Bondye Finn Konfye Nu Bon Nuvel
1 Bondye finn konfye nu bon nuvel lor rwayom. Sa li vremem enn gran privilez! (1 Tes. 2:4) Mem si sertin rezet sa mesaz pwisan la, bann dimunn sinser zot, zot santi zot atire par sa, parey kuma zot atire par enn bon parfin. (2 Kor. 2:14-16) Bann ki aksepte ek obeir sa bon nuvel la, zot pu gayn delivrans. (Rom 1:16) Ki nu bizin fer avek sa bon nuvel ki Bondye finn konfye nu la?
2 Zezi ek So Bann Zapot: Predikasyon bon nuvel ti pas an premye dan lavi Zezi. (Lik 4:18, 43) Mem si li ti fatige uswa li ti fin, so lamur pu bann dimunn ek so lapresyasyon pu sa mesaz la, ti pus li pu partaz sa avek lezot. (Mark 6:30-34) Par seki li ti dir ek seki li ti fer, li ti grav linportans predikasyon Rwayom dan lespri so bann disip.—Mat. 28:18-20; Mark 13:10.
3 Bann zapot ti fer parey kuma Zezi. Zot ti anons sa mesaz lor Rwayom Bondye la avek zel. Mem kan zot ti gayn bate ek zot ti gayn lord pu aret prese, ‘zot ti kontiyn anseyne ek anons bon nuvel konsernan Kris Zezi, san arete.’ (Akt 5:40-42) Lapot Pol finn kontiyn fer sa travay la san zame arete. (1 Kor. 15:9, 10; Kol. 1:29) Li ti konpar privilez ki li ena pu partaz sa bon nuvel la ar enn det ki li ena anver so prosin. Li ti pre pu abandonn so prop konfor pu li kapav akonpli sa travay la.—Akt 20:24; Rom. 1:14-16.
4 Nu Privilez Zordi: Lapresyasyon pu sa misyon sakre ki Bondye finn konfye nu la, pus nu pu rod bann fason pu ogmant nu partisipasyon dan predikasyon. (Rom. 15:16) Nu ena legzanp Edward ki ti bizin res dan fotey rulant. Li ti asize devan lantre enn lotel ek li ti koz lor so krwayans ar bann dimunn ki ti res dan sa lotel la. Me, parski li ti anvi fer plis, li finn fer ranz enn kabinn dan kes enn vann. Grasa sa mwayin transpor la, li finn kapav fer pyonye pandan plizir lane ek li finn kapav vwayaz plizir milye kilomet kumsa. Parey kuma Edward, zordi ena enn kantite dimunn ki finn modifye zot sityasyon pu zot kapav partisip plis dan predikasyon bon nuvel.
5 Parey kuma Zezi ek bann zapot, anu tuletan fer laktivite predikasyon pas an premye dan nu lavi. Si nu fer sa nu pu montre ki nu kontan bann dimunn ek nu pu montre nu lapresyasyon pu bon nuvel ki Bondye finn konfye nu.