Zenn—Lir Parol Bondye!
1 La zenes, se enn lepok kot bann zenn bizin fer fas ar buku difikilte ek kot zot bizin pran bann gran desizyon. Zenn, buku parmi zot pe bizin lite pu gard enn kondwit ki fer Bondye plezir. Avan u pran ninport ki desizyon, ki li an rapor avek ledikasyon, travay uswa maryaz, u bizin dabor fixe u bann lobzektif spirityel. Se selman lerla ki u pu kapav pran lezot bon desizyon dan u lavi. Bann lobzektif spirityel byin presi pu ed u azir avek sazes ek reysi u lavi. Si u lir ek medit lor Parol Bondye regilyerman, sa pu pus u pu viv an akor avek bann konsey ki ena ladan, ek u bann zefor pu abuti.—Jos. 1:8; Ps. 1:2, 3.
2 Kuma Parol Bondye Kapav Ed U? Lemond Satan ranpli avek bann tantasyon pu fer seki move. (1 Jean 2:15, 16) Sirman u konn bann kamarad lekol, uswa lezot zenn ki finn konn bann maler parski zot finn les zot inflyanse par zot lanturaz. Si u swiv bann konsey la Bib depre, sa pu donn u lafors moral ek spirityel pu rezet pese. Anplis, konsey ki truv dan Parol Bondye pu anpes u tom dan bann pyez surnwa ki Satan met devan u. (2 Cor. 2:11; Héb. 5:14) Wi, si u obeir Bondye, u pu gayn vre boner—u pu satisfe ar u lavi.—Ps. 119:1, 9, 11.
3 Bann prinsip ki truv dan Parol Bondye, zot pa sanze, ek zot pli siperyer ki la sazes imin. (Ps. 119:98-100) Enn bon konesans lor bann prinsip la Bib, ek meditasyon lor bann proze Jéhovah dan lapriyer, pu ed u devlop enn bon relasyon avek Jéhovah, Personaz pli saz dan liniver. Dayer Jéhovah promet nu: “Mo pu donn twa perspikasite ek mo pu anseyn twa dan ki semin to bizin marse. Mo pu konsey twa ek mo lizye pu lor twa.”—Ps. 32:8.
4 Rod Letan pu Lir la Bib: Enn zenn Kretyin ti fixe lobzektif pu lir la Bib an antye, ek li’nn termine dan enn an. Ki byinfe li’nn gayne? Li dir: “Mo’nn aprann enn kantite kitsoz lor Jéhovah, bann kitsoz ki’nn fer mwa vinn pli pros ar Li ek ki fer mwa anvi ena lakrint pu Li tutlong mo lavi.” (Jacq. 4:8) Eski u’nn deza lir la Bib an antye? Si non, kifer eski u pa fixe u sa lobzektif-la? Nu sir ki Jéhovah pu beni u bann zefor, ek u pu gayn bann gran byinfe an retur.