Kuma Nu Kapav Ed Bann Konzwin Ki Pa Temwin?
1 Nu ena dan la kongregasyon, bann frer ek ser ki ena enn konzwin ki pa dan la verite. Anfet buku parmi sa bann konzwin-la byin amikal avek bann Temwin ek zot interese ar la kongregasyon. Me ena kitsoz ki anpes zot vinn Temwin Jéhovah. Get par egzanp seki enn mari inn avwe: “Al prese de port-an-port, sa ti byin dir pu mwa.” Ena lezot ki sirman bizin rezet sertin pratik ki la Bib kondane. Uswa, zot panse ki zame zot pu reysi fer tu sa bann aktivite teokratik ki zot konzwin fer-la. Kuma eski nu kapav ed zot?
2 Nu Bizin Montre enn Lintere Personel: Ki nu kapav fer pu ki sa bann konzwin ki pa Temwin-la aksepte la verite? Nu kapav montre ki nu interese personelman ar zot ek pran kont seki preokip zot. (Phil. 2:4) Parmi bann ki’nn vinn Temwin zordi, sertin suvan koz lor lintere ek lamur ki lezot Temwin ti’nn manifeste anver zot. Not seki sa misye ki nu’nn site avan-la inn temwayne apre: “José, enn ansyin dan la kongregasyon, finn byin pran mwa kont. Mo panse ki se so lankurazman ki finalman finn pus mwa pu pran letid la Bib oserye.” Enn lot mari rapel ki bann frer ki ti vizit li, ti fer zefor pu koz lor bann kitsoz ki ti interes li. Li dir: “Mo’nn kumans truv relizyon mo madam enn lot fason. So bann kamarad ti bann dimunn intelizan ki ti koz lor diferan size.”—1 Cor. 9:20-23.
3 Nu Bizin Aport enn Led Pratik: Kan nu rann servis bann konzwin ki pa Temwin, sa usi kapav tus zot. (Prov. 3:27; Gal. 6:10) Enn zenn frer ti ed enn mari ki pa Temwin pu repar so loto. “Sa ti vremem inpresyonn mwa,” misye-la rakonte. Enn lot frer li, li’nn pas enn zurne pu ed enn mari ki pa Temwin pu bar so terin. An mem tan ki zot ti pe travay ek koz-koze, zot inn devlop enn lamitye. De semenn apre, sa misye-la inn dir frer-la: “Inn ariv ler pu mo fer sertin sanzman dan mo lavi. Eski u ti pu kontan etidye la Bib avek mwa?” Li pa’nn tarde pu progrese ek asterla li enn parmi nu bann frer.
4 Alor ki nu pe rod bann ki diyn dan nu teritwar, anu kontiyn ed bann konzwin ki pa Temwin.—1 Tim. 2:1-4.