Let Kolez Santral

Nu bann Frer ek Ser:

LI ENN gran plezir pu nu pu ekrir zot! Nu felisit zot pu lamur ek lespri sakrifis ki zot pe kontiyn demontre. Kan zot pu lir l’Annuaire sa lane la, zot pu truve ki kantite bon kitsoz nu finn akonpli pandan lane servis ki’nn pase. Ankor enn fwa, nu finn pas plis ki enn milyar lertan pu prese ek anseyn bann dimunn, ek pu ankuraz zot pu vinn pros ar Zeova. Eski li pa vremem enn loner pu travay ansam avek nu gran Bondye, nu Papa ki dan lesyel?—1 Kor. 3:9.

Kan nu get travay ki ena devan, nu sir ki zot pu kontiyn montre zot devwe ek ena lafwa parey kuma bann serviter Bondye, ki dekrir dan Labib. Par egzanp, lapot Pol ti tuletan anvi vinn pli efikas posib pu fer bann lintere Rwayom Bondye progrese. Se sirman pandan so dernye lane dan lavil Efez, ki li ti ekrir so premye let pu kongregasyon Korint. Dan sa let la, li ti explike seki li ti ena lintansyon fer pu linstan. Li ti ekrir: “Mo pe res dan Efez ziska fet Lapantkot; parski enn gran laport ki donn akse ar laktivite finn uver pu mwa, me ena buku lennmi.”—1 Kor. 16:8, 9.

Pol ti fini fer plan pu al Masedwann ek Korint. Me, li finn dekuver ki si li res dan Efez ankor enn tigit letan, li pu kapav fer enn travay itil. Pol ti enn dimunn ki ti kapav adapte li fasilman kot bizin; li finn truv enn sityasyon favorab kot li ti pu kapav fer bann lintere Rwayom progrese, la mem la dan sa landrwa kot li ti ete la. Alor, li finn sanz so program. Wi, enn gran laport ki donn akse ar laktivite ti’nn uver devan li, ek Pol ti byin anvi profit sa zoli lokazyon la.

Sa ti pu demann buku travay. Ti pu bizin pres labonn nuvel ek fortifye kongregasyon Efez. Get seki Pol ti dir bann ansyin dan sa kongregasyon la plitar: “Mo pa finn anpes mwa anons zot tu bann kitsoz ki ti profitab, ek pu anseyn zot an piblik, ek lakaz-lakaz. Me, ar bann Zwif ek Grek tulede, mo finn donn enn temwaynaz konple lor linportans pu repanti devan Bondye ek pu ena lafwa dan nu Senyer Zezi.”—Akt 20:20, 21.

Pareyman zordi, frer ek ser, buku parmi zot finn profit bann lokazyon ki finn prezant devan zot. Pandan lane servis ki’nn pase, an mwayenn, 798,938 finn kapav organiz zot pu servi dan enn form servis pyonye. Sertin parmi zot finn al servi kuma misyoner dan bann peyi byin lwin. Zot pe pres labonn nuvel partu avek buku zel ek zot pe fortifye bann kongregasyon. Lezot finn aprann enn lot lang pu pres avek bann etranze ki res dan zot teritwar. Ena ki’nn organiz zot pu al pres dan bann teritwar ki okenn kongregasyon pa okipe uswa kot ena enn gran bezwin. Pu lezot ankor, enn gran laport ki donn akse ar laktivite finn uver dan lekol, dan travay uswa dan bann lezot sityasyon kot kapav donn enn bon temwaynaz, kuma par egzanp par telefonn. Wi, bann lexperyans atraver lemond montre ki lepep Bondye, zenn ek vye tulede, pe fer zefor pu rod ek pu truv bann lokazyon pu partaz konesans laverite partu avek bann dimunn.

U kapav sir ki Zeova truv u bann zefor ek ki Li byin apresye sa. Dayer, Labib dir: “Bondye pa inzis pu bliye zot travay ek lamur ki zot finn montre pu so non.” (Ebre 6:10) Kontiyn vey tu lokazyon ki prezant devan u pu favoriz vre ladorasyon. Kitfwa, sertin parmi zot kapav fer plis dan zot minister. Nu tu nu kapav fer zefor pu amelyor nu minister.

Byinsir, nu pa kapav fer nu travay predikasyon san ki nu gayn lopozisyon. Rapel seki Pol ti dir apre ki li ti koz lor enn gran laport ki donn akse ar laktivite ek ki ti’nn uver devan li. Li ti ekrir: “Ena buku lennmi.” Pu Pol, sa bann lennmi la ti bann Zwif ek bann non-Zwif. Zot ti atak li an piblik ek lezot ti fer bann konplo anba-anba kont li.—Akt 19:24-28; 20:18, 19.

Zordi, sityasyon parey. Plis lafin sa move lemond la koste, plis nu pu gayn lopozisyon. Satan ranpli ar enn “gran koler,” ek li pe tir sa koler la sirtu lor bann ki pe servi Bondye. (Rev. 12:12) Fode zame zot bliye ki Satan li “sef sa lemond la.” Zezi ti dir so bann disip: “Si zot ti fer parti dan sa lemond la, lemond ti pu kontan seki dan so kote. Me parski mo finn tir zot dan lemond ek zot pa fer parti dan lemond, lemond ena laenn pu zot.”—Zan 14:30; 15:19.

Nu byin deside pu pa les personn afebli nu lafwa an Bondye uswa ralanti nu dan nu travay predikasyon. Nu kone ki pu ena tuzur bann lennmi ki pu atak nu ek ki pu manigans bann kitsoz kont nu. Malgre bann difikilte, nu pu kontiyn pres labonn nuvel lor Rwayom Bondye. Nu ena konfyans ki dan ler ki Zeova inn fixe, Zezi pu kraz Satan ek tu so larme partizan. Bann lennmi pa ti kapav ferm labus lapot Pol; ek zordi usi, zot pa pu kapav ferm labus bann serviter Zeova. Malgre koler Satan ek laenn sa lemond la, lespri Zeova pe egzers enn gran puvwar lor So pep. Eski se pa enn lazwa pu kone ki nu finn kont enn nuvo maximem 6,304,645 proklamater dan lemond antye?

Nu priye ki zot kontiyn profit bann lokazyon pu fer bann lintere Rwayom extraordiner Bondye progrese. Zot kapav sir ki nu interes ar sakenn parmi zot personelman, amezir ki nu debut “lamin dan lamin” dan servis Pli Gran Bondye, Zeova.—Sef. 3:9.

Zot bann frer,

Kolez Santral Bann Temwin Zeova