Laretret—Eski Se enn Laport Ki Donn Akse ar enn Pli Gran Laktivite?
1 Buku dimunn ki travay dir, atann moman kan zot pu pran zot retret. Kumsa zot pu aret rinte ek aret konn bann presyon ki ena dan travay. Me, byin suvan, apre ki enn dimunn pran so retret, li nepli interese ar nanyin, li agase ek li vyeyi pli vit. Si enn kikenn pena okenn laktivite ki donn so lavi enn sans, alafin li kapav retruv li pe fatig so latet ar so prop traka. Enn lagazet Brezilyin dir ki bann ki ti anploye avan dan sekter piblik ek ki’nn retrete, zot konn bann problem kuma par egzanp ‘zot pa satisfe ar nanyin, zot nerve, zot pa santi zot an sekirite, ek zot nepli kone kisannla zot ete. Ena ki arive mem tom dan depresyon ek zot ena linpresyon ki zot lavi pena okenn sans.’
2 Me bann Kretyin zot, zot byin diferan. Buku konsider sa nuvo letap dan zot lavi la kuma enn laport ki donn akse ar enn pli gran laktivite spirityel. Enn frer ki finn kumans servis pyonye de semenn apre ki li’nn gayn 65 an dir: “Zame mo pa finn konn enn peryod dan mo lavi kot mo finn gayn sa kantite benediksyon ki sa dis dernye lane ki mo’nn pase pu fer pyonye la.” Enn kup marye ekrir: “Nu bann pli bon lane finn kumanse kan nu finn pran servis pyonye.” Wi, pu buku, laretret li enn bon lokazyon pu ogmant zot minister ek gayn buku benediksyon Zeova.
3 Res Okipe ek Prodir Buku Frwi: Buku ki retrete zordi, finn grandi san bann konfor ki byin komin dan nu lepok. Zot finn aprann pu travay dir alor ki zot ti ankor zenn. Mem si zot nepli ena sa lafors ki zot ti ena kan zot ti ankor zenn la, zot ankor bann travayer ki prodir bann bon rezilta. Dan teritwar enn filyal, 22 pursan bann pyonye, setadir preske 20,000 frer ek ser, ena omwin 60 an. Dan teritwar nu filyal ena 39 frer ek ser ki ena plis ki 60 an ek ki dan servis aplintan. Sa bann frer ek ser aze la fer buku pu laktivite predikasyon. Zot lexperyans ek bann bon kalite ki zot ena, fortifye bann kongregasyon kot zot servi.—Zak 3:17, 18.
4 Kan enn kikenn res byin okipe dan minister Kretyin, sa ed li pu ena enn pli bon lasante ek sa amelyor kalite so lavi. Enn ser 84 an, ki finn kumans servis pyonye kan li ti pran so retret, dir: “Parski mo ena enn kantite letid Labib avek bann dimunn ki interese, sa ed mwa pu res aktif lor plan mantal. Mo pena enn loto, donk mo mars enn kantite. Sa ed mwa pu gard enn bon lasante.” Enn kup pyonye aze fer sa komanter la: “Nu servis ed nu pu ena enn bon lasante mantal ek fizik. Nu tuletan ansam. Nu riye enn kantite ek nu apresye nu lavi.”
5 Servi Kot Ena enn Bezwin: Sertin Kretyin ki retrete ek ki ena enn sityasyon materyel ki favorab, finn al servi la kot byin bizin bann proklamater. Lezot finn ogmant zot minister kan zot finn servi dan enn teritwar kot ena bann dimunn ki koz enn lot lang. Parey kuma lapot Pol, sa bann proklamater zele la ‘fer tu kitsoz akoz bon nuvel, pu ki zot kapav ena enn par ladan ansam avek lezot.’—1 Kor. 9:23.
6 Enn kup ti kumans servis pyonye apre ki zot finn elve zot de garson. Apre plizir lane, zot finn kumans aprann Sinwa. Zordi zot ena 79 ek 76 an. Resaman zot finn gayn lazwa pu truv sa ti grup lang Sinwa avek ki zot finn travay la, vinn enn kongregasyon. Wi, bann kup kumsa finn montre ki zot vremem enn benediksyon!
7 Nu Pa Pran Retret dan Nu Minister: Alor ki li normal ki laplipar dimunn aret travay kan zot gayn enn sertin laz, okenn Kretyin pa pran retret dan servis Bondye. Nu tu nu bizin kontiyne fidelman “ziska lafin.” (Mat. 24:13, 14) Byinsir, amezir sertin pran laz, zot nepli kapav fer kantite ki zot ti pe fer avan dan servis pu Zeova. Me, li vremem ankurazan kan nu truv zot pe fer seki zot kapav avek tu zot leker! Parol Bondye donn zot lasirans ki Zeova zame pa pu bliye travay ek lamur ki zot montre pu so non.—Lik 21:1-4; Ebre 6:10.
8 Si u pre pu pran retret, kifer eski u pa priye ek reflesi kuma u kapav profit sa sityasyon ki pe sanze la? Avek led Zeova, u kapav truve ki laretret li uver pu u enn laport ki donn akse ar enn pli gran laktivite ki donn Zeova laglwar ek ki amenn enn kantite benediksyon.—Psom 148:12, 13.