Andikape Fizikman—Me Ki Raport Buku Frwi
1 Si u parmi bann kantite Temwin Zeova ki ena enn andikap fizik, u tuzur kapav ena enn minister ki prodir bann bon rezilta. Dayer, u sityasyon kapav donn u bann lokazyon spesyal pu donn enn temwaynaz ek ankuraz lezot.
2 Donn enn Temwaynaz: Buku Temwin ki bizin lite ar enn andikap, pe partisip plin-plin dan minister. Par egzanp, ti ena enn ser ki ti gayn problem pu marse ek pu koze akoz enn loperasyon ki li ti fer. Me, li finn truve ki li kapav prezant bann peryodik si so mari park zot loto pre ar enn trotwar kot enn kantite dimunn ale vini. Enn fwa, li ti plas 80 peryodik dan zis dezertan! U sityasyon spesyal kapav amenn u pu rant an kontak avek bann dimunn ki dabitid difisil pu zwenn. Alor, konsider sa bann dimunn la kuma u teritwar spesyal.
3 U predikasyon kapav vinn byin efikas! Kan bann lezot pu get u determinasyon ek bon lefe ki laverite ki truv dan Labib ena dan u lavi, sa kapav atir zot ver mesaz lor Rwayom. Anplis, kan u zwenn bann dimunn ki pe sufer akoz bann sityasyon byin difisil, lexperyans ki u ena dan lavi kapav ed u pu rekonfort zot atraver Parol Bondye.—2 Kor. 1:4.
4 Fortifye Lezot: Eski u pa ti byin ankuraze kan u ti lir resi lavi Laurel Nisbet? Li ti res dan enn pumon lasye pandan 37 an, purtan, li finn kapav ed 17 dimunn pu gayn konesans egzak lor Labib. Parey kuma li, u legzanp kapav motiv bann frer ek ser pu fer zefor dan servis pu Zeova.—gF 93 22/1 paz 18-21.
5 Mem si u sityasyon anpes u pu sorti al dan predikasyon otan ki u anvi, u tuzur kapav fortifye lezot. Enn frer dir: “Mo finn aprann ki mem enn kikenn ki andikape ase gravman kapav vinn enn gran led pu lezot. Mo madam ek mwa nu finn vinn enn sutyin pu diferan frer ek ser dan kongregasyon. Akoz nu sityasyon, nu tuletan la. Nu tuletan prezan kan zot bizin nu.” Me akoz u andikap, nu konpran ki u pa kapav tuzur fer bann kitsoz kuma u ti pu anvi. Me avek inpe led kitfwa u kapav partisipe dan enn fason aktif dan predikasyon. Donk, si u bizin kit led, pa ezite pu koz sa avek bann ansyin ek lezot manb dan kongregasyon ki kapav ed u.
6 Zeova truv tu seki u fer pu servi Li, ek Li apresye servis ki u donn Li avek tu u leker. (Psom 139:1-4) Amezir u kont lor Li, Li kapav donn u lafors pu u gayn enn minister ki raport buku frwi ek ki fer u gayn buku satisfaksyon.—2 Kor. 12:7-10.