki zot ena enn pli bon kontak avek lorganizasyon Zeova kan zot gayn bann linformasyon par E-mail. Parmi sa bann linformasyon la, ena bann kitsoz ki pase dan Betel, bann rapor lor bann katastrof uswa rapor lor bann persekisyon. Ek kapav mem ena bann linformasyon konfidansyel ki anonse dan l’École du ministère du Royaume. Ena lezot ki tro prese pu anvway sa bann kalite mesaz la, parski zot anvi ki, zotmem premye pu anons sa bann linformasyon la zot kamarad.
3 Defwa, bann linformasyon ek bann lexperyans finn deforme uswa finn egzazere. Uswa kitfwa parski sertin finn anvi inpresyonn lezot, zot finn transmet bann linformasyon ek lexperyans ki finn donn fos linpresyon. Suvan bann ki prese pu donn sa bann linformasyon la pa konn tu bann detay. (Pro. 29:20) Dan sertin ka, mem si enn zistwar pa paret vre, li pas pu enn linformasyon interesan. Sa bann rapor ki pa egzak ek ki tronp dimunn la, finn vinn “bann zistwar fos” ki pa ankuraz dimunn pu ena vre latasman ar Bondye.—1 Tim. 4:6, 7.
4 Si u partaz bann linformasyon ki fos, u port responsabilite pu maler ek konfizyon ki sa kapav ena. Par egzanp, kan David ti gayn enn mesaz egzazere ki tu so bann garson ti’nn mor, li “ti desir so linz” parski li ti byin sagrin. Me, anverite, enn sel parmi so bann garson ki ti’nn mor. Deza sa mesaz la ti fer David lapenn, me anplis parski li ti egzazere, David ti pli sagrin ankor. (2 Sam. 13:30-33) Nu pa anvi fer nanyin ki kapav tronp nu bann frer uswa dekuraz zot.
5 Mwayin Ki Bondye Finn Etabli: Pa bliye ki se “esklav fidel ek avize” ki sa mwayin kominikasyon ki Bondye finn etabli la. Sa “esklav” la ena responsabilite pu deside ki linformasyon ki bon pu bann serviter Bondye ki ena lafwa. Li usi kone “ki bon moman” pu donn sa. Se selman par sa mwayin la ki nu gayn manze spirityel. Donk, pu gayn bann linformasyon sir, fode pa nu turn nu ver bann ki servi Internet, me nu bizin turn nu ver sa mwayin ki Bondye finn etabli la.—Mat. 24:45.
6 Sit Internet: Lasosyete ena enn sit Web ofisyel lor Internet: www.watchtower.org. Piblik kapav gayn tu linformasyon ki li bizin lor sa ladres la. Donk, li pa neseser ki enn dimunn, enn komite, uswa enn kongregasyon servi Internet pu met bann lezot linformasyon. Sertin finn kre bann Web page pu anvway seki ena dan nu bann piblikasyon avek tu bann pasaz Labib ek bann referans. Zot finn mem ofer bann kopi diskur lasanble, ek tusala kont enn donasyon. Ki li raport kitsoz uswa non, kontiyn kopye ek distribye bann piblikasyon bann Temwin Zeova par mwayin Internet, li ilegal. Mem si sertin panse ki, kan zot fer sa zot pe rann servis zot bann frer, li ilegal ek zot bizin aret fer sa.
7 Si nu servi nu bon zizman kan nu servi Internet, sa pu ed nu pu ranpli nu lespri avek “bann bon kitsoz ki ena valer.”—Pro. 24:4.