Imite la Justice Jéhovah
1 “Jéhovah content la justice.” (Ps. 37:28) C’est vrai ki Li’nn donne l’ordre pou détruire sa lé-monde injuste-la. Mais avant ki sa arrivé, Li finn prend bann dispositions pou lance enn l’avertissement. (Marc 13:10) Oui, Li donne bann dimoune l’occasion pou zot repenti ek gagne la vie sauve. (2 Pierre 3:9) Eski nou faire zeffort pou imite la justice Jéhovah? Eski la misère ek la souffrance bann dimoune, pousse nou pou partage l’espérance du Royaume avec zot? (Prov. 3:27) L’amour pou la justice pou incite nou pou participe dans la prédication dans enn façon actif.
2 Prêché Sans Faire Préférence: Kan nous annonce projet Bondié ar tou bann dimoune, sans faire préférence, nous montré ki nou pé “pratique la justice.” (Mika 6:8) Nous bizin résisté contre tendance imparfait ki nous éna pou juge bann dimoune lor zot l’apparence. (Jacq. 2:1-4, 9) Jéhovah “envie ki tou sorte qualité dimoune sauvé ek gagne enn connaissance exacte lor la vérité.” (1 Tim. 2:4) Parole Bondié kapav faire bann grand changements dans la vie bann dimoune. (Héb. 4:12) Si nous garde sa pensé-la dans nou l’esprit sa kapav pousse nou pou approche bann dimoune avec confiance, mem bann dimoune ki finn refuse écoute nou dans le passé.
3 Enn soeur ki ti travaille dans enn magasin, ti inpé peur par l’apparence enn client ki ti vinn souvent. Mais, kan li finn gagne enn l’occasion, li finn essaye donne client-la enn temoignage lor Paradis ki Bondié promette. Monsieur la finn reponn li brit ek li’nn dire li ki li pa croire dans bann zistoires pou bann zenfants. Li’nn dire li aussi ki li enn hippie ek ki li drogué. Mais soeur-la pa’nn abandonné. Enn jour, client-la finn demande soeur-la ki li pensé lor so longue cheveux. Avec tact, soeur-la finn explique li séki la Bible dire lor sa sujet-la. (1 Cor. 11:14) Lendemain, li finn gagne enn surprise kan li’nn trouve client-la rentre dans magasin bien rasé ek cheveux coupé! Li’nn demande pou gagne enn l’étude la Bible. Enn frère finn accepté avec plaisir pou étudié avec li, ek li’nn progressé ziska ki li baptisé. Pareil couma sa monsieur-la, beaucoup parmi bann serviteur Jéhovah zordi, zot reconnaissant pou bann zeffort ki bann proclamateur ki’nn prêche avec zot finn contigne faire, ek aussi parski bannla finn prêché sans faire préférence.
4 Bientôt, Jéhovah pou enlève l’injustice ki éna lor la terre. (2 Pierre 3:10, 13) Dans sa tigit lé-temps ki resté-la, anou faire zeffort pou imite la justice Jéhovah. Couma nous kapav faire sa? C’est kan nous donne tou dimoune l’occasion pou zot koné couma zot kapav sauvé kan le monde injuste Satan pou détruire.—1 Jean 2:17.